Si Kristo Hesus ba ay Diyos? Inangkin ba ni Kristo Hesus na Siya ay Diyos?

Tanong: "Si Kristo Hesus ba ay Diyos? Inangkin ba ni Kristo Hesus na Siya ay Diyos?"

Sagot: Walang talata sa Banal na Kasulatan kung saan ay tuwirang sinabi ni Kristo Hesus ang ganito, "Ako ay Diyos". Ngunit hindi iyan nangangahulugan na hindi Niya kailanman ipinahayag na Siya ay Diyos. Isang halimbawa na lamang ay ang sinabi ni Kristo Hesus sa Juan 10:30, "Ako at ang Ama ay iisa". Sa unang tingin, tila hindi ito tuwirang pag-angkin na Siya ay Diyos. Subalit, para sa mga Judio ang sinabi ni Hesus ay tiyakang pag-angkin na Siya ay Diyos. Ganito ang reaksiyon ng mga Judio, "Hindi dahil sa mabuting gawa kaya ka namin babatuhin, kundi dahil sa paglapastangan mo sa Diyos. Sapagkat nagpapanggap kang Diyos gayong tao ka lang"(Juan 10:33). Sa sumunod na mga talata hindi itinuwid ni Kristo Hesus ang mga Judio tulad halimbawa ng pagsasabing, "Hindi ko inangkin ang pagiging Diyos". Ipinapahiwatig lamang nito na si Kristo Hesus ay Diyos nang Kanyang ideklara, "Ako at ang Ama ay iisa"(Juan 10:30). Sa Juan 8:58, ganito ang wika ni Kristo Hesus, "Katotohanang sinasabi Ko sa inyo, bago pa ipinanganak si Abraham, Ako ay Ako na!" Muling kumuha ng bato ang mga Judio at tangkang ipukol kay Kristo Hesus. Bakit kailangang muling batuhin ng mga Judio si Kristo Hesus, kung wala Siyang sinabi na sa paniniwala nila'y panlalait sa pangalan ng kataas-taasang Diyos?

Sinasabi sa Juan 1:1, "Sa pasimula pa'y naroon na ang Salita. Kasama ng Diyos ang Salita, at ang Salita ay Diyos". Sa Juan 1:14, ang sinasabi ay ganito, "Naging tao ang Salita at Siya'y nanirahan sa piling natin...". Ito'y malinaw na nagsasaad na si Kristo Hesus ay Diyos na nagkatawang-tao. Sinasabi sa atin sa Gawa 20:28, "Ingatan ninyo ang inyong sarili at ang lahat ng kabilang sa katawan, sapagkat inilagay sila ng Espiritu Santo sa inyong pag-iingat. Pangalagaan ninyo ang Iglesiya ng Diyos na Kanyang tinubos sa pamamagitan ng kamatayan ng Kanyang sariling Anak". Idineklara sa Gawa 20:28 na binayaran ng Diyos ang Kanyang Iglesiya sa pamamagitan ng Kanyang dugo. Samakatuwid si Kristo Hesus ay Diyos.

Ganito ang sagot ng disipulong si Tomas kay Kristo Hesus, "Panginoon ko at Diyos ko" (Juan 20:28). Sa Tito 2:13, pinalalakas ang ating loob sa paghihintay ng muling pagparito ng ating Panginoon at Tagapagligtas - Kristo Hesus (basahin din sa 2 Pedro 1:1). Sa Hebreo 1:8, ganito ang deklarasyon ng Diyos Ama patungkol kay Kristo Hesus, "Ang Iyong trono, O Diyos, ay magpakailan pa man. Ikaw ay maghaharing may katarungan".

Sa aklat ng Pahayag, itinuro ng Anghel kay Apostol Juan na tanging Diyos lamang ang sasambahin (Pahayag 19:10). Makailang ulit din na naitala sa Banal na Kasulatan na sinamba si Kristo Hesus (Mateo 2:11; 14:33; 28:9,17; Lukas 24:52; Juan 9:38). Kailan man ay hindi sinaway ni Kristo Hesus ang sumamba sa Kanya. Kung hindi Siya Diyos sana ay pinagsabihan Niya ang mga tao na huwag Siyang sambahin tulad ng ginawa ng Anghel kay Apostol Juan na naitala sa aklat ng Pahayag 19:10.

Marami pang mga talata at pangungusap sa Banal na Kasulatan na nagbibigay diin sa pagiging Diyos ni Kristo Hesus. Ang pinakamahalagang katuwiran ng pagiging Diyos ni Kristo Hesus ay ang Kanyang walang kasing ganap na handog - ang Kanyang kamatayan - bilang sapat na kabayaran ng kasalanan ng buong sanlibutan (1 Juan 2:2). Tanging Diyos lamang ang may taglay na kakayahan at kahalagahan upang maihango ang tao sa walang hanggang kaparusahan. Tanging Diyos lamang ang makagagawang akuin ang kasalanan ng sanlibutan (2 Corinto 5:21), sa pamamagitan ng kamatayan at pagkabuhay na mag-uli - bilang patunay ng Kanyang tagumpay laban sa kasalanan at kamatayan.

Balik sa Tagalog Home Page