پولُس کے جِسم میں کونسا کانٹا چُبھویا گیا تھا؟



سوال: پولُس کے جِسم میں کونسا کانٹا چُبھویا گیا تھا؟

جواب:
پولُس کے جِسم میں کانٹے کی نوعیت کے بارے میں بے شُمار وضاحتیں پیش کی گئی ہیں۔ اِن وضاحتوں کی صف بندی متواتر آزمائشوں، سینہ زور مخالفتوں، شدید بیماریوں(جیسا کہ آنکھ کے مسائل، ملیریا، آدھے سر کا درد، اور مرگی کے دورے) سے گفتگو کی معذوری تک کی جاتی ہے۔ کوئی بھی یقین سے نہیں کہہ سکتا کہ پولُس کے جِسم کا کانٹا کیا تھا، لیکن غالباً یہ جسمانی اذیت تھی۔

پولُس کے جِسم میں اِس کانٹے کے بارے میں جو کچھ ہم جانتے ہیں وہ دوسرا کرنتھیوں باب 12 آیت 7 میں خود پولُس کے بیان سے معلوم ہوتا ہے، "اور مکاشفوں کی زیادتی کے باعث میرے پھُول جانے کے اندیشہ سے میرے جِسم میں کانٹا چُبھویا گیا یعنی شیطان کا قاصد تاکہ میرے مُکّے مارے اور میں پھُول نہ جاؤں"۔ سب سے پہلے، جِسم میں کانٹے کا مقصد پولُس کو خاکسار رکھنا تھا۔ جو کوئی یسوع سے مُلاقات کرتا ، اور اُس سے بات کرتا اور جِس کو یسوع کی طرف سے حکم دیا جاتا (اعمال باب 9 آیات 2 تا 8) وہ اپنی قدرتی حالت میں "شیخی باز" بن سکتا تھا۔ اِس حقیقت میں اضافہ کریں کہ پولُس نے روح القدس کی تحریک سے نئے عہد نامہ میں بہت زیادہ لکھا، اِس سے یہ دیکھنا نہایت آسان ہو جاتا ہے کہ پولُس کیسے "مُتکبر" (کے۔جے۔وی)، یا "حد سے زیادہ سربُلند " (این۔کے۔جے۔وی)، "نہایت مُتکبر" (این۔سی۔وی) ہو سکتا تھا۔ دوسری بات، ہم جانتے ہیں کہ مصیبت شیطان کے قاصد کی طرف سے آئی تھی۔ جیسے خُدا نے شیطان کو اجازت دی تھی کہ وہ ایوب کو اذیت دے (ایوب پہلا باب آیات 1 تا 12)، ویسے ہی خُدا نے اپنے نیک مقصد اور اپنی کامل مرضی میں شیطان کو اجازت دی کہ وہ پولُس کو اذیت پہنچائے۔

یہ بات قابلِ فہم ہے کہ پولُس اِس کانٹے کو اپنی وسیع اور زیادہ موثر خدمت (گلتیوں باب 5 آیات 14تا 16) کے لئے رکاوٹ سمجھے گا ، اور وہ اِس کے خاتمے کے لئے تین دفعہ خُدا سے درخواست کرے گا (دوسرا کرنتھیوں باب 12 آیت 8)۔ لیکن پولُس نے اِس تجربے سے وہ سبق سیکھا جو اُس کی تحریرات پر غالب ہے: کہ انسانی کمزوری کے پسِ منظر خُدا کی قدرت زیادہ بہتر طور پر ظاہر ہوتی ہے (دوسرا کرنتھیوں باب 4 آیت 7)، تاکہ صرف خُدا ہی جلال پائے (دوسرا کرنتھیوں باب 10 آیت 17)۔ اِس مسلے کو ہٹانے کی بجائے، خُدا نے اِس کے وسیلہ سے اُسے اپنا فضل اور اپنی قوت عطا کی، اور اُس نے اِس فضل کو "کافی" قرار دیا۔

English



اردو ہوم پیج میں واپسی



پولُس کے جِسم میں کونسا کانٹا چُبھویا گیا تھا؟