Ano ba ang ibig sabihin ng ang Bibliya ay inspirado?

Tanong: "Ano ba ang ibig sabihin ng ang Bibliya ay inspirado?"

Sagot: Kapag sinasabi ng mga tao na ang Bibliya ay inspirado, tinutukoy nila ang katotohanang ang Diyos ang nag-impluwensiya sa mga taong sumulat sa mga Kasulatan na kung saan ang kanilang mga isinulat ay ang mismong Salita ng Diyos. Sa konteksto ng Kasulatan, ang ibig sabihin ng inspirasyon ay “hininga ng Diyos.” Ang pagiging inspirado ng Bibliya ay nagpapahiwatig lamang sa atin ng katotohanan na ang Kasulatan ay totoong salita ng Diyos, at ito ang dahilan kung bakit ang Bibliya ay kakaiba sa lahat ng mga libro.

Habang mayroong iba’t-ibang pananaw sa kung hanggang saan ang paggiging inspirado ng Bibliya, walang pag-aalinlangang ang Bibliya mismo ang umaangking ang lahat ng mga salita, at ang lahat ng parte ng Bibliya ay inspirado ng Diyos (1 Corinto 2:12-13; 2 Timoteo 3:16-17). Ang ganitong pananaw sa Kasulatan ay malimit iniuukol sa inspirasyong “verbal plenary.” Ibig sabihin nito ang pagiging inspirado ay umaabot mismo sa bawat salita, at hindi lang sa mga konsepto o ideya; at ang pagiging inspirado ng Bibliya ay sumasaklaw sa lahat ng parte ng Kasulatan at sa lahat ng paksa sa Bibliya. Mayroong ilang taong naniniwala na tanging parte lamang ng Bibliya ang inspirado, o tanging ang mga diwa at konsepto lamang na may kinalaman sa relihiyon ang inspirado, subalit ang ganitong mga pananaw ng inspirasyon ay hindi umabot sa inaangkin mismo ng Bibliya. Ang kabuuang inspirasyong “verbal plenary” ay kinakailangan sa katangian ng Salita ng Diyos.

Ang laki ng nasasakop ng pagiging inspirado ng Bibliya ay malinaw na makikita sa aklat ng 2 Timothy 3: 16, “Ang lahat ng mga kasulatan na kinasihan ng Diyos ay mapapakinabangan din naman sa pagtuturo, sa pagsansala, sa pagsaway, sa ikatututo na nasa katuwiran” Sinasabi sa atin ng talatang ito na inspirado ng Diyos ang kabuuan ng Kasulatan at makakatulong ito sa atin. Hindi lamang ang mga parte ng Bibliya na tumutukoy sa mga relihiyosong doktrina ang inspirado, sa halip bawat parte simula aklat ng Genesis hanggang aklat ng Pahayag ay eksaktong Salita ng Diyos. Dahil ito ay inspirado ng Diyos, samakatuwid ang Kasulatan ay may otoridad pagdating sa pagtatatag ng mga doktrina, at sapat na sa pagtuturo sa sangkatauhan kung papaano magkakaroon ng tamang relasyon sa Diyos. Hindi lamang inaangkin ng Bibliyang ito ay inspirado ng Diyos, inaangkin din nito na mayroon itong kakayahang bumago at kumumpleto sa atin, upang maging handa tayo sa paggawa ng mabuti.

Ang isa pang talata na tumutukoy sa pagiging inspirado ng Bibliya ay ang 2 Pedro 1:21. sinasabi sa atin ng talatang ito na “Ito ay sapagkat ang mga pahayag ay hindi dumating sa pamamagitan ng kalooban ng tao ngunit nagsalita ang mga banal na tao ng Diyos nang sila ay ginabayan ng Banal na Espiritu.” Tinutulungan tayo ng talatang ito na maunawaan na kahit na mga tao ang sumulat ng Bibliya, ang mga salitang kanilang isinulat ay ang mga mismong Salita ng Diyos. Kahit na ginamit ng Diyos ang mga tao na may kanya-kanyang personalidad at paraan ng pagsulat, inspirado ng Diyos ang bawat salitang kanilang isinulat. Kinumpirma mismo ni Hesus ang inspirasyong “verbal plenary” ng Kasulatan noong sinabi Niyang, “Huwag ninyong isiping ako'y naparito upang sirain ang kautusan o ang mga propeta: ako'y naparito hindi upang sirain, kundi upang ganapin.vSapagka't katotohanang sinasabi Ko sa inyo, Hanggang sa mangawala ang langit at ang lupa, ang isang tuldok o isang kudlit, sa anumang paraan ay hindi mawawala sa kautusan, hanggang sa maganap ang lahat ng mga bagay.” (Mateo 5:17-18). Sa talatang ito, pinapalakas pa ni Hesus ang pagiging tama ng Kasulatan hanggang sa pinakamaliit na detalye nito-sapagkat ito mismo ang Salita ng Diyos.

Dahil ang Kasulatan ay inspiradong Salita ng Diyos, masasabi natin na ang Bibliya ay walang pagkakamali at may otoridad. Ang tamang pananaw sa Diyos ay magdadala sa tamang pananaw sa Kanyang Salita. Dahil ang Diyos ang pinakamakapangyarihan, nakakaalam ng lahat, at perpekto, ang Kanyang mga Salita ay mayroong kahalintulad na mga katangian. Walang pag-aalinlangang ang Bibliya ay tama sa inaangkin nito-na hindi maipagkakaila, may otoridad, na Salita ng Diyos para sa sangkatauhan.

Balik sa Tagalog Home Page