مسیحی اخلاقیات کیا ہیں؟



سوال: مسیحی اخلاقیات کیا ہیں؟

جواب:
مسیحی اخلاقیات کا بہتریں خلاصہ کُلسیوں 3:1-6 میں پیش کیا گیا ہے، "پس جب تم مسیح کے ساتھ جلائے گئے تو عالمِ بالا کی چیزوں کی تلاش میں رہو جہاں مسیح موجود ہے اور خُدا کی دہنی طرف بیٹھا ہے۔ عالمِ بالا کی چیزوں کے خیال میں رہو نہ کہ زمین پر کی چیزوں کے۔ کیونکہ تم مر گئے اور تمہاری زندگی مسیح کے ساتھ خُدا میں پوشیدہ ہے۔ جب مسیح جو ہماری زندگی ہے ظاہر کیا جائے گا تو تم بھی اُس کے ساتھ جلال میں ظاہر کئے جاؤ گے۔ پس اپنے اُن اعضا کو مُردہ کرو جو زمین پر ہیں یعنی حرامکاری اور ناپاکی اور شہوت اور بُری خواہش اور لالچ کو جو بُت پرستی کے برابر ہے۔ کہ اُن ہی کے سبب سے خُدا کا غضب نافرمانی کے فرزندوں پر نازل ہوتا ہے"۔

اگرچہ "کرنے" اور "نہ کرنے" کی ایک فہرست سے زیادہ بائبل ہمیں تفصیلی ہدایات دیتی ہے کہ ہمیں زندگی کیسے گزارنی چاہیے۔ بائبل میں وہ سب کچھ ہے جِسے جاننے کی ہمیں ضرورت ہے کہ مسیحی زندگی کیسے گزارنی ہے۔ تاہم بائبل واضح طور پر ہماری زندگی کی ہر صورت حال کا احاطہ نہیں کرتی جس کا ہمیں سامنا کرنا پڑتا ہے۔ تو پھر یہ کیسے اُن تمام اخلاقی الجھنوں کے لئے کافی ہے جس کا ہم سامنا کرتے ہیں۔ یہی ہیں جس میں مسیحی اخلاقیات آتی ہے۔

سائنس اخلاقیات کو "اخلاقی اصولوں کا مجموعہ، اور حُسن و عمل کا مطالعہ" قرار دیتی ہے۔ اِس لئے مسیحی اخلاقیات مسیحی ایمان سے اخذ کئے گئے وہ اصول ہیں جن پر ہم عمل کرتے ہیں۔ اگرچہ خُدا کا کلام ہماری زندگی کے تمام حالات کا احاطہ نہیں کرتا جن کا ہم سامنا کرتے ہیں، تاہم اِس کے اصول ہمیں ایک معیار مہیا کرتے ہیں جن کے مطابق ہم اپنی زندگیاں اُن حالات میں گزار سکتے ہیں جن کے بارے میں بائبل میں واضح ہدایات نہیں پائی جاتیں۔

مثال کے طور پر، بائبل واضح طور پر غیر قانونی منشیات کے استعمال کے بارے میں بیان نہیں کرتی، لیکن اِن کی بنیاد کے لئے اصول فراہم کرتی ہے جو ہم بائبل میں سے سیکھ سکتے ہیں، ہم سیکھ سکتے ہیں کہ اِن کا استعمال کرنا غلط ہے۔ اِس بات کے لئے بائبل ہمیں اصول فراہم کرتی ہے کہ ہمارا بدن روح القدس کا مقدِ س ہے اور ہمیں اِس کے وسیلہ سے خُدا کو جلال دینا چاہیے (1کرنتھیوں 6:19-20)۔ یہ جانتے ہوئے کہ منشیات ہمارے بدنوں کے ساتھ کیا کرتے ہیں، اور ہمارے بہت سے اعضاکے لئے نقصان کا سبب بنتے ہیں، ہم جان سکتے ہیں کہ اِن کے استعمال سے ہم روح القدس کے مقدِس کو برباد کر دیں گے۔ اور یقینی طور پر اِس سے خُدا کے نام کو جلال نہیں ملے گا۔ بائبل ہمیں یہ بھی سکھاتی ہے کہ ہمیں اُن اختیارات کے تابع رہنا ہے جن کو خُدا نے خود ہم پر مسلط کیا ہے (رومیوں 13:1)۔ منشیات کی غیر قانونی نوعیت کو دیکھتے ہوئے، اُن کا استعمال کرنے سے ہم اختیارات کی تابعداری نہیں کر رہے بلکہ اُن کے خلاف بغاوت کر رہے ہیں۔ کیا اِس کا یہ مطلب ہے کہ اگر غیر قانونی منشیات کو قانونی حثییت مل جائے تو وہ جائز ہیں؟ ہزگر نہیں۔ کیونکہ ابھی بھی پہلے اصول کی خلاف ورزی ہو رہی ہے۔

بائبل کے اصولوں کو استعمال کرنے سے مسیحی کسی بھی صورت حال کے لئے اخلاقی نصاب متعین کر سکتے ہیں۔ کچھ معاملات میں اصول تلاش کرنا آسان ہو گا،جیسے کہ کُلسیوں 3باب میں پائے جانے والے مسیحی زندگی کے لئے اصول۔ تاہم دوسرے معاملات میں ہمیں زیادہ محنت کرنے کی ضرورت ہے۔ اِن اصولوں کی تلاش کے لئے سب سے بہترین طریقہ دُعا کے ساتھ مطالعہ ہے۔ روح القدس ہر ایماندار میں رہتا ہے، اور اُس کی خدمت کا ایک پہلو یہ بھی ہے کہ وہ ہمیں سکھاتا ہے کہ ہمیں زندگی کیسے گزارنی ہے، "لیکن مددگار یعنی روح القدس جسے باپ میرے نام سے بھیجے گا وہی تمہیں سب باتیں سکھائے گا اور جو کچھ میں نے تم سے کہا ہے وہ سب تمہیں یاد دلائے گا" (یوحنا 14:26)۔ "اور تمہارا وہ مسح جو اُس کی طرف سے کیا گیا تم میں قائم رہتا ہے اور تم اِس کے محتاج نہیں کہ کوئی تمہیں سکھائے بلکہ جس طرح وہ مَسح جو اُس کی طرف سے کیا گیا تمہیں سب باتیں سکھاتا ہے اور سچّا ہے اور جھوٹا نہیں اور جس طرح اُس نے تمہیں سکھایا اُسی طرح تم اُس میں قائم رہتے ہو" (1یوحنا 2:27)۔ لہذہ، جب ہم خُدا کے کلام کے بارے میں دُعا کریں گے، روح القدس ہماری رہنمائی کرے گا اور ہمیں سکھائے گا۔ وہ ہمیں اصول دکھائے گا جو کسی بھی صورتحال میں ہماری ضرورت ہوں گے۔

اگرچہ خُدا کا کلام ہر صورتحال کا احاطہ نہیں کرتا جس کا ہم اپنی زندگی میں سامنا کرتے ہیں، لیکن پھر بھی یہ مسیحی زندگی کے لئے کافی ہے۔ بہت سی باتوں کے لئے، ہم صرف وہی دیکھ سکتے ہیں جو بائبل سکھاتی ہے اور اُس کے مطابق مناسب راستے پر چل سکتے ہیں۔ اخلاقی سوالات میں جہاں بائبل واضح ہدایات نہیں دیتی، ہمیں اصولوں کی تلاش کی ضرورت ہے جن کا اطلاق صورتحال پر ہو سکتا ہے۔ ضروری ہےکہ خُدا کے کلام کی سمجھ بوجھ کے لئے دُعا کریں، دُعا کریں کہ وہ ہمارے ذہنوں کو کھولےکہ ہم روح القدس کی آواز کو سمجھ سکیں۔ روح القدس ہمیں سکھائے گا اور بائبل میں سے اصولوں کی فراہمی کے لئے ہماری رہنمائی کرے گا جن کی ہمیں ضرورت ہے تاکہ ہم ایسی زندگی گزار سکیں جیسی کہ ایک مسیحی کی ہونی چاہیے۔

English



اردو ہوم پیج میں واپسی



مسیحی اخلاقیات کیا ہیں؟