Ano ba ang ibig sabihin ng ang Diyos ay Pag-ibig?

Tanong: "Ano ba ang ibig sabihin ng ang Diyos ay Pag-ibig?"

Sagot: Ano ba ang ibig sabihin ng ang Diyos ay Pag-ibig? Una sa lahat titingnan natin kung papaano ipinaliliwanag ng salita ng Diyos, ang Bibliya ang “Pag-ibig,” at pagkatapos titingnan natin ang ilang paraan na magamit natin ito sa Diyos. “Ang pag-ibig ay matiyaga at mabait. Ang pag-ibig ay hindi naiinggit. Ang pag-ibig ay hindi nagmamapuri o nagmamataas. Ito ay hindi nag-uugali ng di-nararapat, hindi ito naghahangad ng sariling kapakinabangan, hindi madaling magalit at hindi nag-iisip ng masama. Hindi ito nagagalak sa kalikuan kundi nagagalak sa katotohanan. Ang pag-ibig ay nagtatakip ng lahat ng bagay. Ito ay naniniwala sa lahat ng bagay, umaasa sa lahat ng bagay, nagbabata sa lahat ng bagay. Ang pag-ibig ay hindi nagwawakas. Kung mayroong paghahayag, ang mga ito ay lilipas. Kung may pagsasalita ng mga wika, sila ay titigil. Kung may kaalaman, ito ay lilipas. (1 Corinto 13:4-8a).

Ito ang paglalarawan ng Diyos sa pag-ibig. Ganyan din ang kagaya ng Diyos, at dapat gawin din itong layunin ng mga Kristiyano, (kahit na patuloy pa tayong nasa proseso). Ang pinakadakilang paghahayag sa atin ng pag-ibig ng Diyos ay ipinapakita sa aklat ng Juan 3: 16 at Roma 5: 8. “Ito ay sapagkat sa ganitong paraan inibig ng Diyos ang sanlibutan kaya ipinagkaloob niya ang kaniyang bugtong na Anak upang ang sinumang sumampalataya sa kaniya ay hindi mapahamak kundi magkaroon ng buhay na walang hanggan.” “Ngunit ipinakita ng Diyos ang kaniyang pag-ibig sa atin na nang tayo ay makasalanan pa, si Cristo ay namatay para sa atin.” Makikita natin sa mga talatang ito na pangunahing layunin ng Diyos na makasama natin Siya sa Kanyang walang hanggang tahanan, sa langit. Gumawa Siya ng daan upang maging posible ito sa pamamagitan ng pagbabayad sa kaparusahan ng ating mga kasalanan. Mahal Niya tayo dahil pinili Niya ito bilang Kanyang kagustuhan. “Nagtatalo ang loob ko at nananaig sa aking puso ang malasakit at awa” (Oseas 11:8b). “Ang pag-ibig ay nagpapatawad. Kung ihahayag natin ang ating mga kasalanan, siya ay matapat at matuwid na magpapatawad at maglilinis sa atin sa lahat ng ating kalikuan.” (1 Juan 1:9).

Ang pag-ibig (Diyos) ay hindi ipinagpipilitan ang Kanyang sarili sa sinuman. Ang yaong mga lumalapit sa Kanya ay ginagawa ito bilang pagtugon sa Kanyang pag-ibig. Ang pag-ibig (Diyos) ay nagpapakita ng kagandahang-loob sa lahat. Ang pag-ibig (Hesus) ay gumawa ng kabutihan sa lahat at walang kinikilingan. Ang pag-ibig (Hesus) ay hindi nagnanasa sa mga bagay na pagmamay-ari ng iba, namumuhay ng simple at hindi nagrereklamo. Ang pag-ibig (Hesus) ay hindi nagmamayabang kung sino Siya sa laman, kahit na madali niya masugpo o matalo ang sinuman. Ang pag-ibig (Diyos) ay hindi nagpupumilit ng pagsunod. Ang Diyos ay hindi nagpumilit ng pagsunod mula sa Kanyang Anak, subalit, taus-pusong tumalima si Hesus sa Kanyang Ama na nasa langit. “Sinabi ko ito sa inyo upang malaman ng sangkatauhan na iniibig ko ang Ama. Malalaman nila na kung papaano ako inutusan ng Ama, ganoon ang ginagawa ko.” (Juan 14:31). Ang pag-ibig (Hesus) ay palaging tinitingnan ang interes ng iba.

Ang maikling paglalarawan na ito sa pag-ibig ay nagpapakita ng buhay na hindi nakatuon sa sarili. Nakakamanghang binigyan ng Diyos ang yaong mga tumanggap sa Kanyang Anak bilang kanilang personal na tagapagligtas ng kakayahang umibig ng kagaya Niya, sa pamamagitan ng kapangyarihan ng Banal na Espiritu (Tingnan ang Juan 1: 12; 1 Juan 3: 1, 23, 24). Isang napakalaking hamon at prebiliheyo!

Balik sa Tagalog Home Page