Ta di bèrdat Hesu-Kristu a wòrdu resusitá?



Pregunta: Ta di bèrdat Hesu-Kristu a wòrdu resusitá?

Kontesta:
Skritura ta presentá evidensia konklusivo ku Hesu-Kristu berdaderamente a wòrdu resusitá for di morto. E resurekshon di Kristu ta dokumentá den Mateo 28:1-20; Marko 16:1-20; Lukas 24:1-53; i Huan 20:1-21:25. E Kristu resusitá tambe ta aparesé den e Buki di Echonan (Echonan 1:1-11). For di e pasashinan aki bo por haña algun “pruebanan” di e resurekshon di Kristu. Promé ta e kambio dramátiko den e disípulonan. Di un grupo di hòmber yen miedu i den eskondite nan a bira testigunan fuerte i ku yen kurashi i nan a kana rònt mundu pa kompartí e evangelio. Kiko otro por a okashoná e kambio dramátiko aki ku no ta e aparsishon di Kristu resusitá na nan?

Segundamente, ta e bida di e apòstel Pablo. Kiko a kombirti’é di un persiguidó di iglesia den un apòstel pa iglesia? Ta ora e Kristu resusitá a aparesé na dje riba e kaminda pa Damasko (Echonan 9:1-6). E di tres prueba konvinsente ta e graf bashí. Si Kristu no a wòrdu resusitá, unda Su kurpa ta? E disípulonan i otronan a mira e graf kaminda El a wòrdu derá. Ora nan a bai bèk, Su kurpa no tabata einan mas. Angelnan a deklará ku El a wòrdu resusitá for di morto manera El a primintí (Mateo 28:5-7). Pa di kuater, e evidensia adishonal di Su resurekshon ta tur e hendenan ku El a aparesé na dje (Mateo 28:5, 9, 16-17; Marko 16:9; Lukas 24:13-35; Huan 20:19, 24, 26-29, 21:1-14; Echonan 1:6-8; 1 Korintionan 15:5-7).

Un otro prueba di e resurekshon di Hesus ta e gran kantidat di enfasis ku e apòstelnan a pone riba e resurekshon di Hesus. Un pasashi klave tokante e resurekshon di Kristu ta 1 Korintionan 15. Den e kapítulo aki, apòstel Pablo ta splika dikon ta krusial pa komprondé i kere den e resurekshon di Kristu. E resurekshon ta importante pa e sigiente motibunan: 1. Si Kristu no a wòrdu resusitá for di morto, kreyentenan tampoko lo no por hasi esaki (1 Korintionan 15:12-15). 2. Si Kristu no a wòrdu resusitá for di morto, Su sakrifisio pa piká lo no tabata sufisiente (1 Korintionan 15:16-19). E resurekshon di Hesus a proba ku Dios a aseptá Su morto komo pago kompletu pa nos pikánan. Si El a simplemente muri i keda morto, esaki lo a indiká ku Su sakrifisio no tabata sufisiente. Komo resultado, kreyentenan lo no por a haña pordon pa nan pikánan, i nan lo keda morto despues ku nan muri (1 Korintionan 15:16-19). Lo no tin nada manera bida eterno (Huan 3:16). “Pero en realidat Kristu a lanta fo'i morto komo Esun promé di e mortonan.” (1 Korintionan 15:20).

Finalmente, Skritura ta bisa klaramente ku tur hende ku kere den Hesu-Kristu lo lanta for di morto i tin bida eterno meskos kunÉ (1 Korintionan 15:20-23). 1 Korintionan 15 ta deskribí kon e resurekshon di Kristu a proba Su viktoria riba piká i ku El a proveé e poder pa nos por biba viktoriosamente riba piká (1 Korintionan 15:35-49). E ta proklamá ku, komo resultado di e resurekshon di Kristu, tur hende ku kere den djE lo haña viktoria apsoluto riba morto (1 Korintionan 15:50-58).

Esta un glorioso bèrdat e resurekshon di Kristu ta! “P'esei anto, rumannan stimá, para firme sin tambaliá, mira pa boso destaká semper den boso trabou pa Señor, pasobra boso sa ku e trabou ku boso ta hasi den union ku Señor, no ta enbano” (1 Korintionan 15:58). Segun Beibel, e resurekshon di Hesu-Kristu ta berdaderamente real. Beibel a dokumentá e resurekshon di Kristu, i tambe ku mas ku 400 hende tabata testigu di esaki, i el a forma dòktrina Kristian krusial riba e echo históriko di e resurekshon di Hesus.



Bai bèk na home page di Papiamentu



Ta di bèrdat Hesu-Kristu a wòrdu resusitá?