Ang sinasamba bang Diyos ng mga Muslim at Kristiyano ay magkapareho?

Tanong: "Ang sinasamba bang Diyos ng mga Muslim at Kristiyano ay magkapareho?"

Sagot: Ang kasagutan sa katanungang ito ay nakadepende sa kung ano ang ibig sabihin ng “Magkaparehong Diyos.” Hindi maipagkakaila na ang pananaw ng mga Muslim sa Diyos at ang pananaw ng mga Kristiyano sa Diyos ay may mga pagkakahawig. Kinukunsidera ng dalawang pananampalataya na ang Diyos ang pinakamataas sa lahat, pinakamakapangyarihan, nakaka-alam ng lahat, naroon sa lahat ng lugar sa lahat ng oras, banal at matuwid. Naniniwala ang Islam at Kristiyanismo sa iisang Diyos na lumalang sa lahat ng bagay sa mundo. Dahil dito, sa ganitong sitwasyon, iisa lang ang sinasambang Diyos ng mga Kristiyano at Muslim.

Subalit, Mayroon ding mga napaka-importanteng pagkakaiba sa pagtingin ng mga Kristiyano at Muslim sa Diyos. Habang tinitingnan ng mga Muslim na si Allah ay mayroong katangian ng pagmamahal, pagkahabag, at grasya; hindi naman ipinapakita ni Allah ang mga katangiang ito sa paraang kagaya ng Diyos ng mga Kristiyano.

Ang isa sa pinaka-importanteng kaibahan sa pagtingin ng mga Muslim at Kristiyano sa Diyos ay, ang konsepto ng inkarnasyon. Naniniwala ang mga Kristiyano na ang Diyos ay nagkatawang tao sa katauhan ni Hesu Kristo. Habang naniniwala naman ang mga Muslim na ang nasabing konsepto ay isang napakalaking pagkutya sa Diyos. Hindi kailanman matanggap ng mga Muslim ang ideyang nagkatawang tao si Allah para mamatay para sa mga kasalanan ng sanlibutan. Ang paniniwala sa inkarnasyon ng Diyos sa pagkatao ni Hesu Kristo ay lubos na kailangan sa pang-unawa ng Kristiyano sa Diyos. Nagkatawang tao ang Diyos upang maibigay Niya ang kaligtasan at kapatawaran ng ating mga kasalanan.

Dahil dito, ang mga Muslim ba at Kristiyano ay sumasamba sa iisang Diyos? Oo at Hindi. Maaring ang mas magandang katanungan ay, “Ang mga Muslim ba at Kristiyano ay may magkahalintulad na pang-unawa kung ano ang Diyos? Sa ganitong katanungan, ang kasagutan ay Hindi. Mayroong ilang importanteng kaibahan sa pagitan ng dalawang konsepto ng Kristiyano at Muslim tungkol sa Diyos. Naniniwala tayo na ang Kristiyanismo ay ang may tamang pagtingin tungkol sa Diyos dahil walang kaligtasan kung hindi ito pagbabayaran. Tanging ang Diyos lang ang makapagbabayad ng naturang kaparusahan. Tanging ang pagkakatawang tao ang daan ng Diyos upang mamatay Siya bilang ating kapalit, binayaran Niya ang ating mga kasalanan (Roma 5:8; 2 Corinto 5:21).

Balik sa Tagalog Home Page

Ang sinasamba bang Diyos ng mga Muslim at Kristiyano ay magkapareho?