"ہائے پاسٹیٹک یونین" (ایک شخص میں دو فطرتوں کے اتحاد کا عقیدہ) کیا ہے؟ یسوع ایک ہی وقت میں خُدا اور انسان دونوں کیسے ہو سکتا ہے؟



سوال: "ہائے پاسٹیٹک یونین" (ایک شخص میں دو فطرتوں کے اتحاد کا عقیدہ) کیا ہے؟ یسوع ایک ہی وقت میں خُدا اور انسان دونوں کیسے ہو سکتا ہے؟

جواب:
"ہائے پاسٹیٹک یونین" اصطلاح اِس حقیت کو بیان کرنے کے لیے استعمال کی جاتی ہے کہ کس طرح خُدا بیٹا، یسوع مسیح نے انسانی فطرت کو پہن لیا، اور اُس وقت بھی وہ کامل خُدا رہا۔ یسوع ہمیشہ سے خُدا ہے (یوحنا۵۸:۸؛۳۰:۱۰)، لیکن تجسم کے وقت یسوع انسان بنا (یوحنا۱۴:۱)۔ الٰہی فطرت میں بشری فطرت کے اضافہ سے یسوع "گاڈ مین" یعنی "مجسم خُدا" ہے۔ یسوع مسیح ایک شخصیت، کامل خُدا اور کامل انسان ہے، یہی عقیدہِ "ہائے پاسٹیٹک یونین" ہے۔

یسوع کی انسانی اور الٰہی دو فطرتیں ناقابلِ جُدا ہیں۔ یسوع ہمیشہ "گاڈ مین" یعنی مجسم خُدا ہی رہے گا، کامل خُدا اور کامل انسان، ایک شخص میں دو مختلف فطرتیں۔ یسوع کی بشریت اور الُوہیت مخلوط (مِکس ) نہیں ہوئی، بلکہ اپنی الگ الگ شناخت کھوئے بغیر یکجا ہوئی ہیں۔ یسوع نے بعض اوقات بشریت کی حد بندیوں کے ساتھ کام کیا (یوحنا۴:۶؛۲۸:۱۹) اور بعض اوقات اپنی الُوہیت کی قدرت کے ساتھ کام کیا (یوحنا۴۳:۱۱؛متی۱۸:۱۴۔۲۱)۔ دونوں صورتوں میں یسوع کے اعمال ایک ہی شخص سے ہوئے۔ یسوع میں دو فطرتیں ہیں لیکن وہ ایک ہی شخص ہے۔

"ہائے پاسٹیٹک یونین" کی تعلیم اِس حقیقت کو واضح کرنے کی ایک کوشش ہے کہ یسوع ایک ہی وقت میں خُدا اور انسان دونوں کیسے ہو سکتا ہے۔ اگرچہ اِس تعلیم کو ہم مکمل طور پر سمجھنے کے قابل نہیں ہیں۔ مکمل طور پر سمجھنا نا ممکن ہے کہ خُدا کیسے کام کرتا ہے۔ انسان ہونے کے ناطے، محدود اذہان کے ساتھ، ہمیں خُدا کو مکمل طور پر سمجھنے کی توقع نہیں کرنی چاہیے۔ یسوع خُدا کا بیٹا ہے جو رُوح القدس کی قدرت سے پیدا ہوا (لوقا۳۵:۱)۔ اِس کا یہ ہرگز مطلب نہیں کہ یسوع کی پیدائش سے پہلے اُسکا وجود نہیں تھا۔ یسوع ہمیشہ سے ہے (یوحنا۵۸:۸؛۳۰:۱۰)۔ جب مریم حاملہ ہوئی ، اُس وقت یسوع خُدا میں بشریت کا اضافہ ہوا (یوحنا۱:۱؛۱۴:۱)۔

یسوع خُدا اور انسان دونوں ہے۔ یسوع ہمیشہ سے خُدا ہے، لیکن مریم کے حاملہ ہونے تک وہ انسان نہیں بنا۔ یسوع اِس لیے انسان بنا کہ ہماری مانند ہو کر ہماری جدوجہد میں ہمارا مددگار ہو (عبرانیوں۱۷:۲) اور اِس سے اہم بات یہ ہے کہ وہ اِس لیے انسان بنا تاکہ ہمارے گناہوں کی قیمت ادا کرنے کے لیے صلیب پر اپنی جان دے سکے (فِلِپیوں۵:۲۔۱۱)۔

خلاصہ کے طور پر، "ہائے پاسٹیٹک یونین" سکھاتی ہے کہ یسوع کامل انسان اور کامل خُدا دونوں ہے ، اور دونوں فطرتیں مخلوط (مِکس) نہیں ہوئیں، اور وہ ہمیشہ دو فطرتوں کے اتحاد میں ایک شخص رہے گا۔



اردو ہوم پیج میں واپسی



"ہائے پاسٹیٹک یونین" (ایک شخص میں دو فطرتوں کے اتحاد کا عقیدہ) کیا ہے؟ یسوع ایک ہی وقت میں خُدا اور انسان دونوں کیسے ہو سکتا ہے؟