settings icon
share icon
Pregunta

Kiko Beibel ta bisa tokante dinosourio? Tin dinosourio den Beibel?

Kontesta


E tópiko di dinosourio den Beibel ta parti di un debate mas grandi ku ta sosediendo den komunidat Kristian ku ta enserá e edat di mundu, e interpretashon korekto di Génesis, i kon pa interpretá e evidensianan físiko ku nos ta topa rònt di nos. Esnan ku ta kere ku mundu tin un edat mas grandi ta pensa ku Beibel no ta menshoná dinosourio, paso segun nan kreensha, e dinosourionan a muri miyones di añanan promé ku e promé hòmber a bini riba mundu. E hòmbernan ku a skirbi Beibel lo no por a eksperensiá e dinosourionan na bida.

Esnan ku ta kere ku mundu tin un edat mas yòn ta kere ku Beibel ta menshoná dinosourionan, aunke nunka e no ta uza e palabra “dinosourio”. Na su luga, e ta uza e palabra Hebreo tanniyn, kual a wòrdu tradusí den diferente manera den e Beibelnan ingles. Tin bia ta “mònster di laman,” i tin bia ta “serpiente”. Tambe ta komun ku nan ta wòrdu tradusí komo “dragón”. Aparentemente e tanniyn lo tabata un tipo di rèptil gigante. E kreaturanan aki a wòrdu menshoná kasi trinta bia den Tèstamènt Bieu i nan tabata biba tantu riba tera komo den laman.

Ademas ku Beibel ta hasi menshon di e rèptil gigantenan aki, E ta deskribí un par di kreatura na un manera ku ta pone algun sientífiko pensa ku e eskritornan tabata deskribiendo dinosourionan. Tin pará ku e behemot ta e animal di mas poderoso di tur e kreaturanan di Dios, e ta un gigante i su rabu ta paresido na un palu di seder (Job 40:15). Algun sientífiko a purba identifiká e behemot komo un olefante òf un hipopótamo. Di un otro banda, otro sientífikonan ta bisa ku e dinosourionan mane brachiosourio i diplodokus tabatin rabu masha grandi mes i nan por a wòrdu kompará fasilmente ku un palu di seder.

Kasi tur sivilisashon di mundu antiguo tin algun tipo di arte ku ta ilustrá rèptilnan gigante. Petroglifo, ophetonan arkeólogo, i asta estatuanan chikí trahá di klèi a wòrdu deskubrí den Norteamérika ku ta parse dinosourio. Imágennan grabá den barankanan den Suramérika ta mustra un hende hòmber ta kore riba un kreatura paresído na un diplodokus, i, fasinantemente, nan ta parse e imágennan di kreaturanan manera triceratops, pterodactyl i tiranosourio rex. Mosaiknan romano, pòchinan trahá di klèi di e màyanan, i murayanan di e suidat Babilóniko tur ta testifiká tokante e fasinashon ku ser humano tin ku e kreaturanan aki, apesar di nan diferensia kultural i geográfiko. Historianan manera esun di Marco Polo “Il Milione” ta kontené kuentanan fasinante tokante bestianan ku ta stòk tesoro. Ademas di un gran montante di evidensia antropológiko i históriko pa e koeksistensia di dinosourio ku ser humano, tambe tin evidensianan físiko di esaki, manera e imprenta di pia di tantu ser humano komo dinosourio ku a wòrdu deskubrí huntu na luganan den Nortamérika i Asia Wèst-Sentral.

Awor, tin dinosourio den Beibel? E kestion aki no a wòrdu resolvé ainda. Ta dependé kon abo ta interpretá e evidensianan ku tin optenibel i kon abo ta mira e mundu rondó dibo. Si Beibel wòrdu interpretá literalmente, esaki lo resultá den un interpretashon ku mundu ta yòn, i e idea ku dinosourionan i ser humano tabata koeksistí ta aseptabel. Si dinosourionan i ser humano tabata koeksistí, kiko a pasa ku e dinosourionan? Aunke Beibel no ta papia tokante e asuntu aki, hopi chèns e dinosourionan tabata den ekstinshon un tempu despues di e inundashon, posiblemente dor di un kombinashon di kambionan dramátiko den medioambiente i e echo ku nan tabata wòrdu kònstant di jag dor di ser humano.

English



Bai bèk na home page di Papiamentu

Kiko Beibel ta bisa tokante dinosourio? Tin dinosourio den Beibel?
Facebook icon Twitter icon Pinterest icon Email icon
© Copyright Got Questions Ministries