Ken ta Hesu-Kristu?



Pregunta: Ken ta Hesu-Kristu?

Kontesta:
Kompará ku e pregunta ”Dios ta eksití?”, hopi tiki hende ta puntra si Hesu-Kristu a yega di eksistí. Generalmente ta wòrdu aseptá ku di bèrdat Hesus tabata un hòmber ku tabata kana rònt riba mundu 2000 aña pasa na Israel. Mayoría biaha debatenan ta kuminsa ora e identidat kompletu di Hesus ta wòrdu diskutí. Kasi tur religion grandi ta kere ku Hesus tabata un profeta of un bon maestro of un hòmber di Dios. E problema ta ku Beibel ta bisa nos ku Hesus tabata hopi mas ku djis un profeta, un bon maestro of un hòmber di Dios.

Den e buki di C.S. Lewis, “Mere Christianity” (“Djis Kristianismo”), el a skirbi lo siguiente: “Mi ta purbando di prevení tur hende di bisa un kos hopi apsurdo kual hendenan sa bisa tokante di djE (Hesu-Kristu): ‘Mi ta kla pa aseptá Hesus komo un bon maestro moral, pero mi no ta aseptá su afirmashon di ta Dios.’ Esei ta nèt e kos ku nos no mester bisa. Un hòmber ku tabata djis un hòmber i ku a bisa e tipo di kosnan ku Hesus a bisa lo no por tabata un bon maestro moral. Sea E tabata un hende loko - riba e mesun nivel ku un hòmber ku ta bisa ku e ta un webu herebé, of lo e tabata e diabel di fiernu. Bo mester hasi bo eskóho. Sea e hòmber aki tabata i ta, e Yu di Dios, of E tabata un hòmber loko of pihó. Bo por yam’é un chambòn, bo por skupi riba dje i mat’é manera un demonio; of bo por kai na su pia i yam’é Señor i Dios. Pero laga nos no bin ku ridikules tokante ku e tabata un bon maestro humano. E no a laga e opshon ei habrí pa nos. Esei no tabata Su intenshon.”

Awor, ken Hesus tabata bisa ku E ta? Ken Beibel ta bisa ku E ta? Pa di promé, laga nos tira un bista riba e palabranan di Hesus den Huan 10:30, “Ami ku mi Tata ta un”. Na promé bista esaki no ta parse un afirmashon ku E ta Dios. Pero, wak e reakshon di e Hudionan riba Su deklarashon, “No ta pa motibu di bo bon obranan nos ke piedra bo, ma ta pasobra bo ta blasfemá Dios. Abo ku ta un ser humano, ta konsiderá bo mes igual na Dios.” (Huan 10:33). E Hudionan a komprondé bou di e deklarashon di Hesus ku E ta afirmá di ta Dios. Segun e siguiente versíkulonan, Hesus nunka no a koregí e Hudionan dor di bisa, “Ami no a bisa nunka ku Mi ta Dios”. Esaki ta indiká ku Hesus realmente tabata bisa ku E ta Dios, dor di deklará, “Ami I mi Tata ta un” (Huan 10:30). Huan 8:58 ta un otro ehempel: “Mi ta segurá boso: ‘AMI TA’ promé ku Abraham tabat’ei.” Atrobe, e Hudionan a reakshoná dor di kue piedranan pa piedra Hesus (Huan 8:59). E manera ku Hesus a anunsiá Su identidat komo “AMI TA”, ta un aplikashon di e nomber di Dios direktamente for di Tèstamènt Bieu (Éksodo 3:14). Dikon e Hudionan kier a piedra Hesus atrobe, si E no a bisa nada ku nan tabata konsiderá komo blasfemo, manera e afirmashon di ta Dios?

Huan 1:1 ta bisa “E Palabra tabata Dios mes.” Huan 1:14 ta bisa “E Palabra a bira hende.” Esaki klaramente ta indiká ku Hesus ta Dios den hende. Tomas e disipel a deklará na Hesus, “Mi Señor i mi Dios” (Huan 20:28). Hesus no a koregié. Pablo e apòstel ta deskribiÉ komo, “… nos gran Dios i Salbador Hesu-Kristu” (Tito 2:13). E apòstel Pedro tambe a bisa meskos, “… nos Dios i Salbador Hesu-Kristu” (2 Pedro 1:1). Dios Tata tambe ta testigu di e identidat kompletu di Hesus, “’Pero E ta bisa su Yu: Bo trono, Dios t’ei pa semper, bo sèpter real ta un sèpter di hustisia.’” (Hebreonan 1:8). E profesianan di Kristu den Tèstamènt Bieu ta anunsiá Su dibinidat, “Pasobra un yuchi a nase pa nos ta un yu hòmber nos a haña. E ta karga e poder soberano riba su skouder. Nan lo yam’é: Konsehero Maravioso, Dios Fuerte, Tata Eterno, Prínsipe di Pas” (Isaías 9:6).

Asina, manera C.S. Lewis tabata bisa, no ta un opshon pa kere ku Hesus tabata solamente un bon maestro. Hesus klaramente i sin duda a afirmá ku E ta Dios. Si E no tabata Dios, e ora ei E ta un mentiroso, i si esei tabata bèrdat, e ora ei e no ta ni un profeta, ni un bon maestro, ni un hòmber di Dios. Sientífikonan moderno a hasi varios intentonan pa desmentí e palabranan di Hesus, dor di pretendé ku e “berdadero Hesus historiko” no a menshoná mayoría di e kosnan ku Beibel ta atribui na djE. Ken nos ta pa diskutí loke Palabra di Dios ta bisa ku Hesus a hasi of laga di bisa? Kon un “sientífiko” ku a bin dos mil aña despues di Hesus por tin un mas miho bista den loke Hesus a hasi of laga di bisa, ku esnan ku El a biba kun’é, sirbi kun’é i ku a haña enseñansa di djE mes (Huan 14:26)?

Dikon e pregunta tokante e identidat berdadero di Hesus ta asina importante? Dikon ta importante si Hesus ta Dios of no? E motibu di mas importante dikon Hesus mester ta Dios ta pasobra si E no tabata Dios, Su morto lo no por tabata sufisiente pa e paga e kastigu di piká di henter mundu (1 Huan 2:2). Dios so por a paga un kastigu infinitamente asina (Romanonan 5:8; 2 Korintionan 5:21). Hesus mester tabata Dios pa asina E por a paga nos debenan. Hesus mester tabata un hòmber pa e por a muri. Salbashon ta optenibel solamente pa medio di fe den Hesu-Kristu. Dor di Hesus su dibinidat, E ta e úniko kaminda pa salbashon. Dor di Hesus Su dibinidat El a proklamá: “Ami ta e kaminda, bèrdat i bida; niun hende no por yega serka Tata, si no ta pa medio di Mi” (Huan 14:6).



Bai bèk na home page di Papiamentu



Ken ta Hesu-Kristu?