Hesus ta Dios? Hesus a yega di afirmá ku E ta Dios?



Pregunta: Hesus ta Dios? Hesus a yega di afirmá ku E ta Dios?

Kontesta:
Ningun kaminda den Beibel no tin pará ku Hesus a yega di bisa e palabranan eksakto, “Ami ta Dios”. Pero esaki no ta nifiká ku E no a proklamá di ta Dios. Laga nos tuma por ehèmpel e palabranan di Hesus den Huan 10:30, “Ami ku mi Tata ta un.” Si nos djis wak e reakshon di e Hudionan riba e deklarashon aki, nos ta mira ku El a afirmá di ta Dios. Ta pa e motibu aki mes nan a purba di piedr’e. “… abo ku ta un ser humano, ta konsiderá bo mes igual na Dios” (Huan 10:33). E Hudionan a komprondé eksaktamente loke Hesus tabata afirmando – dibinidat. Nos por ripará ku Hesus no a nenga Su afirmashon di ta Dios. Ora Hesus a deklará, “Ami ku mi Tata ta un” (Huan 10:30), E tabata bisando ku E ku e Tata ta di e mesun naturalesa i esensia. Huan 8:58 tambe ta un otro ehèmpel. Hesus a deklará, “Mi ta segurá boso: AMI TA’ promé ku Abraham tabat’ei!” E Hudionan a reakshoná ora nan a tende e deklarashon aki dor di kue poko piedra pa mata Hesus pa motibu di blasfemia, kual e Lei di Moises ta instruí nan pa hasi (Levítiko 24:15).

Huan ta ripití e konsepto di e dibinidat di Hesus: “e Palabra tabata Dios mes” i “ E Palabra a bira hende” (Huan 1:1, 14). E versíkulonan aki klaramente ta indiká ku Hesus ta Dios en persona. Echonan 20:28 ta bisa nos, “Kuida boso kurpa i henter e trupa di karné ku Spiritu Santu a pone na boso enkargo. Sea wardadó di iglesia di Dios, e iglesia ku El a gana pa E mes, pa medio di su mes sanger.” Ken a kumpra e iglesia, e iglesia di Dios, ku Su propio sanger? Hesu-Kristu. Echonan 20:28 ta deklará ku Dios a kumpra Su iglesia ku Su propio sanger. P’esei, Hesus ta Dios!

E disípulo Tomas a deklará tokante hesus, “Mi Señor i mi Dios” (Huan 20:28). Hesus no a korigié. Tito 2:13 ta enkurashá nos pa warda riba e segundo regreso di nos Dios i Salbador, Hesu-Kristu (wak 2 Pedro 1:1 tambe). Den Hebreonan 1:8, E Tata ta deklará tokante Hesus, “Pero E ta bisa su Yu: ‘Bo trono, Dios, t'ei pa semper, bo sèpter real ta un sèpter di hustisia”. E Tata ta referí na Hesus komo “O Dios”, kual ta indiká ku realmente Hesus ta Dios.

Den Revelashon, un angel a instruí e apòstel Huan pa alabá solamente Dios (Revelashon 19:10). Varios biaha den Skritura Hesus ta risibí alabansa (Mateo 2:11, 14:33, 28:9, 17; Lukas 24:52; Huan 9:38). Nunka e no a refutá e hendenan ora nan tabata alab’é. Si Hesus no tabata Dios, lo El a bisa e hendenan pa no alab’e, mesunkos ku e angel a hasi den Revelashon. Tin hopi otro versíkulonan i pasashinan den Skritura ku ta papia di e dibinidat di Hesus.

E motibu di mas importante ku Hesus mester ta Dios, ta pasobra si E no tabata Dios, Su morto lo no por tabata sufisiente pa paga e kastigu di piká di henter mundu (1 Huan 2:2). Un kreashon, kual Hesus lo tabata ta si E no tabata Dios, lo no por a paga e kastigu infinito ku un Dios infinito ta rekerí pa kubri piká. Dios so por paga un kastigu asina. Dios so por tuma e pikánan di mundu (2 Korintionan 5:21), muri i resustitá, i asina proba Su viktoria riba piká i morto.



Bai bèk na home page di Papiamentu



Hesus ta Dios? Hesus a yega di afirmá ku E ta Dios?