کیا خاموش دُعا بائبل کے مطابق ہے؟



سوال: کیا خاموش دُعا بائبل کے مطابق ہے؟

جواب:
بائبل حنّہ کی غیر مسموع درخواست میں خاموش دُعا کی ایک مثال پیش کرتی ہے (پہلا سموئیل پہلا باب آیات 10 اور 13)، لیکن یہ خاموشی سے دُعا کرنے پر مخصوص ہدایات نہیں دیتی۔ اِ س کا یہ مطلب نہیں ہے کہ خاموش دُعا بلند آواز سے کی جانے والی دُعا سے کم اہمیت کی حامل ہے، آخر کار حنّہ کی دُعا کا جواب دیا گیا تھا۔ خُدا ہمارے خیالات کو بھی اُتنی آسانی سے سُن سکتا ہے جیسے وہ ہمارے الفاظ کو سُن سکتا ہے (زبور 139 آیت 23؛ یرمیاہ باب 12 آیت 3)۔ یسوع نے فریسیوں کے بُرے خیالات کو جان لیا (متی باب 12 آیات 24 تا 26؛ لوقا باب 11 آیت 17)۔ جو کچھ ہم کہتے یا سوچتے ہیں کچھ بھی خُدا سے چھپا نہیں ہے، جسے ہمارے خیالات کو جاننے کے لئے ہمارے الفاظ کو سُننے کی ضرورت نہیں ہوتی۔ وہ تمام دُعاؤں تک رسائی رکھتا ہے جو اُس سے کی جاتی ہیں، چاہے وہ بول کر کی جائیں یا بغیر بولے کی جائیں۔

بائبل پوشیدگی میں دُعا کا بھی ذکر کرتی ہے (متی باب 6 آیت 6)۔ اگر آپ خود ہی ہیں تو بلند آواز میں دُعا کرنے یا خاموشی سے دُعا کرنے میں کیا فرق ہے؟ کچھ حالات میں صرف خاموش دُعا ہی مناسب ہے مثال کے طور پر ایسی بات کے بارے میں دُعا کرنا جو صرف آپ اور خُدا کے درمیان ہی رہنی چاہیے، ایسے شخص کے لئے دُعا کرنا جو آپ کے پاس موجود ہو وغیرہ۔ خاموشی سے دُعا کرنے میں کوئی بُرائی نہیں ہے، جب تک کہ آپ ایسا شرمندگی کی وجہ سے نہیں کر رہے کہ کوئی آپ کی دُعا سُن رہا ہے۔

شاید خاموش دُعا کی صداقت کی نشاندہی کرنے کے لئے سب سے بہترین 1 تھسلُنیکیوں باب 5 آیت 17 ہے۔ "بلاناغہ دُعا کرو"۔ بلاناغہ دُعا کرنے کا یہ مطلب نہیں کہ ہم ہر وقت بلند آواز سے دُعا کرتے رہیں۔ بلکہ اِس کا مطلب ہے کہ ہمیں خُدائی شعور کی مسلسل حالت میں رہنا ہے، جہاں ہم ہر اُس خیال کو قید کر کے مسیح کا فرمانبردار بنا دیتے ہیں جو خُدا کی پہچان کے برخلاف سر اُٹھائے (2 کرنتھیوں باب 10 آیت 5) اور ہر صورتحال ، منصوبہ، خوف، یا معاملہ کو اُس کے تخت کے سامنے لاتے ہیں۔ بلاناغہ دُعا میں بول کر کی جانے والی دُعائیں، سرگوشی میں کی جانے والی دُعائیں، چلا کر کی جانے والی، گا کر پیش کی جانے والی، اور خاموشی سے کی جانے والی وہ دُعائیں بھی شامل ہیں جن میں ہم حمدوثنا کے لئے اپنے خیالات، درخواستوں، مناجاتوں، اور خُدا کے حضور شکرگزاریوں کو پیش کرتے ہیں۔

English



اردو ہوم پیج میں واپسی



کیا خاموش دُعا بائبل کے مطابق ہے؟