بائبل آسان موت (کسی بیمار یا زخمی انسان کو اُس کی تکلیف کم کرنے کے لئے مار دینا) یا معاون خود کشی کے بارے میں کیا فرماتی ہے؟



سوال: بائبل آسان موت (کسی بیمار یا زخمی انسان کو اُس کی تکلیف کم کرنے کے لئے مار دینا) یا معاون خود کشی کے بارے میں کیا فرماتی ہے؟

جواب:
آسان موت جِسے بعض اوقات "مہربان قتل" بھی کہا جاتا ہے ایک مشکل مسلہ ہو سکتا ہے۔ ایک طرف ہم کسی شخص کی زندگی کو اپنے ہاتھ میں لے کر ختم نہیں کرنا چاہتے ۔ دوسری طرف ہم مرنے کے عمل کو ضرورت سے زیادہ لمبا نہیں دیکھنا چاہیے، مطلب ہم زندگی کو محفوظ رکھنا چاہتے ہیں لیکن موت کو طُول نہیں دینا چاہتے۔ ہم کس طرح ایک شخص کو مرنے کی اجازت دے سکتے ہیں اور اُس کی زندگی کو بڑھانے کے لئے مزید کاروائی نہیں کر سکتے؟

اِس سے متعلقہ مسلہ معاون خود کشی ہے۔ حقیقت میں معاون خودکشی کی تلاش میں ایک شخص کسی اور شخص کی مدد سے اِس بات کا یقین کرنے کے لئے کہ موت جلد اور بغیر درد کے ہو اپنے آپ کو آسان موت دینے کی کوشش کرتا ہے۔ معاون شخص خود کشی کی تیاری میں ضروری سازوسامان کی سہولت فراہم کرتا ہے، جبکہ خود کشی کرنے والا اپنی جان دینے کی تیاری کرتا ہے۔ موت تک رسائی میں مدد فراہم کر کے سہولت کار قتل کے الزام سے بچنے کی کوشش کرتا ہے۔ معاون خودکشی کے معاونین "عزت و وقار کی موت" جیسی اصطلاحات استعمال کرتے ہوئے ایک مثبت رنگ دینے کی کوشش کرتے ہیں۔ لیکن "عزت و وقار کی موت" ابھی بھی "معاون خود کشی" کی موت ہے، اور خود کشی کرنا گناہ ہے۔

ہم ایسی دُنیا میں رہتے ہیں جِسے کبھی کبھی "موت کی ثقافت " کہا جاتا ہے۔ اسقاطِ حمل پر دہائیوں سے عمل کیا جا رہا ہے۔ اب کچھ ایسے بھی ہیں جو سنجیدگی سے بچہ کشی (چھوٹے بچوں کو مارنے کے عمل) کی بھی تجویز دیتے ہیں۔ آسان موت کو مختلف سماجی اور مالی مسائل کو حل کرنے کے قابل عمل ذرائع کے طور پر فروغ دیا جا رہا ہے۔ دُنیا کے مسائل کے جواب کے طور پر موت پر اِس قسم کی توجہ بائبلی ماڈل کی مکمل تبدیلی ہے۔ بائبل بیان کرتی ہے کہ موت دشمن ہے (1کرنتھیوں 15:26)۔ زندگی خُدا کی طرف سے ایک نعمت ہے (پیدائش 2:7)۔ جب اسرائیلیوں کو زندگی اور موت میں سے ایک چیز کے انتخاب کا موقع دیا گیا تو خُدا نے اسرائیل کو "زندگی کے انتخاب" کے لئے کہا (اِستثنا 30:19)۔ آسان موت خُدا کی نعمت کی بے حرمتی کرنا اور لعنت کو گلے لگانا ہے۔

یہ عظیم سچائی کہ خُدا حاکم اعلیٰ ہے ہمیں اِس نتیجے پہ لاتی ہے کہ آسان موت اور معاون خود کشی گناہ ہیں۔ ہم جانتے ہیں کہ جسمانی موت ہم فانی انسانوں کے لئے ناگزیر ہے (زبور 89:48؛ عبرانیوں 9:27)۔ تاہم خُدا واحد مختار ہے کہ کب اور کیسے کسی شخص کی موت واقع ہو گی۔ خُدا کا بندہ ایوب گواہی دیتا ہے، "کیونکہ میں جانتا ہوں کہ تُو مُجھے موت تک پہنچائے گا اور اُس گھر تک جو سب زندوں کے لئے مقرر ہے" (ایوب 30:23)۔ واعظ 8:8 بیان کرتی ہے، "کسی آدمی کو روح پر اختیار نہیں کہ اُسے روک سکے اور مرنے کا دن بھی اُس کے اختیار سے باہر ہے اور اُس لڑائی سے چھُٹی نہیں ملتی اور نہ شرارت اُس کو جو اُس میں غرق ہے چھُڑائے گی"۔ خُدا موت کے بارے میں حتمی تعلیم دے چُکا ہے (1کرنتھیوں 15:26، 54-56؛ عبرانیوں 2:9، 14-15؛ مکاشفہ 21:4)۔ آسان موت اور معاون خود کشی انسان کی طرف سے خُدا سے اختیار چھیننے کی کوششیں ہیں۔

موت ایک قدرتی حادثہ ہے۔ بعض اوقات خُدا کسی شخص کو موت سے پہلے طویل عرصہ تک تکلیف سہنے دیتا ہے، اور بعض اوقات کسی شخص کی تکلیف کم کر دی جاتی ہے۔ کوئی بھی مصیبت سے لطف اندوز نہیں ہوتا، لیکن اِس سے اِس بات کا تعین کر نا درُست نہیں ہے کہ کسی شخص کو مرنا چاہیے۔ اکثر خُدا کے مقاصد کوتکلیف کے ذریعے جانا جاتا ہے۔ "اقبالمندی کے دن خوشی میں مشغول ہو پر مصیبت کے دن میں سوچ بلکہ خُدا نے اِسکو اُسکے مقابل بنا رکھا ہے تاکہ انسان اپنے بعد کی کسی بات کو دریافت نہ کرسکے" (واعظ 7:14)۔ رومیوں 5:3 سکھاتی ہے کہ مصیبتوں سے صبر پیدا ہوتا ہے۔ خُدا اُن لوگوں کی پرواہ کرتا ہے جو موت کے لئے روتے ہیں اور اپنی مصیبتوں کو ختم کرنا چاہتے ہیں۔ خُدا آخر تک زندگی میں مقاصد فراہم کرتا ہے۔ صرف خُدا ہی جانتا ہے کہ سب سے بہتر کیا ہے، اور خُدا اپنے وقت پر یہاں تک کہ کسی کی موت کے معاملے میں بھی کامل ہے۔

ہمیں زندگی ختم کرنے کی کوشش کبھی بھی نہیں کرنی چاہیے۔ اور نہ ہی زندگی کو محفوظ رکھنے کے لئے غیر معمولی وسائل پر تکیہ کرنا چاہیے۔ جلد بازی کی موت گناہ ہے، غیر فعال طریقہ سے علاج کو روکنا بھی غلط ہو سکتا ہے، لیکن قدرتی طور پر بیمار شخص کو قدرتی موت کی اجازت دینا گناہ نہیں ہے۔ جو کوئی اِس مسلہ کا سامنا کرتا ہے اُسے خُدا سے حکمت کی دُعا کرنی چاہیے (یعقوب 1:5)۔ ہم سب کو سابق سرجن جنرل سی۔ایورٹ کُوپ کی الفاظ یاد رکھنے چاہیے جس نے خبردار کیا کہ دوا کا استعمال "ہماری شفا اور ہماری موت دونوں نہیں ہو سکتا" (کُوپ ، سی میمر آف امریکہ فیملی ڈاکٹر از سی ایورٹ کُوپ، ایم ڈی، رینڈم ہاؤس، 1991)۔

English



اردو ہوم پیج میں واپسی



بائبل آسان موت (کسی بیمار یا زخمی انسان کو اُس کی تکلیف کم کرنے کے لئے مار دینا) یا معاون خود کشی کے بارے میں کیا فرماتی ہے؟