ମଣ୍ଡଳୀ କ'ଣ?



ପ୍ରଶ୍ନ: ମଣ୍ଡଳୀ କ'ଣ?

ଉତ୍ତର:
ଆଜିକାଲି ଅନେକ ଲୋକ ମଣ୍ଡଳୀ କହିଲେ ଉପାସନା ଗୃହକୁ ବୁଝିଥାନ୍ତି | ଏହା ମଣ୍ଡଳୀର ବାଇବଲ ସମ୍ମତ ବୁଝାମଣା ନୁହେଁ | "ମଣ୍ଡଳୀ" ଶବ୍ଦଟି ଗ୍ରୀକ୍ ଶବ୍ଦ ekklesia (ଏକ୍ଲେସିଆ)ରୁ ଆସିଛି ଯାହା "ଏକ ସମାଗମ" କିମ୍ବା "ଆହ୍ବାନପ୍ରାପ୍ତ ହୋଇ ବାହାରି ଆସିଥିବା ଲୋକମାନେ" ବୋଲି ବୁଝାଏ | "ମଣ୍ଡଳୀ"ର ମୂଳ ଅର୍ଥ ପକ୍କା ଘର ନୁହେଁ, କିନ୍ତୁ ଏହା ଲୋକମାନେ | ଏକ ବ୍ୟଙ୍ଗାତ୍ମକ ବିଷୟ ହେଉଛି ଆପଣ ଯେତେବେଳେ ଲୋକମାନଙ୍କୁ ପଚାରନ୍ତି ଯେ ସେମାନେ କେଉଁ ମଣ୍ଡଳୀରେ ଯୋଗ ଦେଉଛନ୍ତି, ସେତେବେଳେ ସେମାନେ ଏକ ଗୃହକୁ ଚିହ୍ନିତ କରିଥାନ୍ତି | ରୋମୀୟ ୧୬:୫ କୁହେ, "...ସେମାନଙ୍କ ଗୃହରେ ଥିବା ମଣ୍ଡଳୀକି ନମସ୍କାର ଜଣାଅ..." ପାଉଲ ସେମାନଙ୍କ ଗୃହରେ ଥିବା ମଣ୍ଡଳୀକୁ ଉଲ୍ଲେଖ କରିଛନ୍ତି - ସେ ଏକ ମଣ୍ଡଳୀ ଉପାସନା ଗୃହକୁ ଉଲ୍ଲେଖ କରିନାହାନ୍ତି, କିନ୍ତୁ ବିଶ୍ବାସୀମାନଙ୍କର ଏକ ସମାଗମକୁ ଉଲ୍ଲେଖ କରିଛନ୍ତି |

ମଣ୍ଡଳୀ ହେଉଛି ଖ୍ରୀଷ୍ଟଙ୍କ ଶରୀର, ଯାହାର ମସ୍ତକ ହେଉଛନ୍ତି ସେ (ଖ୍ରୀଷ୍ଟ) | ଏଫିସୀୟ ୧:୨୨-୨୩ କୁହେ, "ଆଉ ସମସ୍ତ ବିଷୟ ତାହାଙ୍କ ପାଦତଳେ ବଶୀଭୂତ କରି ରଖି ତାହାଙ୍କୁ ସର୍ବ ବିଷୟର ମସ୍ତକସ୍ବରୂପେ ମଣ୍ଡଳୀକୁ ଦାନ କଲେ; ସେହି ମଣ୍ଡଳୀ ତାହାଙ୍କ ଶରୀର ସ୍ବରୂପ, ଅର୍ଥାତ୍ ଯେ ସମସ୍ତ ବିଷୟକୁ ସର୍ବୋତଭାବରେ ପୂର୍ଣ୍ଣ କରନ୍ତି, ତାହାଙ୍କର ପୂର୍ଣ୍ଣତା |" ଖ୍ରୀଷ୍ଟଙ୍କ ଶରୀର ପେଣ୍ଟିକଷ୍ଟ ଦିବସରୁ ଆଗମନ ପର୍ଯ୍ୟନ୍ତ ଯୀଶୁଖ୍ରୀଷ୍ଟଙ୍କଠାରେ ଥିବା ସମସ୍ତ ବିଶ୍ବାସୀଙ୍କୁ ନେଇ ଗଠିତ (ପ୍ରେରିତ ୨ ଅଧ୍ୟାୟ) | ଖ୍ରୀଷ୍ଟଙ୍କ ଶରୀର ଦୁଇଗୋଟି ଦୃଷ୍ଟିକୋଣର ସମ୍ମିଶ୍ରଣ:

୧) ସାର୍ବଜନୀନ ମଣ୍ଡଳୀ ସେହି ସମସ୍ତଙ୍କୁ ନେଇ ଗଠିତ ଯେଉଁମାନେ ଯୀଶୁଖ୍ରୀଷ୍ଟଙ୍କ ସହ ବ୍ୟକ୍ତିଗତ ସମ୍ପର୍କ ସ୍ଥାପନ କରିଛନ୍ତି | "ଯେଣୁ ଆମ୍ଭେମାନେ ଯିହୂଦୀ ହେଉ ବା ଗ୍ରୀକ୍ ହେଉ, ଦାସ ହେଉ ବା ସ୍ବାଧୀନ ହେଉ, ସମସ୍ତେ ତ ଏକ ଆତ୍ମାଙ୍କ ଦ୍ବାର ଏକ ଶରୀର ହେବା ଉଦ୍ଦେଶ୍ୟରେ ବାପ୍ତିଜିତ ହୋଇଅଛୁ, ଆଉ ସମସ୍ତେ ଏକ ଆତ୍ମାରୁ ପାନ କରିଅଛୁଁ |" (୧କରିନ୍ଥୀୟ ୧୨:୧୩) ଏହି ପଦଟି କୁହେ ଯେ ଯେଉଁମାନେ ବିଶ୍ବାସ କରନ୍ତି ସେମାନେ ଖ୍ରୀଷ୍ଟଙ୍କ ଶରୀରର ଏକ ଅଂଶ ଏବଂ ଏକ ପ୍ରମାଣ ଭାବରେ ଖ୍ରୀଷ୍ଟଙ୍କ ଆତ୍ମା ପ୍ରାପ୍ତ ହୋଇଅଛନ୍ତି | ସାର୍ବଜନୀନ ଈଶ୍ବରଙ୍କ ମଣ୍ଡଳୀ ହେଉଛନ୍ତି ସେମାନେ ଯେଉଁମାନେ କି ଯୀଶୁଖ୍ରୀଷ୍ଟଙ୍କଠାରେ ବିଶ୍ବାସ କରିବା ଦ୍ବାରା ପରିତ୍ରାଣ ପ୍ରାପ୍ତ ହୋଇଅଛନ୍ତି |

୨) ସ୍ଥାନୀୟ ମଣ୍ଡଳୀ ଗାଲାତୀୟ ୧:୧-୨ରେ ବର୍ଣ୍ଣିତ ହୋଇଛି: "...ପାଉଲ, ଜଣେ ପ୍ରେରିତ...ମୋହର ସାଙ୍ଗରେ ଥିବା ଭାଇମାନେ ଗାଲାତୀୟ ମଣ୍ଡଳୀ ସମୂହକୁ ଲେଖୁଅଛୁ |" ଏଠାରେ ଆମେ ଦେଖୁ ଯେ, ଗାଲାତୀୟ ପ୍ରଦେଶରେ ଅନେକ ମଣ୍ଡଳୀ ଥିଲା ଯେଉଁ ଗୁଡିକୁ ଆମେ ସ୍ଥାନୀୟ ମଣ୍ଡଳୀ କହୁ | ଏକ ବାପଟିଷ୍ଟ ମଣ୍ଡଳୀ, ଲୁଥେରାନ୍ ମଣ୍ଡଳୀ, କ୍ୟାଥୋଲିକ୍ ମଣ୍ଡଳୀ ଇତ୍ୟାଦି ମଣ୍ଡଳୀ ନୁହେଁ, ଯେପରି ସାର୍ବଜନୀନ ମଣ୍ଡଳୀରେ - ବରଂ ଏହା ଏକ ସ୍ଥାନୀୟ ମଣ୍ଡଳୀ ଯାହା ବିଶ୍ବାସୀମାନଙ୍କର ସ୍ଥାନୀୟ ସମାଗମ | ସାର୍ବଜନୀନ ମଣ୍ଡଳୀ ସେହି ମାନଙ୍କୁ ନେଇ ଗଠିତ ଯେଉଁମାନେ କି ଖ୍ରୀଷ୍ଟଙ୍କର ଅଟନ୍ତି ଏବଂ ତାହାଙ୍କୁ ପରିତ୍ରାଣ ନିମନ୍ତେ ଭରସା କରିଅଛନ୍ତି | ସାର୍ବଜନୀନ ମଣ୍ଡଳୀର ଏହି ସଭ୍ୟଗଣ ସ୍ଥାନୀୟ ଏକ ମଣ୍ଡଳୀରେ ସହଭାଗୀତା ଏବଂ ନିଷ୍ଠା ଜନ୍ମାଇବାର ଅନ୍ବେଷଣ କରିବା ଉଚିତ୍ |

ସାରାଂଶରେ, ମଣ୍ଡଳୀ ଏକ ଉପାସନା ଗୃହ କିମ୍ବା ଏକ ଅନୁଷ୍ଠାନ ନୁହେଁ | ବାଇବଲ ଅନୁଯାୟୀ, ମଣ୍ଡଳୀ ହେଉଛି ଖ୍ରୀଷ୍ଟଙ୍କର ଶରୀର ଯେଉଁମାନେ କି ପରିତ୍ରାଣ ନିମନ୍ତେ ଯୀଶୁଖ୍ରୀଷ୍ଟଙ୍କଠାରେ ସେମାନଙ୍କ ବିଶ୍ବାସକୁ ସ୍ଥାପନ କରିଛନ୍ତି (ଯୋହନ ୩:୧୬; ୧କରିନ୍ଥୀୟ ୧୨:୧୩) | ସ୍ଥାନୀୟ ମଣ୍ଡଳୀଗୁଡିକ ହେଉଛି ସାର୍ବଜନୀନ ମଣ୍ଡଳୀର ସଭ୍ୟମାନଙ୍କ ସମାଗମ | ସ୍ଥାନୀୟ ମଣ୍ଡଳି ହେଉଛି ତାହା ଯେଉଁଠି ୧କରିନ୍ଥୀୟ ୧୨ ଅଧ୍ୟାୟରେ ଥିବା "ଶରୀର" ନୀତିନିୟମକୁ ସାର୍ବଜନୀନ ମଣ୍ଡଳୀର ସଭ୍ୟଗଣ ପୂର୍ଣ୍ଣ ଭାବେ ପ୍ରୟୋଗ କରିପାରିବେ: ଉତ୍ସାହ ଦେବା, ଶିକ୍ଷା ଦେବା, ଏବଂ ପ୍ରଭୁ ଯୀଶୁଖ୍ରୀଷ୍ଟଙ୍କ ଜ୍ଞାନ ଓ ଅନୁଗ୍ରହରେ ପରସ୍ପରକୁ ଗଢିତୋଳିବା |



ଓଡିଆ ହୋମ୍ ପେଜକୁ ପ୍ରତ୍ୟାବର୍ତ୍ତନ କରନ୍ତୁ



ମଣ୍ଡଳୀ କ'ଣ?