پولی تھی ازم کیا ہے؟


سوال: پولی تھی ازم کیا ہے؟

جواب:
پولی تھی ازم ایک عقیدہ ہے کہ بہت سے خُدا ہیں۔ لفظ کو توڑنے کےبعد، "پولی" یونانی لفظ سے ماخوذ ہے جِس کے معنی "بہت سے" کے ہیں، اور "تھی ازم" ایسے یونانی لفظ سے ماخوذ ہے جِس کے معنی "خُدا" کے ہیں۔ پولی تھی ازم غالباً انسانی تاریخ میں خُدا کے بارے میں سب سے غالب نظریہ رہا ہے۔ قدیم زمانوں میں پولی تھی ازم کی مشہور مثالیں یونانی، رومی متھالوجی (زیُوس، اپولو، ایفروڈائٹ، پوزیڈون، وغیرہ) ہیں۔ پولی تھی ازم کی واضح ترین جدید مثال ہندومت ہے، جِس کے 33 کروڑ سے زیادہ خُدا ہیں۔ اگرچہ ہندومت اپنے جوہر میں پینتھی اِسٹِک (مظاہر پرستانہ) ہے، یہ بہت سے خُداؤں پر ایمان رکھتے ہیں۔

اِس بات پر غور کرنا دلچسپ ہے کہ کثیر خُداؤں کو ماننے والے مذاہب میں ، عام طور پر ایک خُدا کو دوسرے خُداؤں سے افضل مانا جاتا ہے، مثال کےطور پر، یونانی/رومی متھالوجی (فرضی داستانوں) میں زیُوس دیوتا کو اور ہندومت میں برہما کو افضل خُدا مانا جاتا ہے۔

بعض لوگ دلیل دیتے ہیں کہ بائبل بھی پرانے عہد نامہ میں پولی تھی ازم (کثیر خداؤں) کی تعلیم دیتی ہے۔ بے شک، کئی حوالہ جات صیغہ جمع میں "خداؤں" کو پیش کرتے ہیں (خروج باب 20 آیت 3؛ اِستثنا باب 10 آیت 17؛ باب 13آیت 2؛ زبور 82 آیت 6؛ دانی ایل باب 2 آیت 47)۔ قدیم اسرائیلی مکمل طور پر سمجھتے تھے کہ ایک ہی حقیقی خُدا ہے، لیکن وہ اکثر اُس کے مطابق زندگی نہ گزارتے تھے جس کے سچ ہونے کا وہ ایمان رکھتے تھے، اور وہ بار بار بُت پرستی میں پڑ جاتے اور بیگانہ دیوتاؤں کی پرستش کرتے تھے۔ تو ہمیں کثیر خُداؤں کے بارے میں بات کرنے والے اِن اور دیگر حوالہ جات کے ساتھ کیا کرنا چاہیے؟اِس بات پر غور کرنا ضروری ہے کہ عبرانی لفظ الوہیم ایک حقیقی خُدا، اور جھوٹے معبودوں/بُتوں کو بھی پیش کرنے کے لئے استعمال کیا جاتا تھا ۔ یہ تقریباً انگلش لفظ "گاڈ" کی طرح ہی کام کرتا تھا۔

"خُدا" کے طور پر کسی چیز کو بیان کرنے کا یہ مطلب نہیں ہے کہ آپ اُس پر الہیٰ ہستی کے طور پر ایمان رکھتے ہیں۔ دیوتاؤں کے بارے میں بات کرنے والی پرانے عہد نامہ کے حوالہ جات کی وسیع اکثریت جھوٹے خُداؤں کی بات کر رہی ہیں، جو خُدا ہونے کا دعویٰ کرتے ہیں لیکن حقیقت میں نہیں ہیں۔ دوسرا سلاطین باب 19آیت 18 میں اِس خیال کا خلاصہ کیا جاتا ہے، "اور اُن کےدیوتاؤں کو آگ میں ڈالا کیونکہ وہ خُدا نہ تھے بلکہ آدمیوں کی دست کاری یعنی لکڑی اور پتھر تھے اِس لئے اُنہوں نے اُن کو نابُود کیا ہے"۔ زبور 82 آیت 6 پر غور کریں، "میں نے کہا تھا کہ تم اِلہٰ ہو ، اور تم سب حق تعالیٰ کے فرزند ہو۔ تو بھی تم آدمیوں کی طرح مرو گے اور اُمرا میں سے کسی کی طرح گر جاؤ گے"۔

بائبل واضح طور پر پولی تھی ازم (کثیر خُداؤں کی تعلیم ) کے خلاف سکھاتی ہے۔ استثناء باب 6 آیت 4 ہمیں بتاتی ہے، "سُن اے اسرائیل! خُداوند ہمارا خُدا ایک ہی خُداوند ہے"۔ زبور 96 آیت 5 اعلان کرتی ہے، "اِس لئے کہ اور قوموں کے سب معبود محض بُت ہیں لیکن خُداوند نے آسمانوں کو بنایا"۔ یعقوب باب 2 آیت 19 فرماتی ہے، "تُو اِس بات پر ایمان رکھتا ہے کہ خُدا ایک ہی ہے خیر۔ اچھا کرتا ہے۔ شیاطین بھی ایمان رکھتے اور تھرتھراتے ہیں"۔ صرف ایک ہی خُدا ہے۔بہت سے جھوٹے خُدا ہیں، اور وہ جو خُدا ہونے کاروپ دھارتے ہیں، لیکن صرف ایک ہی حقیقی خُدا ہے۔

English
اردو ہوم پیج میں واپسی
پولی تھی ازم کیا ہے؟