Sino si Hesu Kristo?

Tanong: "Sino si Hesu Kristo?"

Sagot: Sino ba si Hesu Kristo? Hindi kagaya ng katanungang “Nabubuhay ba ang Diyos?” kakaunting tao lang ang nagtatanong kung nabubuhay ba si Hesu Kristo. Pangkalahatang tinanggap na si Hesus ay isang totoong tao na lumakad sa mundo partikular na sa bansang Israel dalawan libong taon na ang nakalilipas. Ang pagtatalo ay nagsisimula kung ang paksa na ng pagkatao ni Hesus ang pinag-uusapan. Halos lahat ng relihiyon ay nagtuturong si hesus ay isang propeta, o di kaya isang mabuting guro, o isang maka-Diyos na tao. Ang problema ay, sinasabi ng Bibliya na si Hesus ay mas higit pa sa isang magaling na Guro o maka-Diyos na tao.

Isinulat ni C.S. Lewis sa kanyang libro na “Mere Christianity” ang sumusunod, “Sinisikap kong hadlangan na sabihin ng iba ang kahangalang palaging binabanggit ng ilang tao tungkol sa Kanya (Hesu Kristo); “Handa kong tanggapin na si Hesus ay isang dakilang guro, pero hindi ko tinatanggap ang pag-angkin Niya na Siya ay Diyos.” Yan ang bagay na hindi natin dapat sabihin. Kinakailangan mong pumili ng iyong paniniwalaan. Maari mong paniwalaan na si Hesus ay Anak ng Diyos o di kaya’y Siya’y isang baliw o mas higit pa. Maari mong sabihin na isa Siyang hangal, maari mo Siyang murahin at patayin o di kaya lumuhod sa Kanyang harapan at tawagin siyang Diyos at Panginoon.

Sino nga ba si Hesus? Ano ang sinasabi ng Bibliya tungkol sa Kanya? Una, ating tingnan ang salita ni Hesus sa Juan 10:30 “Ako at ang Ama ay iisa.” Sa unang tingin, maaaring tila hindi ito pag-angking Siya ay Diyos, subalit tingnan natin ang reaksiyon ng mga hudyo sa naturang pahayag ni Hesus. “Hindi ka namin babatuhin dahil sa mabuting gawa, kundi dahil sa paglapastangan mo sa Diyos! Sapagka’t nagpanggap kang Diyos gayong tao ka lang.” (Juan 10:33) Naunawaan ng mga hudyo na ang salitang sinabi ni Hesus ay isang pag-angkin na Siya ay Diyos. Sa mga sumunod na talata hindi kailanman iwinasto ni Hesus ang mga hudyo sa pamamagitan ng pagsabing “Hindi Ko ina-angking Ako ay Diyos.” Nagpapahiwatig lamang ito na ang totoong ibig sabihin ni Hesus ay Siya nga ang Diyos noong ideklara Niyang “Ako at ang Ama ay iisa.” (Juan 10:30) Ang Juan 8:58 ay isa ring halimbawa; Sinabi ni Hesus, ‘Sinasabi ko sa inyo, bago ipinanganak si Abraham, “Ako’y Ako na”.’ Muli , bilang tugon, kumuha ng mga bato ang mga hudyo at tangkang babatuhin si Hesus. (Juan 8:59) Bakit gusto ng mga hudyo na batuhin si Hesus kung hindi Siya nakapagsalita ng mga bagay na pinaniniwalaan ng mga hudyo na pagkutya sa Diyos? Kagaya ng, pag-angkin na Siya ay Diyos.

Sinasabi ng aklat ng Juan 1:1 “Ang Salita ay diyos” Sinasabi naman ng Juan 1: 14 “Ang Salita ay nagkatawang tao.” Ito’y nagpapakita lamang na si Hesus ay ang Diyos sa laman. Sinabi ng disipulong si Tomas kay Hesus, “Aking Panginoon at aking Diyos.” (Juan 20:28) Hindi siya iwinasto ni Hesus. Isinalarawan ni Apostol Pablo si hesus na, “Ang ating Dakilang Diyos at Tagapagligtas na si Hesu Kristo.” (Titus 2:13) kagaya din nito ang sinabi ni Pedro, “Ang ating Diyos at Tagapagligtas na si Hesu Kristo.” (2 Pedro 1:1) Ang Diyos Ama ay nagpatotoo rin sa buong pagkatao ni Hesus, “Ang iyong trono, O diyos ay mananatili magpakailanman, Ikaw ay maghaharing may katarungan. Sinasabi din ng lumang tipan ang pagiging banal ni Hesus, “Para sa atin isang sanggol ang isisilang, isang anak ang ibibigay, ang pamahalaan ay pasan ng kanyang balikat at tatawagin Siyang kahanga-hangang Tagapayo, Makapangyarihang Diyos, walang katapusang Ama at Prinsipe ng kapayapaan.

Dahil dito sinasabi ni C.S. Lewis na ang paniniwala natin na si Hesus ay isang mabuting guro lang ay hindi opsyon. Malinaw at hindi pinabubulaanan ni Hesus na Siya ay Diyos. Kung hindi Siya Diyos, samakatuwid Siya ay sinungaling, dahil dito hindi Siya propeta, hindi Siya mabuting guro at maka-Diyos na tao. Dahil sa tangka ng mga modernong iskolar na ipaliwanag palayo ang mga salita ni Hesus, sinasabi nila na hindi binanggit ni hesus ang mga bagay na sinasabi ng bibliya tungkol sa kanya. Sino tayo para makipagtalo sa salita ng Diyos tungkol sa kung ano ang sinabi at hindi sinabi ni Hesus? Papaano masasabi ng mga iskolar na mas maganda ang kanilang pananaw sa kung ano ang mga sinabi at hindi sinabi ni hesus kaysa doon sa mga taong nakasama ni Hesus mismo, mga pinagsilbihan at tinuruan Niya hinggil sa Kanyang sarili (Juan 14:26).

Bakit kaya ang katanungan tungkol sa totoong pagkatao ni Hesus ay napaka-importante? May kabuluhan bang malaman natin kung totoo nga bang Diyos si Hesus o hindi? Ang pinaka-importanteng dahilan kung bakit si Hesus ay Diyos ay; Kung hindi Siya Diyos ang kanyang kamatayan ay hindi sapat para pagbayaran ang kaparusahan ng kasalanan ng sanlibutan. (1 Juan 2:2) Tanging ang Diyos lang ang may kakayahang magbayad ng naturang walang hanggang kaparusahan (Roma 5:8; 2 Corinto 5:21) Si Hesus ay kinakailangang maging Diyos para mabayaran ang ating pagkaka-utang, kinakailangan Niyang maging tao upang Siya’y mamatay. Ang kaligtasan ay posible lamang sa pamamagitan ng pananampalataya kay Hesu-Kristo. Si Hesus lamang ang daan tungo sa kaligtasan, “Ako ang daan, ang katotohanan at ang buhay, walang makakapunta sa Ama kung hindi sa pamamagitan Ko” (Juan 14:6).

Balik sa Tagalog Home Page