Ano ba ang sinasabi ng Bibliya tungkol sa pag-inom ng alak? Kasalanan ba para sa isang Kristiyano ang uminom ng alak?

Tanong: "Ano ba ang sinasabi ng Bibliya tungkol sa pag-inom ng alak? Kasalanan ba para sa isang Kristiyano ang uminom ng alak?"

Sagot: Hinihikayat ng ilang mga talata sa Bibliya ang mga tao na lumayo o umiwas sa pag-inom ng alak (Levitico 10: 9; Mga Bilang 6: 3; Deuteronomio 14: 26; 29: 6; Mga Hukom 13: 4, 7, 14; 1 Samuel 1: 15; Mga Kawikaan 20: 1; 31: 4, 6; Isaias 5: 11, 22; 24: 9; 28: 7; 29: 9; 56: 12; Mikas 2: 11; Lucas 1: 15). Gayon man, hindi kinakailangang pagbawalan ang isang Kristiyano na uminom ng serbesa, alak, o ano pa mang uri ng inumin na may alkohol. Ang mga Krisitiyano ay inuutusang umiwas sa pagpapakalasing o pagpapakalango sa alak (Efeso 5: 18). Hinahatulan ng Bibliya ang pagpapakalasing at ang epekto nito (Mga Kawikaan 23: 29-35). Inuutusan din ang mga Kristiyano na huwag pahintulutang mapamunuan ng kung ano pa man ang kanilang mga katawan (1 Corinto 6: 12; 2 Pedro 2: 19). Pinagbawalan din ng Bibliya ang isang Kristiyano na gumawa ng isang bagay na maaaring magpagalit o magtulak sa isa pang Kristiyano na magkasala laban sa kanilang konsensiya (1 Corinto 8: 9-13). Dahil sa ganitong mga prinsipyo, napakahirap para sa isang Kristiyano na sabihing umiinom siya ng alak o alkohol para sa kaluwalhatian ng Diyos (1 Corinto 10: 31). Ginawa ni Hesus ang tubig na maging alak. Tila uminom pa ng alak si Hesus sa ilang okasyon (Juan 2:1-11; Mateo 26: 29).

Sa panahon ng Bagong Tipan, ang tubig ay hindi ganoon kalinis. Kung walang modernong panlinis, ang tubig ay punong-puno ng mga bakterya at ibat-ibang klase ng mga mikrobyo na nakakakontamina sa tubig. Ito’y totoo sa mga bansang kinukonsiderang napapabilang sa mga tinatawag na ikatlong daigdig o mga mahihirap na bansa sa ngayon. Bilang resulta, umiinom palagi ang mga tao ng alak (o inuming mula sa ubas) sapagkat malaki ang posibilidad na hindi ito kontaminado. Sa 1 Timoteo 5: 23, tinuruan ni Pablo si Timoteo na tumigil na sa pag-inom ng tubig (na maaring dahilan ng kanyang problema sa tiyan) at sa halip uminom ng alak. Noong araw, ang mga alak ay ginagawa na hindi sing-antas ng paggawa ng alak sa kasalukuyan. Hindi rin tamang sabihin na ito’y katas lamang ng ubas na ginawang pampalamig, subalit mali ring sabihin na katulad lang ito ng mga alak na ginagamit natin sa panahong ito. Muli, hindi kinakailangang pagbawalan ang isang Kristiyano na uminom ng serbesa, alak o ano pa mang inumin na may alkohol. Ang alkohol ay hindi likas na may bahid ng kasalanan. Ang paglalasing at pagpapakalango sa alak at adiksyon sa alkohol ang dapat iwasan ng isang Kristiyano (Efeso 5: 18; 1 Corinto 6: 12). Mayroong mga prinsipyo sa Bibliya, na dahil dito napakahirap pangatwiranan na ang isang Kristiyano na umiinom na alak gaano man ka-konti o karami ay nakalulugod sa Diyos.

Balik sa Tagalog Home Page