Sino ang Banal na Espiritu?

Tanong: "Sino ang Banal na Espiritu?"

Sagot: Maraming hindi tamang pagkaka-intindi sa pagkakakilanlan ng Banal na Espiritu. Ang ilan ay tinitingnan ang Banal na Espiritu bilang isang misteryosong lakas. Ang iba naman ay naniniwalang ang Banal na Espiritu ay hindi personal na kapangyarihan ng Diyos na ibinigay Niya sa mga tagasunod ni Kristo. Ano ba ang sinasabi ng Bibliya tungkol sa Banal na Espiritu? Sinasabi ng Bibliya na ang Banal na Espiritu ay Diyos. Sinasabi din ng Bibliya na ang Banal na Espiritu ay isang katauhan na may pag-iisip, damdamin at kalooban.

Ang katotohanang ang Banal na Espiritu ay Diyos ay malinaw na makikita sa maraming talata ng Bibliya kasali na ang Mga Gawa 5:3-4. Sa talatang ito kinompronta ni Pedro si Ananias at tinanong kung bakit siya nagsinungaling sa Banal na Espiritu at sinabi rin niyang “Hindi lang siya nagsinungaling sa tao kundi pati na sa Diyos.” Ito’y isang malinaw na deklarasyon na ang pagsisinungaling sa Banal na Espiritu ay pagsisinungaling din sa Diyos. Malalaman din natin na ang Banal na Espiritu ay Diyos dahil mayroon din itong mga katangian at karakter ng Diyos. Kagaya halimbawa ng katotohanang ang banal na Espiritu ay naroon anumang lugar at oras at ito ay makikita sa Awit 139:7-8 “Saan man ako magpupunta, upang ako’y makatakas? Sa banal Mong Espiritu’y hindi ako makaiwas. Kung langit ang puntahan ko, pihong Ikaw ay naroroon, sa sheol ay naroon ka kung do’n ako manganganlong.” Sa 1 Corinto 2:10 makikita rin natin ang katangian na alam lahat ng Banal na Espiritu. “ Subalit ito’y inihayag ng Diyos sa atin sa pamamagitan ng Espiritu. Nasasaliksik ng Espirito ang lahat ng bagay, maging ang pinakamalalim na panukala ng Diyos. Walang nakakaalam sa iniisip ng tao maliban sa kanyang sariling espiritu. Gayon din naman, walang nakakaalam sa mga iniisip ng Diyos kundi ang Espiritu ng Diyos.”

Malalaman natin na ang Banal na Espiritu ay isa ring katauhan dahil mayroon Siyang pag-iisip, damdamin at kalooban. Ang Banal na Espiritu ay nag-iisip at nakakaalam (1 Corinto 2:10). Ang Banal na Espiritu ay nagdadalamhati (Efeso 4:30). Ang Espiritu ay nananalangin para sa atin (Roma 8:26-27). Ang Banal na Espiritu ay gumagawa ng desisyon na naaayon sa kanyang kalooban (1 Corinto 12:7-11). Ang Banal na Espiritu ay Diyos, ang pangatlong katauhan sa Trinidad. Bilang Diyos, kayang gampanan ng Banal na Espiritu ang tungkulin bilang taga-alaga at tagapayo na ipinangako naman ni Hesus na gagawin Niya sa atin (Juan 14: 16, 26; 15: 26).

Balik sa Tagalog Home Page