Ken a krea Dios? Di unda Dios a bini?



Pregunta: Ken a krea Dios? Di unda Dios a bini?

Kontesta:
Un argumento hopi komun ku ateonan i sképtikonan sa uza ta ku si tur kos mester di un kousa, e ora ei Dios tambe mester di un kousa. E konklushon ta ku si Dios tabatin mester di un kousa, e ora ei Dios no ta Dios (anto si Dios no ta Dios, e ora ei mas ku klaro ku no tin niun Dios). Esaki ta un forma un tiki mas sofistiká di e pregunta básiko “Ken a traha Dios?”. Tur hende sa ku algu no ta bin for di nada. P’esei, si Dios ta “algu”, e ora ei E mester tin un kousa, tòg?

E pregunta aki ta kompliká, paso e indirektamente e ta trese e hipótesis falsu ku Dios a bini di un kaminda i despues ta wòrdu puntrá unda esei por ta. E kontesta ta ku e pregunta aki no tin niun sentido. E ta meskos ku ora un hende puntra, “Kon blou ta hole?” Blou no ta den e kategoria di algu ku por tin un holó, p’esei e pregunta riba su mes ta robes. N’e mesun manera, Dios no ta den e kategoria di kosnan ku a wòrdu kreá òf kousá. Dios no a wòrdu kousá ni kreá – E ta simplemente eksistí.

Kon nos por sa esaki? Nos sa ku di nada, nada ta bin. P’esei, si a yeg’i tin un tempu kaminda no tabatin apsolutamente nada den eksistensia, e ora ei nada no por a bin den eksistensia. Pero kosnan ta eksistí si. P’esei, aunke nunka no por tabatin apsolutamente nada, algu mester tabatin semper den eksistensia. E kos ku semper a eksistí ei, ta loke nos ta yama Dios. Dios ta e Ser ku nunka no a wòrdu kousá, ku a kousa tur otro kos pa bini den eksistensia. Dios ta e Kreador ku nunka a wòrdu kreá, ku a krea e universo i tur kos den dje.



Bai bèk na home page di Papiamentu



Ken a krea Dios? Di unda Dios a bini?