Ano ba ang itinuturo ng Bibliya tungkol sa Trinity?

Tanong: "Ano ba ang itinuturo ng Bibliya tungkol sa Trinity?"

Sagot: Ang pinakamahirap na bagay sa konseptong Kristiyano ng Trinity ay walang sapat na paraan upang lubusang maipaliwanag ito. Ang Trinity ay isang konsepto na napakaimposible para sa isang tao na munawaan ito ng lubos. Ang Diyos ay walang katapusang mas dakila at kahanga-hanga kumpara sa atin, samakatuwid, hindi tayo dapat umasang maunawaan natin Siya ng lubusan. Itinuturo ng Bibliya na ang Ama ay Diyos, na si Hesus ay Diyos, at ang Banal na Espiritu ay Diyos. Itinuturo din ng Bibliya ng mayroon lamang iisang Diyos. Bagaman nauunawaan natin ang ilang katotohanang patungkol sa relasyon ng iba’t-ibang katauhan ng Trinity sa bawat isa, sa kahuli-hulihan, hindi ito kayang maunawaan ng pantaong kaisipan. Subalit hindi ito nangangahulugang hindi ito totoo o hindi ito nakabase sa itinuturo ng bibliya.

Palaging isa-isip na kung nag-aaral ka ng ganitong paksa, ang salitang “Trinity” ay hindi ginamit sa Kasulatan. Ito ay salitang ginamit sa tangkang isalarawan ang Diyos, ang katotohanang mayroong tatlong nabubuhay, kapwa walang hanggang mga katauhan na bumubuo sa Diyos. Unawain na HINDI ito sa anumang paraan nagmumungkahi ng mayroong tatlong Diyos. Ang Trinity ay isa na binubuo ng tatlong katauhan. Walang mali sa paggamit ng salitang “Trinity” kaysa sa “tatlong nabubuhay, kapwa walang hanggang mga katauhan na bumubuo sa iisang Diyos.” Kung ito’y nagdudulot ng problema sa iyo, ikunsidera ito: ang salitang lolo ay hindi ginamit sa Biblya. Sa kabila noon, alam nating mayroong mga lolo sa Bibliya. Si Abraham ay ang lolo ni Jacob. Kaya’t huwag kang maguluhan sa sa salitang “Trinity”. Ang mas mahalaga ay ang konsepto na kumakatawan sa salitang “Trinity” ay umiiral o nabubuhay sa Kasulatan. Dahil ang panimula ay naisantabi na, magbibigay ng mga talata sa Bibliya sa pag-uusap ng paksang Trinity.

1) Mayroong iisang Diyos: Deuteronomio 6: 4; 1 Corinto 8: 4; Galacia 3: 20; 1 Timoteo 2: 5.

2) Ang Trinity ay binubuo ng tatlong katauhan: Genesis 1: 1; 1: 26; 3: 22; 11: 7; Isaias 6: 8; 48: 16; 61: 1; Mateo 3: 16-17; Mateo 28: 19; 2 Corinto 13: 14. Sa mga talata sa Lumang Tipan, ang kaalaman ng Hebreo ay makakatulong. Sa Genesis 1: 1, ang maramihang pangalang “Elohim” ay ginamit. Sa Genesis 1: 26; 3: 22; 11: 7 at Isaias 6: 8, ang maramihang panghalip na “Amin” ay ginamit. Hindi na maitatanong na ang “Elohim” at “Amin” ay tumutukoy sa higit pa sa dalawa. Sa wikang ingles, mayroon lang dalawang anyo, isahan at maramihan. Sa Hebreo, mayroong tatlong anyo: isahan, dalawahan, at maramihan. Ang dalawahan ay tanging para sa dalawa lamang. Sa Hebreo, ang dalawahang anyo ay ginagamit sa mga bagay na magkapares kagaya ng mga mata, at mga kamay. Ang salitang “Elohim” at ang panghalip na “Amin” ay nasa anyong maramihan – tiyak na higit pa sa dalawa – at nararapat lamang na tumutukoy sa tatlo o mas higit pa (Ama, Anak, Banal na Espiritu).

Sa aklat ng Isaias 48: 16 at 61: 1, ang Anak ay nagsasalita habang tinutukoy ang Ama at ang Banal na Espiritu. Ikumpara ang Isaias 61: 1 sa Lucas 4: 14-19 para makitang ang Anak ang nagsasalita. Inilalarawan ng Mateo 3: 16-17 ang pangyayaring binautismuhan si Hesus. Nakikita sa ganitong pangyayari ang Banal na Espiritung Diyos na bumaba sa Diyos Anak habang iprinoklama naman ng Diyos Ama ang kanyang kasiyahan sa Anak. Ang Mateo 28: 19 at 2 Corinto 13: 14 ay halimbawa ng tatlong magka-ibang katauhan ng Trinity.

3) Kinilala ang bawat miyembro ng Trinity sa iba’t-ibang talata sa Bibliya: sa Lumang Tipan, “PANGINOON” ay bukodtangi sa “Panginoon” (Genesis 19: 24; Hosea 1:4). Ang “PANGINOON” ay may “Anak” (Awit 2: 7, 12; Kawikaan 30: 2-4). Ang Espiritu ay bukodtanging mula sa “PANGINOON” (Mga Bilang 27: 18) at mula sa “Diyos” (Awit 51: 10-12). Ang Diyos Anak ay binukodtangi mula sa Diyos Ama (Awit 45:6-7; Hebreo 1: 8-9). Sa Bagong Tipan, sa aklat ng Juan 14: 16-17 kung saan sinabi ni Hesus sa Ama ang tungkol sa pagpapadala ng Katulong, ang Banal na Espiritu. Ito’y nagpapakita na hindi kinukonsidera ni Hesus ang Kanyang sarili na Ama o bilang Banal na Espiritu. Dapat ding ikunsidera ang ilang mga pagkakataon sa Ebanghelyo na kung saan nakikipag-usap si Hesus sa Ama. Siya ba ay nakikipag-usap sa kanyang sarili? Hindi. Nakipag-usap Siya sa isa pang katauhan sa Trinity – ang Ama.

4) Ang bawat miyembro ng Trinity ay Diyos: Ang Ama ay Diyos: Juan 6: 27; Roma 1: 7; 1 Pedro 1: 2. Ang Anak ay Diyos: Juan 1: 1, 14; Roma 9: 5; Colossas 2: 9; Hebreo 1: 8; 1 Juan 5: 20. Ang Banal na Espiritu ay Diyos: Mga Gawa 5: 3-4; 1 Corinto 3: 16 (ang namamahay sa atin ay ang Banal na Espiritu-Roma 8: 9; Juan 14: 16-17; Mga Gawa 2: 1-4).

5) Ang posisyon sa loob ng Trinity: Ipinapakita ng Kasulatan na ang Banal na Espiritu ay mas nakapailalim sa Ama at sa Anak, at ang Anak ay nakapailalim sa Ama. Ito ay panloob na relasyon, at hindi ipinagkakaila ang pagka-Diyos ng alinmang katauhan sa Trinity. Ito ay isang lugar na kung saan hindi na kayang unawain ng limitado nating pag-iisip ang kawalang-hanggang Diyos. Tungkol sa Anak tingnan ang: Lucas 22: 42; Juan 5: 36; Juan 20: 21; 1 Juan 4: 14. tungkol sa Banal na Espiritu tingnan ang: Juan 14: 16; 14: 26; 15: 26; 16: 7 at lalong lalo na ang Juan 16: 13-14.

6) Ang gawain ng bawat miyembro ng Trinity: Ang ama ang kahuli-hulihang pinanggagalingan o sanhi ng: 1) Sanlibutan (1 Corinto 8: 6; Pahayag 4: 11); 2) banal na Pahayag (Pahayag 1:1); 3) Kaligtasan (Juan 3: 16-17); at 4) Gawaing pantao ni Hesus (Juan 5: 17; 14: 10). Ang Ama ang nagpasimula nglahat ng bagay na ito.

Ang Anak ang kinatawan kung saan ginagawa ng Ama ang mga sumusunod na gawain: 1) ang paglalang at paggpapanatili ng sanlibutan (1 Corinto 8: 6; Juan 1: 3; Colossas 1: 16-17); 2) Banal na Pahayag (Juan 1: 1; Mateo 11: 27; Juan 16: 12-15; Pahayag 1: 1); Kaligtasan (2 Corinto 5: 19; Mateo 1: 21; Juan 4: 42). Ginawa lahat ito ng Ama sa pamamagitan ng Anak, na gumaganap bilang kanyang kinatawan.

Ang Banal na Espiritu ay ang paraan na kung saan ginagawa ng Ama ang mga sumusunod na gawain: 1) ang paglalang at pagpapanatili ng sanlibutan (Genesis 1: 2; Job 26: 13; Awit 104: 30); 2) Banal na Pahayag (Juan 16: 12-15; Efeso 3: 5; 2 Pedro 1: 21); 3) kaligtasan (Juan 3: 6; Titus 3: 5; 1 Pedro 1: 2); at 4) Mga Gawa ni Hesus (Isaias 61: 1; Mga Gawa 10: 38). Ang Ama ang may gawa ng lahat ng bagay na ito sa pamamagitan ng kapangyarihan ng Banal na espiritu.

Wala sa tanyag na mga halimbawa ang ganap at eksaktong paglalarawan sa “Trinity”. Ang Ama, Anak at Banal na Espiritu ay hindi parte ng Diyos, bawat isa sa Kanila ay Diyos. Ang paglalarawan sa tubig ay mas mainam subalit nabigo pa rin itong ipaliwanag ang “Trinity”. Ang likido, singaw, at yelo ay anyo ng tubig. Ang Ama, Anak at banal na Espiritu ay hindi anyo lang ng Diyos, ang bawat isa sa Kanila ay Diyos. Samakatuwid, habang ang ganitong paglalarawan ay magbibigay sa atin ng larawan ng Trinity, ang nasabing larawan ay hindi lahat wastong-wasto. Ang walang hanggang Diyos ay hindi kayang ipaliwanag ng limitadong paglalarawan. Sa halip na ituon ang pansin sa Trinity, sikaping ituon ang pansin sa Kadakilaan at kawalang hanggang kaluwalhatian ng Diyos. “Napakasagana ng kayamanan ng Diyos! Di matarok ang kayamanan, karunungan at kaalaman ng Diyos! Hindi malirip ang Kanyang mga panukala at pamamaraan! Gaya ng nasusulat: Sapagka’t sino ang nakakaalam sa pag-iisip ng Panginoon, O sino ang naging tagapayo Niya?” (Roma 11: 33-34).

Balik sa Tagalog Home Page