Salbashon ta pa medio di fe so, òf pa medio di obranan tambe?



Pregunta: Salbashon ta pa medio di fe so, òf pa medio di obranan tambe?

Kontesta:
Pódise esaki ta un dje preguntanan di mas importante di henter teologia Kristian. E pregunta aki ta e kousa di Reformashon, e divishon entre misanan Protestant i Katóliko. E pregunta aki ta e diferensha klave entre e berdadero Kristianismo bíbliko i mayoria di e kultonan “Kristian”. Salbashon ta pa medio di fe so òf pa medio di fe ku obranan tambe? Mi ta salbá dor di solamente kere den Hesus, òf mi mester kere den Hesus i hasi sierto kosnan tambe?

E pregunta tokante salbashon pa medio di fe so òf fe ku obranan tambe, a wòrdu kompliká dor di pasashinan den Beibel ku ta difísil pa kompará ku otro. Kompará Romanonan 3:28, 5:1 i Galatanan 3:24 ku Hakobo 2:24. Tin hende ta mira un diferensha entre Pablo (salbashon ta pa medio di fe so) i Hakobo (salbashon pa medio di fe i obranan). Pablo dògmátikamente ta bisa ku hustifikashon ta pa medio di fe so (Efesionan 2:8-9), mientras Hakobo aparentemente ta bisa ku hustifikashon ta pa medio di fe ku obranan tambe. E ponensia aki por wòrdu aklará dor di eksaminá eksaktamente lokual Hakobo tabata papia di dje. Hakobo tabata deskomprobá e kreensha ku un persona por tin fe sin mester produsí bon obranan (Hakobo 2:17-18). Hakobo ta enfatisá riba e punto ku fe genuino den Kristu lo produsí un kambio den bida i bon obranan (Hakobo 2:20-26). Hakobo no tabata bisa ku hustifikashon ta bin di fe ku obranan, sino mas bien ku e persona ku ta hustifiká pa medio di fe kaba, lo hasi bon obranan durante su bida. Si un persona ta afirmá di ta un kreyente, pero e no tin niun bon obra den su bida, e ora ei e chèns ta grandi ku su fe den Kristu no ta genuino (Hakobo 2:14, 17, 20, 26).

Pablo ta bisa e mesun kos den su kartanan. E frutanan bon ku kreyentenan mester tin den nan bida ta wòrdu menshoná den Galatanan 5:22-23. Mesora despues ku Pablo a bisa nos ku nos ta salbá pa medio di fe so i no pa obranan (Efesionan 2:8-9), e ta informá nos ku nos a wòrdu kreá pa hasi bon obranan (Efesionan 2:10). Pablo tin e mesun ekspektativa di un bida kambiá manera Hakobo: “Un hende ku ta uní ku Kristu ta un kreashon nobo. E kosnan di ántes a pasa bai i loke ta nobo a yega” (2 Korintionan 5:17). Hakobo ku Pablo no a kontradesí otro den nan enseñansa tokante salbashon. Nan a trese e mesun tópiko dilanti vía diferente perspektiva. Pablo simplemente a enfatisá ku nos por wòrdu hustifiká pa medio di fe so, mientras Hakobo a pone énfasis riba e echo ku un fe legítimo den Kristu ta produsí bon obranan.



Bai bèk na home page di Papiamentu



Salbashon ta pa medio di fe so, òf pa medio di obranan tambe?