نجات کیا ہے؟ مسیحی عقیدہِ نجات کیا ہے؟


سوال: نجات کیا ہے؟ مسیحی عقیدہِ نجات کیا ہے؟

جواب:
نجات کسی خطرہ یا مصیبت سے رہائی کا نام ہے۔ نجات دینا بچانا یا حفاظت کرنا ہے۔ لفظ "نجات" فتح، صحت، یا محافظت کا خیال رکھتا ہے۔ بعض اوقات بائبل نجات یا مخلصی جیسے الفاظ عارضی، جسمانی رہائی کو بھی پیش کرتے ہیں جیسے کہ پولُس کی قید سے رہائی (فلپیوں۱۹:۱)۔

لفظ "نجات" کا تعلق زیادہ تر ابدی، روحانی رہائی کے ساتھ ہے۔ جب پولُس نے فلپی داروغہ کو بتایا کہ اُسے نجات حاصل کرنے کے لئے کیا کرنا ہو گا، تو وہ داروغہ کی ابدی منزل کا حوالہ دے رہا تھا (۳۰:۱۶۔۳۱)۔ یسوع نے نجات کو خُدا کی بادشاہی میں داخل ہونے کے برابر درجہ دیا (متی۲۴:۱۹۔۲۵)۔

ہم کس چیز سے نجات حاصل کرتے ہیں؟ مسیحی عقیدہِ نجات میں ، ہم "غضب" سے نجات حاصل کرتے ہیں جو کہ خُدا کی طرف سے گناہ کی عدالت ہے (رومیوں۹:۵؛۱۔تھِسلنیکیوں۹:۵)۔ ہمارے گناہوں نے ہمیں خُدا سے جُدا کر دیا تھا، کیونکہ گناہ کی مزدوری موت ہے (رومیوں۲۳:۶)۔ بائبل کے مطابق نجات کا تعلق گناہ کے نتائج سے رہائی کے ساتھ ہے اور اِس میں گناہ کا خاتمہ بھی شامل ہے۔

کون نجات دیتا ہے؟ صرف خُدا ہی گناہ کو مٹا سکتا ہے اور ہمیں گناہ کی سزا سے رہائی دے سکتا ہے (۲۔تھِمُتھیُس۹:۱؛طِطُس۵:۳)۔

خُدا نجات کیسے دیتا ہے؟ مسیحی عقیدہِ نجات میں خُدا نے یسوع مسیح کے وسیلہ سے نجات بخشی ہے (یوحنا۱۷:۳)۔ صلیب پر مسیح کی موت، اورخاص طور پرموت کے بعد اُس کی قیامت نے ہمارے لئے نجات کوممکن بنایا (رومیوں۱۰:۵؛افسیوں۷:۱)۔ بائبل واضح طور پر بیان کرتی ہے کہ نجات فضل سے ہی ملی ہے، نجات خُدا کی طرف سے ایسا تحفہ ہے جس کے ہم حقدار نہیں تھے (افسیوں۵:۲اور۸)، اور نجات صرف یسوع مسیح پر ایمان لانے سے ہی حاصل ہوتی ہے (اعمال۱۲:۴)۔

ہم نجات کیسے پاتے ہیں؟ ہمیں نجات ایمان سے ملتی ہے۔ ضرور ہے کہ ہم انجیل یعنی یسوع کی موت اور قیامت کی خوشخبری سُنیں (افسیوں۱۳:۱)۔ پھر ہمیں خُداوند یسوع پر کامل بھروسہ، اور ایمان لانا ضروری ہے۔ (رومیوں۱۶:۱)۔ اِس میں توبہ، گناہ اور مسیح کے بارے میں ذہنی تبدیلی (اعمال۱۹:۳)، اور یسوع مسیح کے نام کا اقرار کرنا (رومیوں۹:۱۰۔۱۰اور۱۳) بھی شامل ہیں۔

مسیحی عقیدہِ نجات کی تعریف یہ ہو گی،"خُدا کے فضل سےگناہ کی ابدی سزا سے رہائی جو اُن کو ملتی ہے جو ایمان سے خُدا کی توبہ اور یسوع مسیح پر ایمان لانے کی شرائط کو قبول کرتےہیں"۔ نجات صرف یسوع مسیح کے وسیلہ سے ملتی ہے (یوحنا۶:۱۴؛اعمال۱۲:۴)۔ اور اِس کی فراہمی، ضمانت، اور محافظت کا انحصار صرف خُدا پر ہے ۔

English
اردو ہوم پیج میں واپسی
نجات کیا ہے؟ مسیحی عقیدہِ نجات کیا ہے؟