نا قابلِ معافی گناہ کیا ہے؟


سوال: نا قابلِ معافی گناہ کیا ہے؟

جواب:
نا قابلِ معافی گناہ یا "روح القدس کے خلاف کفر بکنے کے گناہ" کا ذکر مرقس باب 3 آیات 22 تا 30 اور متی باب 12 آیات 22 تا 32 میں کیا گیا ہے۔ یسوع نے فرمایا، "میں تم سے سچ کہتا ہوں کہ بنی آدم کے سب گناہ اور جِتنا کُفر وہ بکتے ہیں معاف کیا جائے گا (آیت 28)۔ لیکن پھر اُس نے ایک استثنا بیان کی، "لیکن جو کوئی روح القدس کے حق میں کفر بکے وہ ابد تک معافی نہ پائے گا بلکہ ابدی گناہ کا قصوروار ہے" (آیت 29)۔

یسوع کے مطابق، ناقابلِ معافی گناہ ایک منفرد گناہ ہے۔ یہ واحد گناہ ہے جو کبھی معاف نہیں کیا جائے گا ("کبھی نہیں" متی باب 12 آیت 32میں موجود "نہ اِس عالم میں نہ آنے والے عالم میں" کے معنی ہیں)۔ نا قابلِ معافی گناہ دُنیا میں مسیح کے وسیلہ سے روح کی خدمت کے سیاق و سباق میں روح القدس کے خلاف کفر بکنا (گستاخ بے حرمتی کرنا) ہے۔ دوسرے الفاظ میں، بے حرمتی کا خاص معاملہ متی باب 12 اور مرقس باب 3میں دیکھا جا سکتا ہے جو کہ منفرد ہے۔ مجرم جماعت، فریسیوں کے ایک گروہ نے نا قابلِ تردید ثبوت دیکھے تھے کہ یسوع روح القدس کی قدرت سے معجزات کر رہا تھا، پھر بھی اُنہوں نے دعویٰ کیا کہ یسوع بدروحوں کے سردار بعلزبول کے قبضہ میں ہے (متی باب 12آیت 24؛ مرقس باب 3 آیت 30)۔

یسوع مسیح کے دور کے یہودی رہمنا یسوع مسیح پر (زمین پر، اُس کی شخصیت میں) بدروح گرفتہ ہونے کا الزام لگاتے ہوئے ناقابلِ معافی گناہ کے مرتکب ہوئے۔ ایسے عمل کے لئے اُن کے پاس کوئی جواز نہیں تھا۔ وہ جہالت یا غلط فہمی سے باہر ہو کر بات نہیں کر رہے تھے۔ فریسی جانتے تھے کہ یسوع اسرائیل کو نجات دینے کے لئے خُدا کے طرف سے بھیجا گیا مسیح ہے۔ وہ پیشن گوئیوں کے پورا ہونے سے واقف تھے۔ اُنہوں نے یسوع مسیح کے عجائب کام دیکھے، اور اُنہوں نے سچائی کے واضح اظہار کو اپنے کانوں سے سُنا تھا۔پھر بھی اُنہوں نے دانستہ طور پر سچائی کوردّ کرنے اور روح القدس پر تہمت لگانے کا انتخاب کیا۔ دُنیا کے نُور کے سامنے کھڑے ہوتے ہوئے، اور اُس کے جلال میں غسل لیتے ہوئے بھی اُنہوں نے اپنی آنکھوں کو بند کیا اور جان بُوجھ کر اندھے بن گئے۔ یسوع نے اِس گناہ کو ناقابلِ معافی قرار دیا۔

روح القدس کے خلاف کُفر کو ، جیسا کہ یہ خاص طور پر فریسیوں کی حالت تھی، موجودہ دور میں نقل نہیں کیا جا سکتا۔ یسوع مسیح زمین پر نہیں ہے، اور کوئی بھی یسوع کوذاتی طور پر معجزات کرتے نہیں دیکھ سکتا، اور پھر اِس قدرت کو روح القدس کی بجائے شیطان کے ساتھ منسوب نہیں کرسکتا۔ موجودہ دور میں ناقابلِ معافی گناہ بے ایمانی کو مسلسل جاری رکھنا ہے۔ اُس شخص کے لئے کوئی معافی نہیں جو مسیح کو ردّ کرتے مر جاتا ہے۔ روح القدس غیر توبہ یافتہ لوگوں کو گناہ اور راستبازی اور عدالت کے بارے میں قصوروار ٹھہراتے ہوئے اِس دُنیا میں کام کر رہا ہے (یوحنا باب 16 آیت 8)۔ اگر کوئی شخص اِس تجویز کے خلاف مذاحمت کرتا اور غیر توبہ یافتہ رہتا ہے، تو وہ فردوس کی بجائے جہنم کا انتخاب کر رہا ہے۔ "اور بغیر ایمان کے اُس کو پسند آنا ناممکن ہے" (عبرانیوں باب 11 آیت 6)، اور ایمان یسوع پر لانا ہو گا (اعمال باب 16 آیت 31)۔ ایسے کسی شخص کے لئے کوئی معافی نہیں جو یسوع پر ایمان لائے بغیر مر جاتا ہے۔

خُدا نے ہماری نجات کے لئے اپنا بیٹا بخش دیا ہے (یوحناباب 3 آیت 16)۔ معافی استثنائی انداز میں مسیح یسوع میں پائی جاتی ہے (یوحنا باب 14 آیت 6)۔ واحد منجی کو ردّ کرنا نجات سے محروم ہونا ہے، مسیح کو ردّ کرنا واضح طور پر نا قابلِ معافی گناہ ہے۔

بہت سے لوگ ڈرتے ہیں کہ اُنہوں نے کچھ ایسےگناہ کئے ہیں جن کو خُدا معاف نہیں کر سکتا یا معاف نہیں کرے گا، اور وہ محسوس کرتے ہیں کہ وہ جو کچھ بھی کر لیں اُن کے لئے کوئی اُمید باقی نہیں ہے۔ شیطان اِس بات سے زیادہ کسی اور بات کو پسند نہیں کرتا کہ لوگ غلط فہمیوں کے شکار رہیں۔ خُدا اُن گنہگاروں کی حوصلہ افزائی کرتا ہے جن کو اپنے گناہوں کا احساس ہو جاتا ہے، "خُدا کے نزدیک جاؤ تو وہ تمہارے نزدیک آئے گا" (یعقوب باب 4 آیت 8)۔ "جہاں گناہ زیادہ ہوا وہاں فضل اُس سے بھی نہایت زیادہ ہوا" (رومیوں باب 5 آیت 20)۔ اور پولُس کی گواہی مثبت ثبوت ہے کہ خُدا اُن کو نجات دے سکتا اور دے گا جو ایمان کے وسیلہ سے اُس کے پاس آتے ہیں (1تھِمُتھِیُس پہلا باب آیات 12 تا 17)۔ اگر آپ احساسِ گناہ کے بوجھ کے نیچے اذیت سہہ رہے ہیں، تو یقین کریں کہ آپ نے نا قابلِ معافی گناہ نہیں کیا۔ خُدا کھُلے بازؤں کے ساتھ آپ کا انتظار کر رہا ہے۔ یسوع کا یہ وعدہ ہے کہ "جو اُس کے وسیلہ سے خُدا کے پاس آتے ہیں وہ اُنہیں پُوری پُوری نجات دے سکتا ہے" (عبرانیوں باب 7 آیت 25)۔ ہمارا خُداوند کبھی ناکام نہیں ہو گا۔ "دیکھو خُدا میری نجات ہے۔ میں اُس پر توکّل کروں گا اور نہ ڈرُوں گا کیونکہ یاہ یہوواہ میرا زور اور میرا سرُود ہے اور وہ میری نجات ہوا ہے" (یسعیاہ باب 12 آیت 2)۔

English
اردو ہوم پیج میں واپسی
نا قابلِ معافی گناہ کیا ہے؟