ପରିତ୍ରାଣର ରୋମୀୟ ସଡକ କଅଣ?


ପ୍ରଶ୍ନ: ପରିତ୍ରାଣର ରୋମୀୟ ସଡକ କଅଣ?

ଉତ୍ତର:
ରୋମୀୟ ପୁସ୍ତକର ପଦଗୁଡିକୁ ବ୍ୟବହାର କରି ପରିତ୍ରାଣର ସୁସମାଚାରକୁ ଜଣାଇବାର କୌଶଳକୁ ପରିତ୍ରାଣର ରୋମୀୟ ସଡକ କୁହାଯାଏ । ଏହା ଏକ ସରଳ, ତଥାପି ଏକ ଶକ୍ତିଶାଳୀ ପଦ୍ଧତି, ଏହା ବର୍ଣ୍ଣନା କରେ ଯେ ଆମେ କାହିଁକି ପରିତ୍ରାଣ ଆବଶ୍ୟକ କରୁ? ଈଶ୍ବର କିପରି ପରିତ୍ରାଣ ଯୋଗାଇଲେ? ଆମେ କିପରି ପରିତ୍ରାଣ ପାଇପାରିବା? ଏବଂ ପରିତ୍ରାଣର ପରିଣାମ କଅଣ?

ପରିତ୍ରାଣର ରୋମୀୟ ସଡକର ପ୍ରଥମ ବାଇବଲ ପଦ ହେଉଛି ରୋମୀୟ ୩:୨୩, “ସମସ୍ତେ ତ ପାପ କରିଅଛନ୍ତି, ପୁଣି ଈଶ୍ବରଙ୍କ ଗୌରଵରହିତ ହୋଇଅଛନ୍ତି” । ଆମେ ସମସ୍ତେ ପାପ କରିଅଛୁ । ଆମେ ଏପରି ବିଷୟ କରିଅଛୁ ଯାହା ଈଶ୍ବରଙ୍କ ଅସନ୍ତୋଷର କାରଣ ଅଟେ । ଆମ ଜୀବନରେ ପାପ କିପରି ଦେଖାଯାଏ, ରୋମୀୟ ୩:୧୦-୧୮ ସେହି ବିଷୟରେ ବର୍ଣ୍ଣନା କରେ । ପରିତ୍ରାଣର ରୋମୀୟ ସଡକର ଦ୍ବିତୟ ବାଇବଲ ପଦ ହେଉଛି, ରୋମୀୟ ୬:୨୩, ଯାହାକି ଆମକୁ ପାପର ପରିଣାମ ସମ୍ପର୍କରେ ଶିକ୍ଷା ଦିଏ- “ପାପର ବେତନ ହେଉଛି’ ମୃତ୍ୟୁ” । ଆମ ପାପର ଦଣ୍ଡ ହେଉଛି ମୃତ୍ୟୁ । ଏହା କେବଳ ଶାରୀରିକ ମୃତ୍ୟୁକୁ ନୁହେଁ, କିନ୍ତୁ ଅନନ୍ତକାଳୀନ ମୃତ୍ୟୁକୁ ସୂଚାଏ ।

ପରିତ୍ରାଣର ରୋମୀୟ ସଡକର ତୃତୀୟ ବାଇବଲ ପଦ ହେଉଛି, ରୋମୀୟ ୬:୨୩ର ଦ୍ବିତୀୟ ଭାଗ, “କିନ୍ତୁ ଈଶ୍ବରଙ୍କ ଅନୁଗ୍ରହଦାନ ଆମ୍ଭମାନଙ୍କ ପ୍ରଭୁ ଯୀଶୁ ଖ୍ରୀଷ୍ଟଙ୍କ ସହଭାଗିତାରେ ଅନନ୍ତ ଜୀବନ ଅଟେ” । ରୋମୀୟ ୫:୮ ଘୋଷଣା କରେ ଯେ, “କିନ୍ତୁ ଆମ୍ଭେମାନେ ପାପୀ ଥିବା ସମୟରେ ସୁଦ୍ଧା ଖ୍ରୀଷ୍ଟ ଯେ ଆମ୍ଭମାନଙ୍କ ନିମନ୍ତେ ମୃତ୍ୟୁଭୋଗ କଲେ, ସେଥିରେ ଈଶ୍ବର ଆମ୍ଭମାନଙ୍କ ପ୍ରତି ଆପଣା ପ୍ରେମ ସପ୍ରମାଣ କରୁଅଛନ୍ତି”, ଯୀଶୁ ଆମ ପାଇଁ ମୃତ୍ୟୁଭୋଗ କଲେ! ଯୀଶୁଙ୍କ ମୃତ୍ୟୁ ଆମ ପାପର ମୂଲ୍ୟକୁ ପରିଶୋଧ କଲା । ଯୀଶୁଙ୍କ ପୁନରୁଥାନ ପ୍ରମାଣ କରେ ଯେ, ଈଶ୍ବର, ଯୀଶୁ ଖ୍ରୀଷ୍ଟଙ୍କ ମୃତ୍ୟୁକୁ ଆମ ପାପର ମୂଲ୍ୟ ପରିଶୋଧ ରୂପରେ ଗ୍ରହଣ କଲେ ।

ପରିତ୍ରାଣର ରୋମୀୟ ସଡକର ଚତୁର୍ଥ ପଦ ହେଉଛି ରୋମୀୟ ୧୦:୯, “ଯେଣୁ ତୁମେ ଯଦି ମୁଖରେ ଯୀଶୁଙ୍କୁ ପ୍ରଭୁ ବୋଲି ସ୍ବୀକାର କରିବ, ଆଉ ଈଶ୍ବର ତାହାଙ୍କୁ ମୃତମାନଙ୍କ ମଧ୍ୟରୁ ଉଠାଇଅଛନ୍ତି ବୋଲି ହୃଦୟରେ ବିଶ୍ବାସ କରିବା, ତେବେ ପରିତ୍ରାଣ ପ୍ରାପ୍ତ ହେବ” । କାରଣ ଯୀଶୁ ଆମ ସ୍ଥାନରେ ମୃତ୍ୟୁଭୋଗ କଲେ, ଆମକୁ କେବଳ ତାହାଙ୍କଠାରେ ବିଶ୍ବାସ କରିବାକୁ ହେବ; ତାହାଙ୍କ ମୃତ୍ୟୁ ଆମ ପାପ ପରିଶୋଧ ସକାଶେ ଥିଲା, ଯଦି ଆମେ ଏହି ବିଷୟକୁ ବିଶ୍ବାସ କରିବା, ତେବେ ଆମେ ଉଦ୍ଧାର ପାଇବା! ରୋମୀୟ ୧୦:୧୩ ପୁନର୍ବାର ଏହି ବିଷୟ କହେ ଯେ, “କାରଣ ଯେ କେହି ପ୍ରଭୁଙ୍କ ନାମ ଧରି ପ୍ରାର୍ଥନା କରିବା, ସେ ପରିତ୍ରାଣ ପ୍ରାପ୍ତ ହେବ” । ଆମ ପାପର ମୂଲ୍ୟକୁ ପରିଶୋଧ କରିବା ପାଇଁ ଓ ଆମକୁ ଅନନ୍ତ ମୃତ୍ୟୁରୁ ରକ୍ଷା କରିବା ପାଇଁ ଯୀଶୁ ମୃତ୍ୟୁଭୋଗ କଲେ । ପରିତ୍ରାଣ, ପାପକ୍ଷମା ସେହି ମାନଙ୍କ ପାଇଁ ଉପଲବଧ ଅଛି ଯେଉଁମାନେ ଯୀଶୁ ଖ୍ରୀଷ୍ଟଙ୍କୁ ନିଜର ପ୍ରଭୁ ଓ ଉଦ୍ଧାରକର୍ତ୍ତାରୁପେ ବିଶ୍ବାସ କରିବେ ।

ପରିତ୍ରାଣର ରୋମୀୟ ସଡକର ଅନ୍ତିମ ଭାଗ ବା ଅଂଶ ହେଉଛି ପରିତ୍ରାଣର ପରିଣାମ । ରୋମୀୟ ୫:୧ ରେ ଏକ ସୁନ୍ଦର ବିଷୟ ଲେଖାଯାଇଅଛି, “ବିଶ୍ବାସ ଦ୍ବାରା ଧାର୍ମିକ ଗଣିତ ହେବାରୁ ଆମ୍ଭେମାନେ ଆମ୍ଭାମାନଙ୍କ ପ୍ରଭୁ ଯୀଶୁ ଖ୍ରୀଷ୍ଟଙ୍କ ଦ୍ବାରା ଈଶ୍ବରଙ୍କ ସହ ଶାନ୍ତିରେ ଅଛୁ” । ଯୀଶୁ ଖ୍ରୀଷ୍ଟଙ୍କ ଦ୍ବାରା ଆମେ ଈଶ୍ବରଙ୍କ ସହ ଶାନ୍ତିର ସମ୍ପର୍କ ସ୍ଥାପନ କରିପାରିବା । ରୋମୀୟ ୮:୧ ଶିକ୍ଷା ଦିଏ ଯେ, “ଯେଉଁମାନେ ଖ୍ରୀଷ୍ଟ ଯୀଶୁଙ୍କଠାରେ ଅଛନ୍ତି, ସେମାନଙ୍କ ପ୍ରତି ବର୍ତ୍ତମାନ କୌଣସି ଦଣ୍ଡଜ୍ଞା ନାହିଁ” । ଆମ ପକ୍ଷରେ ଯୀଶୁ ମୃତ୍ୟୁଭୋଗ କରିଥିବା ହେତୁ, ଆମର ଆଉ କୌଣସି ଦଣ୍ଡଜ୍ଞା ନାହିଁ । ଶେଷରେ, ରୋମୀୟ ୮:୩୮-୩୯ରେ, ପ୍ରଭୁ ଆମକୁ ଏହି ପ୍ରତିଜ୍ଞା କରନ୍ତି, “କାରଣ ମୃତ୍ୟୁ କି ଜୀବନ, ଦୂତ କି କର୍ତ୍ତାପଣ, ବର୍ତ୍ତମାନ କି ଭବିଷ୍ୟତ କି ପରାକ୍ରମ, ଉଚ୍ଚସ୍ଥ ବିଷୟ କି ନୀଚସ୍ଥ ବିଷୟ କି ଅନ୍ୟ କୌଣସି ସୃଷ୍ଟ ବସ୍ତୁ ଆମ୍ଭମାନଙ୍କ ପ୍ରଭୁ ଯୀଶୁ ଖ୍ରୀଷ୍ଟଙ୍କ ଦ୍ବାରା ପ୍ରକାଶିତ ଈଶ୍ବରଙ୍କ ପ୍ରେମରୁ ହେ ଆମ୍ଭମାନଙ୍କୁ ବିଛିନ୍ନ କରିପାରିବ ନାହିଁ, ଏହା ମୁଁ ନିଶ୍ଚୟ ଜାଣେ” ।

ତୁମେ ପରିତ୍ରାଣର ରୋମୀୟ ସଡକକୁ ନିଜସ୍ବ କରିବାକୁ ଚାହୁଁଅଛ କି? ତେବେ ନିମ୍ନରେ ଏକ ସରଳ ପ୍ରାର୍ଥନା ଦିଆଯାଇଅଛି । ମନେ ରଖନ୍ତୁ, ଏହି ପ୍ରାର୍ଥନା କରିବା ଦ୍ବାରା ଅବା ଏହି ପରି ଅନ୍ୟ କୌଣସି ପ୍ରାର୍ଥନା ତୁମକୁ ଉଦ୍ଧାର ଦେଇପାରିବ ନାହିଁ କିନ୍ତୁ କେବଳ ଖ୍ରୀଷ୍ଟଙ୍କ ଠାରେ ବିଶ୍ବାସ କଲେ ତୁମେ ପାପରୁ ଉଦ୍ଧାର ପାଇପାରିବ । ଏହି ପ୍ରାର୍ଥନାର ଉଦ୍ଦେଶ୍ୟ ହେଉଛି, ତୁମେ ଏହା ଦ୍ବାରା ଈଶ୍ବରଙ୍କ ଠାରେ ତୁମର ବିଶ୍ବାସକୁ ପ୍ରକାଶ କରି ପାରିବ ଓ ତୁମର ପରିତ୍ରାଣ ନିମନ୍ତେ ଈଶ୍ବର ଯାହା ସାଧନ କରିଅଛନ୍ତି ସେଥି ସକାଶେ ତାହାଙ୍କୁ ଧନ୍ୟବାଦ ଦେଇ ପାରିବ । ପ୍ରାର୍ଥନା - “ହେ ଈଶ୍ବର, ମୁଁ ଜାଣେ ଯେ ମୁଁ ତୁମ ବିରୁଦ୍ଧରେ ପାପ କରିଅଛି ଏବଂ ମୁଁ ଦଣ୍ଡ ପାଇବା ପାଇଁ ଯୋଗ୍ୟ । କିନ୍ତୁ ମୁଁ ବିଶ୍ବାସ କରେ ଯେ ପ୍ରଭୁ ଯୀଶୁ ଖ୍ରୀଷ୍ଟ ମୋର ପାପର ଦଣ୍ଡକୁ କୃଶରେ ଭୋଗ କରି ଅଛନ୍ତି । ତାହାଙ୍କ ଠାରେ ବିଶ୍ବାସ କରିବା ଦ୍ବାରା ମୋର ପାପକ୍ଷମା ହୋଇପାରିବ । ପରିତ୍ରାଣ ପାଇବା ପାଇଁ ମୁଁ ତୁମ ଠାରେ ବିଶ୍ବାସ କରୁଅଛି । ତୁମର ମହା ଅନୁଗ୍ରହ, କ୍ଷମା ଓ ଅନନ୍ତ ଜୀବନ ପାଇଁ ମୁଁ ତୁମକୁ ଧନ୍ୟବାଦ ଦେଉଅଛି” ଆମେନ୍ ।

ଆପଣ ଏଠାରେ ଯାହା ପଢିଲେ, ସେଥି ସକାଶେ ଆପଣ ଖ୍ରୀଷ୍ଟଙ୍କୁ ଅନୁଗମନ କରିବାର ନିଷ୍ପତି ନେଇଅଛନ୍ତି କି? ଯଦି “ହଁ”, ତେବେ “ଆଜି ମୁଁ ଖ୍ରୀଷ୍ଟଙ୍କୁ ଗ୍ରହଣ କରିଅଛି” ବଟନ୍ ରେ କ୍ଲିକ୍ କରନ୍ତୁ ।



ଓଡିଆ ପେଜ୍ କୁ ପ୍ରତ୍ୟାବର୍ତ୍ତନ କରନ୍ତୁ



ପରିତ୍ରାଣର ରୋମୀୟ ସଡକ କଅଣ?