Kiko ta pasa despues di morto?



Pregunta: Kiko ta pasa despues di morto?

Kontesta:
Den fe Kristian, tin hopi konfushon tokante loke ta pasa despues di morto. Tin hende ta pensa ku despues di morto, tur hende ta “drumi” te dia huisio final, i despues tur hende ta wòrdu mandá sea shelu of fièrnu. Otronan ta kere ku na momentu ku morto tuma luga, e persona lo wòrdu husgá instantáneamente i lo wòrdu mandá na su destinashon eterno. Tambe, otronan ta afirmá ku ora hende muri, nan alma/spiritu ta wòrdu mandá na un shelu òf fièrnu “temporal”, pa warda riba e resurekshon final, e huisio final, i despues e fin di nan destinashon eterno. Awor, kiko Beibel ta bisa eksaktamente ku ta pasa despues di morto?

Na promé luga, pa esnan ku ta kere den Hesu-Kristu, Beibel ta bisa nos ku despues di morto, e kreyentenan nan alma/spiritu ta bai shelu, pasobra nan pikánan a wòrdu pordoná dor ku nan a risibí Kristu komo nan Salbador (Huan 3:16, 18, 36). Pa e kreyentenan, morto ta “sali fo’i kurpa i bai kas serka Señor” (2 Korintionan 5:6-8; Filipensenan 1:23). Es mas, pasashinan manera 1 Korintionan 15:50-54 i 1 Tesalonisensenan 4:13-17 ta deskribí kreyentenan ku ta wòrdu resurektá i risibí kurpanan glorifiká. Si kreyentenan ta bai serka Kristu mesora despues di morto, kiko ta e propósito di e resurekshon aki? Ta parse ku mientras e almanan/spiritunan di e kreyentenan ta bai serka Kristu mesora despues di morto, e kurpa físiko ta keda den e graf “drumí”. Na momentu ku e resurekshon di e kreyentenan tuma luga, e kurpanan físiko ta wòrdu resurektá, glorifiká i despues reuní huntu ku nan alma/spiritu. E reunion i glorifikashon di kurpa-alma-spiritu lo ta e poseshon di e kreyentenan pa eternidat den e shelunan nobo i tera nobo (Revelashon 21:22).

Pa di dos, esnan ku no a risibí Hesu-Kristu komo nan Salbador, morto ta nifiká kastigu infinito. Pero, similarmente na e destino di kreyentenan, e hendenan ku no ta kreyente aparentemente tambe ta wòrdu hibá mesora na un luga temporal, kaminda nan ta warda riba nan resurekshon final, huisio i destino eterno. Lukas 16:22-23 ta deskribí un hòmber riku ku a wòrdu tormentá mesora despues di morto. Revelashonnan 20:11-15 ta deskribí kon tur e hendenan morto ku no ta kreyente ta wòrdu resurektá, husgá na e trono grandi koló blanku i despues tirá den e laman di kandela. E hendenan ku no ta kreyente, e ora ei, no ta wòrdu mandá fièrnu mesora despues di morto, pero mas bien nan ta bai na un luga temporal di huisio i kondenashon. Pero, maske ku e hendenan ku no ta kreyente no ta wòrdu mandá na e laman di kandela mesora, nan destino despues di morto no ta unu plasentero. E hòmber riku a dal un gritu i bisa, ’’mi ta den agonia den e kandela akí.” (Lukas 16:24).

P’esei, despues di morto, un persona ta residensiá den un shelu òf fièrnu ’’temporal’’. Despues di e luga temporal aki, ora di e resurekshon final, e destino eterno di un persona lo no kambia. E “luga” spesífiko di e destinashon eterno si ta kambia. Kreyentenan lo haña entrada na e shelunan nobo i tera nobo (Revelashon 21:1). Hendenan ku no ta kreyente lo wòrdu mandá na e laman di kandela (Revelashon 20:11-15). Esakinan ta e delaster destinashonnan eterno pa tur hende- kual ta kompletamente basá riba si nan a konfia solamente den Hesu-Kristu pa nan salbashon òf no (Mateo 25:46; Huan 3:36).



Bai bèk na home page di Papiamentu



Kiko ta pasa despues di morto?