Kiko ta e propósito di bida?



Pregunta: Kiko ta e propósito di bida?

Kontesta:
Kiko ta e propósito di bida? Kon por haña propósito, èksito i satisfakshon den bida? Kon por logra algu ku lo keda signifikante pa hopi tempu? Masha hopi hende nunka no a para ketu i pensa riba preguntanan importante manera esaki. Nan ta wak bèk varios aña patras i puntra nan mes dikon nan relashonnan a kaba na nada i tambe dikon nan ta sinti nan mes asina bashí, maske ku podise nan a logra lokual nan kièr a logra kaba. Un hende a yega di puntra un atleta ku a logra yega te den tòp di su deporte, kiko e tabata ke pa un hende bise tempu ku el a kuminsa nobo-nobo den su deporte. El a kontestá, ’’mare un hende por a bisami ku ora bo yega den tòp, no tin nada einan.” Mayoria metanan ta resulta den bashí, despues di a gasta áños pa logra nan.

Den nos kultura humanistiko, hende ta bai tras di hopi kos, i nan ta pensa ku nan ta haña propósito den nan. Tin di e búskeda nan aki ta inkluhí éksito den negoshi, rikesa, bon relashonnan, sekso, entretenimentu, i hasi bon obra pa hende. Hendenan a yega di testifiká ku mientras nan a logra nan metanan di rikesa, relashon i plaser, ainda nan a keda ku un bashí den nan mes, un sentimentu bashí ku nada no por yen’é.

E outor di e buki bíbliko Predikador ta deskribí e sentimentu aki ora e ta bisa, “Ilushon… puru ilushon, tur kos ta ilushon.” (Predikador 1:2). Rei Salomon, e eskritor di Predikador, tabatin un rikesa inmenso, sabiduria ku ta surpasá kualkier otro hende tantu di su tempu komo di nos tempu, tambe e tabatin míles di muhé, palasionan i hardinnan kual tabata e envidia di hopi reinonan, e miho kuminda i biñanan i tur tipo di entretenimento na su desposishon. El a yega di bisa ku tur loke su kurason ta deseá, e ta bai tras di dje. Pero tòg el a bisa “no tin nada nobo den e mundu akí” – bibando bida komosifuera ku tur kos ku nos por mira ku nos wowonan i sinti ku nos sentidonan so ta eksistí –bida ta sin sentido. Dikon tin un bashí asina? Pasobra Dios a krea nos pa algu ku ta mas ayá di loke nos por eksperensia den e bida aki. Solomon a bisa tokante Dios, “Dios a duna hende tambe un gana fuerte di sinta pensa riba tempu...”(Predikador 3:11). Den nos kurasonnan nos ta konsiente ku e “bida aki” no ta tur kos ku tin.

Den Génesis, e promé buki di Beibel, nos por mira ku Dios a krea ser humano segun Su imágen (Génesis 1:26). Esaki ta nifiká ku nos ta e kreashon ku parse Dios mas tantu ku tur otro kos (kualke otro kos ku tin bida). Tambe nos por mira ku promé ku ser humano a kai den piká i e maldishon a bin riba mundu, e siguiente kosnan aki tabata bèrdat: 1) Dios a traha ser humano komo un kreatura sosial (Génesis 2:18-25); 2) Dios a duna ser humano trabou (Génesis 2:15); 3) Dios tabatin komunion ku ser humano (Génesis 3:8); i 4) Dios a duna ser humano dominio riba henter mundu (Génesis 1:26). Kiko e kosnan aki ta nifiká? E intenshon di Dios tabata pa kada un di e kosnan aki añadí propósito den nos bida, pero tur e kosnan aki (spesialmente e komunion entre ser humano ku Dios) a wòrdu severamente afektá dor di e kaída di ser humano den piká i komo resultado, e maldishon ku a bini riba mundu (Génesis 3).

Den Revelashon, e delaster buki di Beibel, Dios ta revelá ku lo E distruí e mundu presente i e shelunan i e estado eterno lo drenta na vigor ora E krea un shelu nobo i un mundu nobo. Den e tempu ei, lo E restorá e komunion kompletamente ku tur ser humano ku ta salbá, mientras esnan ku no ta salbá lo wòrdu husgá komo indígeno i nan lo wòrdu tirá den e laman di kandela (Revelashon 20:11-15). E maldishon di piká lo wòrdu distruí pa semper; lo no tin ningun piká mas, ni tristesa, malesa, morto òf dolór mas (Revelashon 21:4). Dios lo biba huntu ku nan, i nan lo wòrdu yamá Su yunan (Revelashon 21:7). Laga nos rekapitulá: Dios a krea nos pa nos tin komunion kunE, ser humano a peka, esaki a kibra e komunion aki, Dios ta restorá e komunion kompletamente ora e estadio eterno yega. Pa hiba un bida logrando tur kos, anto pa despues muri separá for di Dios pa eternidat lo ta hopi en vano! Pero Dios a habri un kaminda no solamente pa nos tin e posiblidat di tin plaser eterno (Lukas 23:43), pero tambe pa nos hiba un bida satisfaktoriamente i ku propósito riba mundu. Kon un hende por optené plaser eterno i “shelu na tera”?

Propósito di bida restorá pa medio di Hesu-Kristu

Propósito real den bida, tantu aworaki komo den eternidat, por wòrdu hañá den restorashon di nos relashon ku Dios, kual a wòrdu kibrá ora Adam i Eva a kai den piká. E relashon ku Dios aki ta solamente posibel pa medio di Su Yu, Hesu-Kristu (Echonan 4:12; Huan 1:12; 14:6). Nos ta haña bida eterno ora nos repentí di nos piká (ku nos no ke sigui den dje) anto Kristu kambia nos i hasi nos un kreashon nobo, anto nos depende riba Hesu-Kristu komo nos Salbador.

Propósito real no por wòrdu hañá dor di solamente aseptá Hesus komo nos Salbador, maske kon maravioso esei ta. Pero, propósito real di bida ta wòrdu hañá ora nos kuminsá sigui Kristu komo Su disípulo, siña di djE, pasa tempu kun’É den Su Palabra, komuniká kun’É den orashon, i kana kun’É den obediensia na Su mandamentunan. Si bo no ta un Kristian (òf porta bo ta un kreyente nobo), podise bo ta bisando den bo mes, “Esaki no ta zona masha eksitante òf satisfaktorio pami!” Pero Hesus a hasi e siguiente deklarashonnan:

“Tur ku ta kansá i kargá, bini serka Mi i Ami lo duna boso sosiegu. Tuma mi yugo riba boso skouder i siña di Mi, pasobra Mi ta mansu i humilde; i boso lo haña sosiegu. Pasobra mi yugo ta suave i mi karga ta lihé’ (Mateo 11:28-30). “Ami a bini pa duna bida, bida na abundansia” (Huan 10:10). “Si un hende ke sigui Mi, e mester lubidá su mes, hisa su krus i sigui Mi. Pasobra esun ku ke salba su bida, lo pèrd'é, ma esun ku entregá su bida pa Mi, lo hañ'é bèk” (Mateo 16:24-25). “Buska bo goso den Señor i l’E duna bo tur loke bo kurason por deseá’’ (Salmonan 37:4).

Loke tur e versíkulonan aki ta bisa ta ku nos tin un eskòho. Nos por sigui buska manera pa guia nos propio bida, kual ta resultá den bashí, òf nos por skohe di bai tras di Dios i Su boluntat pa nos bida ku henter nos kurason, kual lo resultá den un bida kompletu, ku e deseonan di nos kurason ta wòrdu realisá, i ku nos ta haña felisidat i satisfakshon. Esaki ta asina pasobra nos Kreador ta stima nos i E ta deseá e mihó pa nos (no nesesariamente e bida di mas fásil, pero tòg mas kompletu).

Bida Kristian por wòrdu kompará ku un eskóho entre stulnan karu pa un evento di deporte, kual lo ta hopi serka di tur e akshon, òf paga menos pa wak e wega fo’i di un distansia. Pa mira Dios traha “fo’i dje stulnan te dilanti” ta loke nos mester skohe, pero lástimamente mayoria hende no ta skohe esaki. Pa mira Dios Su obranan djaserka ta posibel pa disípulonan di Kristu ku berdaderamente a stòp di bai tras di nan propio deseonan i na su luga di esei, bai tras di e propósitonan di Dios. Nan a paga e prèis (entrega kompleto na Kristu i Su boluntat); nan ta eksperensiando bida den su máksimo; i nan por enfrentá nan mes, nan próhimo i nan Kreador sin ningun lamentashon. Abo a paga e prèis? Bo ta dispuesto? Si ta asina, lo bo no keda ku hamber pa sentido ní propósito di bida mas.



Bai bèk na home page di Papiamentu



Kiko ta e propósito di bida?