settings icon
share icon
Pregunta

Kiko Beibel ta bisa tokante matrimonio interrasial?

Kontesta


Lei di Tèstamènt Bieu tabata prohibí e Israelitanan di partisipá den matrimonio interrasial (Deuteronomio7:3-4). Pero, e motibu di e prohibishon aki no tabata tin nada di aber ku kolo di kueru òf ètnia. Mas bien, tabata pa motibunan religioso. E motibu dikon Dios a prohibí e Hudionan di partisipá den matrimonio interrasial ta, paso e hendenan di otro rasa tabata adoradónan di Diosnan falsu. E Israelitanan lo por a wòrdu desviá f’oi Dios si nan lo a kasa ku adoradónan di ídolonan òf paganonan. Esaki ta eksaktamente lokual a pasa den Israel, segun Malakías 2:11.

Un prinsipio similar di puresa spiritual ta wòrdu presentá den Tèstamènt Nobo, pero esaki no tin nada di aber ku rasa: “No mara boso mes na hende ku no ta kreyente, pasobra hustisia i maldat no tin nada di aber ku otro tòg? I lus i skuridat por tin relashon ku otro?” (2 Korintionan 6:14). Mesun kos ku e Israelitanan (kreyentenan den e úniko Dios berdadero) tabata prohibí pa kasa ku idólatranan, asina Kristiannan tambe (kreyentenan den e úniko Dios berdadero) ta prohibí pa kasa ku hendenan ku no ta kreyente. Beibel nunka no a bisa ku matrimonio interrasial ta robes. Tur hende ku ta prohibí matrimonio interrarial ta hasi esaki sin outoridat bíbliko.

Manera Martin Luther King Jr. a yega di bisa, un persona mester wòrdu husgá abase di su karakter, i no abase di su kolo di kueru. No tin luga den Kristianismo pa faboritismo ku ta basá riba rasa (Hakobo 2:1-10). De fakto, e perspektiva bíbliko ta ku ta existí solamente un “rasa” – rasa di ser humano, ku tur hende ta desendiente di Adam ku Eva. Ora di selektá un kompañero, un Kristian mester buska pa sa promé si e esposa/esposo potenshal a wòrdu nasé dinobo pa medio di fe den Hesu-Kristu (Huan 3:3-5). Fe den Kristu, no kolo di kueru, ta e stándart bíbliko ora di skohé un kasá. Matrimonio interrasial no ta un kestion di bon òf malu, sino di sabiduria, konosementu i orashon.

Un pareha ku ta konsiderá matrimonio mester tene kuenta ku hopi faktor. Aunke e diferensia di kolo di kueru no mester wòrdu ignorá, sigur sigur e no mester ta un faktor ku ta determiná si e pareha por kasa òf no. Un pareha interrasial por bai enfrentá hopi diskriminashon i ridikules, i nan mester ta prepará pa por manehá e tipo di prehuisionan aki na un manera bíbliko.

Un iglesia ku ta kleurenblind i/òf un matrimonio Kristian interrasial por ta un ilustrashon hopi poderoso di nos igualdat den Kristu.

English



Bai bèk na home page di Papiamentu

Kiko Beibel ta bisa tokante matrimonio interrasial?
Facebook icon Twitter icon Pinterest icon Email icon
© Copyright Got Questions Ministries