قیامت المسیح اہم کیوں ہے؟


سوال: قیامت المسیح اہم کیوں ہے؟

جواب:
قیامت المسیح کئی وجوہات کی بنا پر اہم ہے۔ سب سے پہلے مُردوں کا جی اُٹھنا خود خُدا کی قدرت کی گواہی ہے۔ مُردوں کی قیامت پر ایمان رکھنا خُدا پر ایمان رکھنا ہے۔ اگر خُدا ہے، اور اگر اُس نے کائنات کو تخلیق کیا ہے اور اُس پر قدرت رکھتا ہے، تو اُس کے پاس مُردوں کو زندہ کرنے کی بھی قدرت ہے۔ اگر اُس کے پاس ایسی قدرت نہیں ہے، تو وہ ہماری پرستش اور ایمان کے لائق نہیں ہے۔ جس نے زندگی تخلیق کی ہے صرف وہی موت کے بعد دوبارہ زندہ کر سکتا ہے، صرف وہی بھیانک پن کو تبدیل کر سکتا ہےجو خُود موت ہو، اور صرف وہی ڈنک کو مٹا سکتا ہے اور قبر پر فتح پا سکتا ہے (۱۔کرنتھیوں۵۴:۱۵۔۵۵)۔ مسیح یسوع کے قبر سے جی اُٹھنے میں ، خُدا ہمیں زندگی اور موت پر مطلق حاکمیت کی یاد دِلاتا ہے۔

قیامت المسیح اِس لئے بھی اہم ہے کیونکہ یہ اُس بات کی تصدیق کرتی ہے جس کا دعویٰ یسوع یعنی خُدا کے بیٹے اور مسیح نے کیا تھا۔ یسوع مسیح کے مطابق اُس کی قیامت ایک "آسمانی نشان" تھا جس سے اُس کی خدمت کی تصدیق ہوتی تھی (متی۱:۱۶۔۴)، اور اُسکی قیامت اِس بات کا بھی ثبوت تھی کہ وہ یروشلیم کی ہیکل پر بھی اختیار رکھتا ہے (یوحنا۱۸:۲۔۲۲)۔ یسوع مسیح کی قیامت کی تصدیق سینکڑوں عینی شاہدین سے ہوتی ہے (۱۔کرنتھیوں۳:۱۵۔۸)۔ یسوع کی قیامت ناقابلِ تردید ثبوت فراہم کرتی ہے کہ وہ دُنیا کا نجات دہندہ ہے۔

قیامت المسیح اِس لئے بھی اہم ہے کیونکہ یہ اُس کے بے گناہ کردار اوراُس کی الٰہی فطرت کو ثابت کرتی ہے۔ بائبل بیان کرتی ہےکہ خُدا "قدوس" اپنے مُقدّس کو سڑنے نہیں دیگا (زبور۱۰:۱۶)، اور یسوع کو باوجود اُس کے مرنے کے سڑنے کی نوبت نہ آئی (دیکھیں۳۲:۱۳۔۳۷)۔ یہ یسوع المسیح کی قیامت ہی تھی کہ پولُس نے یہ منادی کی، "پس اے بھائیو! تمہیں معلوم ہو کہ اُس کی وسیلہ سے تم کو گناہوں کی معافی کی خبر دی جاتی ہے۔ اور موسیٰ کی شریعت کے باعث جن باتوں سے تم بَری نہیں ہو سکتے تھے اُن سب سے ہر ایک ایمان لانے والا اُس کے باعث بَری ہوتا ہے" (اعمال۳۸:۱۳۔۳۹)۔

قیامت المسیح نہ صرف اُس کی الُوہیت کی عظیم توثیق ہے، بلکہ یہ عہد عتیق کی بھی توثیق کرتی ہے جس نے یسوع کے دکھوں اور قیامت کے بارے میں پیشن گوئیاں کیں (دیکھیں۲:۱۷۔۳)۔ یسوع السمیح کی قیامت خود اُس کے اپنے دعوؤں کو صادق ثابت کرتی ہے کہ وہ تیسرے دن جی اُٹھے گا (مرقس۳۱:۸؛۳۱:۹؛۳۴:۱۰)۔ اگر یسوع مسیح زندہ نہیں ہوا، تو ہمارے پاس بھی زندہ ہونے کی اُمید نہیں ہے، حقیقت میں، قیامت المسیح کے بغیر، ہمارے پاس کوئی نجات دہندہ نہیں ہے ، ہمارے پاس کوئی نجات نہیں ہے ، اور ابدی زندگی کی کوئی اُمید نہیں ہے۔ جیسا کہ پولُس بیان کرتا ہے، ہمارا ایمان لانا "بے فائدہ" ہے، انجیل کی گواہی مکمل طور پر مفلوج ہے، اور ہم اب تک اپنے گناہوں میں گرفتار ہیں، کیونکہ ہمارے گناہ اب تک معاف نہیں ہوئے (۱۔کرنتھیوں۱۴:۱۵۔۱۹)۔

یسوع نے کہا، "قیامت اور زندگی میں ہوں"، اِس بیان میں دعویٰ کیا گیا ہے کہ دونوں کا منبع وہی ہے۔ یسوع مسیح کے بغیر قیامت اور ابدی زندگی ممکن نہیں ہے۔ یسوع زندگی دینےسے کہیں بڑھ کر ہے، وہ خود زندگی ہے، اِس لئے موت کو اُس پر کوئی اختیار نہیں ہے۔ یسوع اُن کو بھی زندگی بخشتا ہے جو اُس پر ایمان لاتے ہیں، تاکہ ہم موت پر اُسکی فتح کو بانٹ سکیں (۱۔یوحنا۱۱:۵۔۱۲)۔ ہم جو یسوع مسیح پر ایمان رکھتے ہیں ذاتی طور پر بھی جسم کی قیامت کا تجربہ حاصل کریں گے، کیونکہ ہمارے پاس وہ زندگی ہے جو یسوع دیتا ہے، ہم موت پر غالب آئے ہیں۔ موت کے لئے ہم پر فتح پانا ناممکن ہے (۱۔کرنتھیوں۵۳:۱۵۔۵۷)۔

یسوع "سوئے ہوؤں میں سے پہلا پھل ٹھہرا" (۱۔کرنتھیوں۲۰:۱۵)۔ دوسرے الفاظ میں، اُس نے موت کے بعد زندگی کے راستے کے لئے رہمنائی کر دی ہے۔ یسوع مسیح کی قیامت انسانوں کی قیامت کی گواہی کے طور پر بھی اہم ہے، جو کہ مسیحی ایمان کا بنیادی اصول ہے۔ دوسرے مذاہب کے برعکس، مسیحیوں کا ایک بانی ہے جو موت اور عہود کو اپنے ماننے والوں میں بھی منتقل کرتا ہے تاکہ وہ بھی ایسا ہی کریں۔ دوسرے ہر مذہب کو نبیوں یا انسانوں کی طرف سے قائم کیا گیا ہے جن کا خاتمہ قبر پر ہو گیا۔ مسیحی ہونے کے ناطے ہم جانتے ہیں کہ خُدا انسان بنا، ہمارے گناہوں کی خاطر مُوا، اور تیسرے دن مُردوں میں سے جی اُٹھا۔ قبر اُس کو اپنے اندر جکڑ نہ سکی۔ وہ زندہ ہے، اور آج آسمان پر باپ کی داہنی طرف بیٹھا ہے (عبرانیوں۱۲:۱۰)۔

خُدا کا کلام یسوع مسیح کی آمد اور اُس کی کلیسیا کے اُٹھائے جانے (ریپچر) پر ایمانداروں کی قیامت کی ضمانت دیتا ہے۔ ایسی یقین دہانی کا نتیجہ فتح کا ایک عظیم گیت ہوتا ہے جیسا کہ پولُس ۱۔کرنتھیوں۵۵:۱۵ میں لکھتا ہے، "اے موت تیری فتح کہاں رہی؟ اے موت تیرا ڈنک کہاں رہا؟" (ہوسیع۱۴:۱۳ بھی دیکھیں)۔

یسوع مسیح کی قیامت کی اہمیت خُداوند کے لئے ہماری خدمت پر بھی اثر انداز ہوتی ہے۔ پولُس رسول قیامت پر اپنے بیان کا اختتام اِن الفا ظ میں کرتا ہے: "پس اے میرے عزیز بھائیو! ثابت قدم اور قائم رہو اور خُداوند کےکام میں ہمیشہ افزائش کرتے رہو کیونکہ یہ جانتے ہو کہ تمہاری محنت خُداوند میں بے فائدہ نہیں ہے" (۱۔کرنتھیوں۵۸:۱۵)۔ کیونکہ ہم جانتے ہیں کہ ہم نئی زندگی کے لئے زندہ کئے جائیں گے، اِس لئے ہم مسیح کی خاطر ایذہ رسانیوں اور خطرات کو برداشت کر سکتے ہیں (۳۰۔۳۲آیات)، جیسے ہمارے خُداوند نے برداشت کیں۔ یسوع مسیح کی قیامت کی وجہ سے، تاریخ میں ہزاروں مسیحی شُہدا نے ہمیشہ کی زندگی اور قیامت کے عہد کی خاطر اپنی زندگیاں قُربان کیں۔

قیامت ہر ایماندار کے لئے شاندار فتح اور خوشی کا شادیانہ ہے۔یسوع مسیح بائبل کے مطابق مر گیا، دفن ہوا، اور تیسرے دن جی اُٹھا (۱۔کرنتھیوں۳:۱۵۔۴)۔ اور وہ دوبارا آ رہا ہے! جو مسیح میں مرے وہ جی اُٹھیں گے، اور جو اُس کی آمد پر زندہ ہوں گے وہ بدل جائیں گے اور نئے جلالی بدن حاصل کریں گے (۱۔تھِسلُنیکیوں۱۳:۴۔۱۸)۔ قیامت المسیح اہم کیوں ہے؟ یہ ثابت کرتی ہے کہ یسوع کون ہے۔ یہ ثابت کرتی ہے کہ خُدا نے ہماری جگہ یسوع کی قربانی کو قبول کیا ہے۔ یہ ظاہر کرتی ہے کہ خُدا مُردوں کو زندہ کرنے کی قدرت رکھتا ہے۔ یہ ضمانت دیتی ہے کہ جتنے مسیح پر ایمان لاتے ہیں اُن کے جسم مُردہ نہیں رہیں گے بلکہ ابدی زندگی کے لئے زندہ کئے جائیں گے۔

English
اردو ہوم پیج میں واپسی
قیامت المسیح اہم کیوں ہے؟