کیا یسوع سبزی خور (ویجیٹیرین) تھا؟ کیا ایک مسیحی کو سبزی خور ہونا چاہیے؟


سوال: کیا یسوع سبزی خور (ویجیٹیرین) تھا؟ کیا ایک مسیحی کو سبزی خور ہونا چاہیے؟

جواب:
یسوع سبزی خور (ویجیٹیرین) نہیں تھا۔ بائبل یسوع مسیح کے مچھلی کھانے (لوقا باب 24 آیات 42 تا 43) اور برّہ کھانے (لوقا باب 22 آیات 8 تا 15) کا ذکر کرتی ہے۔ یسوع نے معجزانہ طور پر ہجوم کو مچھلی اور روٹی کھلائی، اگر وہ سبزی خور ہوتا تو یہ کام اُس کے لئے عجیب ہوتا (متی باب 14 آیات 17 تا 21)۔ پطرس رسول کی رویا میں یسوع نے بشمول جانوروں کے تمام کھانوں کو پاک ٹھہرایا (اعمال باب 10 آیات 10 تا 15)۔ نوح کے دور میں طوفان کے بعد، خُدا نے انسان کو گوشت کھانے کی اجازت دی (پیدائش باب 9 آیات 2تا3)۔ خُدا نے کبھی اِس اجازت کو منسوخ نہیں کیا۔

اِس کے ساتھ، ایک مسیحی کے سبزی خور ہونے کے ساتھ کوئی بُرائی نہیں ہے۔ بائبل ہمیں گوشت کھانےکا حکم نہیں دیتی۔ گوشت کھانے سے باز رہنے میں بھی کوئی بُرائی نہیں ہے۔ جو کچھ بائبل کہتی ہے وہ یہ ہے کہ ہمیں اِس مسلہ پر اپنی قائلیت کو دوسرے لوگوں پر ٹھونسنا نہیں چاہیے یا اُن کی عدالت نہیں کرنی چاہیے کہ وہ کیا کھاتے ہیں اور کیا نہیں کھاتے۔ رومیوں باب 14 آیات 2تا 3 ہمیں بتاتی ہے، "ایک کو اعتقاد ہے ہر چیز کا کھانا روا ہے اور کمزور ایمان والا ساگ پات ہی کھاتا ہے۔ کھانے والا اُس کو جو نہیں کھاتا حقیر نہ جانے اور جو نہیں کھاتا وہ کھانے والے پر الزام نہ لگائے کیونکہ خدا نے اُس کو قبول کر لیا ہے"۔

دوبارہ کہتے ہیں، طوفان کے بعد خُدا نے انسان کو گوشت کھانے کی اجازت دی تھی (پیدائش باب 9 آیت 3)۔ پرانے عہد نامہ کے قوانین میں، اسرائیل قوم کو کچھ چیزیں نہ کھانے کا حکم دیا گیا تھا (احبار باب 11 آیات 1تا 47)، لیکن گوشت کھانے کے خلاف کبھی کوئی حکم نہیں کیا گیا۔ یسوع نے ہر قسم کے گوشت سمیت تمام کھانوں کو پاک ٹھہرایا (مرقس باب 7 آیت 19)۔ باقی باتوں کی طرح، ہر مسیحی کو رہنمائی کے لئے دُعا کرنی چاہیے کہ خُدا نے اُس کے لئے کونسی چیزیں کھانے کے لئے رکھی ہیں۔ ہم جو کچھ کھانے کا فیصلہ کرتے ہیں وہ خُداوند کے نزدیک قابلِ قبول ہے جب تک ہم اُس کی فراہمی کےلئے خُداوند کا شکر ادا کرتے ہیں (پہلا تھسلُنیکیوں باب 5 آیت 18)۔ "پس تم کھاؤ یا پیو جو کچھ کرو سب خُدا کے جلال کے لئے کرو" (پہلا کرنتھیوں باب 10 آیت 31)۔

English
اردو ہوم پیج میں واپسی
کیا یسوع سبزی خور (ویجیٹیرین) تھا؟ کیا ایک مسیحی کو سبزی خور ہونا چاہیے؟