settings icon
share icon
Pregunta

Mi a kaba di pone mi fe den Hesus... i awor kiko?

Kontesta


Pabien! Bo a tuma un desishon ku lo kambia bo bida! Porta bo ta puntrando bo mes, “I awor kiko? Kon mi ta kuminsá mi bida nobo ku Dios?” E sinku pasonan menshoná akibounan lo dunabu direkshon for di Beibel. Sí bo tin pregunta tokante bo bida nobo, porfabor bishitá www.GotQuestions.org/Papiamentu.

1. Wak pa bo ta sigur ku bo ta komprondé salbashon.

1 Huan 5:13 ta bisa nos, “Mi ta skibi boso e kosnan aki, pa boso sa sigur ku boso tin bida eterna, boso ku a pone boso konfiansa den e Yu di Dios.” Dios ke pa nos komprondé salbashon. Dios ke pa nos tin e siguridat di sa sigur si nos ta salbá. Den kòrtiku, laga nos rekapitulá e puntonan klave di salbashon:

(a) Nos tur a peka. Nos tur a yegá di hasi kosnan ku ta desagradabel pa Dios (Romanonan 3:23).

(b) Dor di nos piká, nos ta meresé di wordu kastigá ku separashon eterno fo'i Dios (Romanonan 6:23).

(c) Hesus a muri na krus pa paga e kastigu di nos pikánan (Romanonan 5:8; 2 Korintionan 5:21). Hesus a muri na nos lugá, tumando e kastigu ku nos ta meresé. Hesus su resurekshon ta prueba ku Su morto tabata sufisiente pa paga nos pikánan.

(d) Dios ta duna pordon i salbashon na tur ku pone nan fe den Hesus – í konfiá ku Su morto ta e pago pa nos pikánan (Huan 3:16; Romanonan 5:1; Romanonan 8:1).

Esei ta e mensahe di salbashon! Si bo a pone bo fe den Hesu-Kristu komo bo Salbador, bo ta salbá! Tur bo pikánan ta pordoná, i Dios ta primintí di nunka bandonabu ni lagabu na kaya (Romanonan 8:38-39; Mateo 28:20). Korda, bo salbashon ta sigur den Hesu-Kristu (Huan 10:28-29). Si bo ta konfiándo solamente den Hesus komo bo Salbador, bo tin e siguridat ku lo bo pasa eternidat huntu ku Dios den shelu!

2. Buska un bon misa ku ta duna siñansa segun Beibel.

No konsidera iglesia komo djis un edifisio. Iglesia ta e hendenan. Ta hopi importante pa kreyentenan den Hesu-Kristu tin komunion ku otro. Esaki ta un dje propósitonan primario di iglesia. Awor ku bo a pone bo fe den Kristu-Hesus, nos ta enkurashabu hopi pa bo buska un misa ku ta kere den Beibel den bo besindat i papia ku e pastor. Lag’é sa tokante di bo fe nobo den Hesu-Kristu.

E di dos propósito di misa ta duna siñansa di Beibel. Bo por siña kon pa apliká Dios su instrukshonan den bo bida. Komprondiendo Beibel ta e klave pa por hiba un bida Kristian eksitoso i poderoso. 2 Timoteo 3:16-17 ta bisa, “Henter Skritura ta inspirá pa Dios i ta útil pa duna siñansa, refutá, koregí i pa instruí kon pa biba un bida rekto, di manera ku e hende ku ta sirbi Dios, por ta kualifiká i bon prepará pa hasi tur sorto di bon obra.”

E di tres propósito di misa ta adoráshon. Adoráshon ta nifiká yama Dios danki pa tur kos ku El a hasi! Dios a salba nos. Dios ta stima nos, Dios ta perkurá pa nos. Dios ta guia i dirigí nos. Kon nos por keda sin yam’É danki? Dios ta santu, hustu, amoroso, mizerikordioso, i yen di grasia. Revelashon 4:11 ta deklará, “Señor, nos Dios, Bo ta digno di risibí gloria, honor i poder pasobra Bo a krea tur kos; dor di bo boluntat tur kos a kuminsá eksistí i a keda kreá.”

3. Pone tempu un banda tur dia pa enfoká riba Dios.

Ta hopi importante pa tur dia nos dedika tempu na Dios. Tin hende ta yama esaki un “ora silensioso”. Otronan ta yame “deboshon”, pasobra ta un ora ku nos ta uza pa deboshona nos mes na Dios. Tin hende ta preferá saka tempu meinta, miéntras otronan ta preferá anochi. No ta importa kon bo ta yama e tempu aki ní ki ora bo hasié. Loke sí ta importante ta pa bo dedika tempu na Dios regularmente. Kon nos por dedika tempu na Dios?

(a) Orashon. Orashon ta simplemente papia ku Dios. Papia ku Dios tokante bo preokupashonan i problemanan. Pidi Dios dunabu sabidoria i guiansa. Pidi Dios perkurá pa tur bo nesesidatnan. Bisa Dios kuantu bo ta stim’É i kuantu bo ta apresia tur loke E ta hasi pabo. Esei ta tur loke orashon ta ensera.

(b) Lesamentu di Beibel. Ademas di haña enseñansa di Beibel na misa, zondagschool, i/òf estudio di Beibel – bo mes mester lesa Beibel riba bo mes. Beibel ta kontené tur kos ku bo mester sa pa bo por hiba un bida Kristian eksitoso. Eiden tin Dios su guiansa pa yudabu tuma desishonnan sabio, kon pa siña otro hende di Dios, i kon pa bo krese spiritualmente. Beibel ta Dios su Palabra pa nos. Beibel ta Dios su instrukshon manual pa nos sa kon pa biba nos bida den un manera ku ta agradabel p’E í ku ta satisfasé nos.

4. Sera amistatnan ku hendenan ku por yudabu spiritualmente.

1 Korintionan 15:33 ta bisa nos, “No gaña boso mes: “Esun ku hunga ku lodo, ta susha su man!”” Beibel ta yena ku atvertensianan tokante e influensha ku “mal” hendenan por tin riba nos. Sí nos pasa tempu ku hendenan ku ta involví den aktividatnan pekaminoso, nos lo wordu tentá dor di e aktividatnan ei. E karákter di esunan ku ta rondó di nos lo “pega” na nos. P'esei ta hopi importante pa nos ta rondó di otro hendenan ku ta stima Señor i ku ta komprometé na djE.

Purba buska un òf dos amigu/a, kisas di bo iglesia, ku por yudabu i enkurashábu (Hebreonan 3:13; 10:24). Pidi bo amigunan pa bo duna kuenta na nan pa e tempu ku bo ta pasa den orashon, bo aktividatnan, i bo bida nobo ku Dios. Pidi nan pa bo tambe hasi esei pa nan. Esaki no ke men ku bo tinku kibra amistat ku bo amigunan ku no konosé Señor Hesus komo nan Salbador. Sigui den amistat kunan i stima nan. Simplemente laga nan sa ku Hesus a kambia bo bida i ku bo no por sigui hasi tur e kosnan ku bo tabata hasi antes. Pidi Dios dunabu oportunidatnan pa bo por papia ku bo amistatnan tokante di Hesus.

5. Batisá

Hopi hende tin malkomprondementu di boutismo. E palabra “batisá” ta nifiká bai bou di awa. Boutismo ta e manera Bibliko pa publikamente bo proklamá bo fe nobo den Kristu i bo determinashon pa sigui’É. E baimentu bou di awa ta nifiká ku bo ta wordu derá ku Kristu. Ora bo sali fo'i awa bèk ta simbolisa resurekshon di Kristu. Ora bo batisá bo ta identifika bo mes ku Hesus su morto, entiero i resurekshon (Romanonan 6:3-4).

Boutismo no ta salbabu. Boutismo no ta limpiabu di bo pikánan. Boutismo ta simplemente un akto di obediensia, un proklamáshon publiko ku bo tin fe den Kristu so pa salbashon. Boutismo ta importante pasobra e ta un akto di obediensia – publikamente deklarando bo fe den Kristu i bo fieldat na djE. Ora bo ta kla pa wordu batisá bo por papia ku un pastor.

English



Bai bèk na home page di Papiamentu

Mi a kaba di pone mi fe den Hesus... i awor kiko?
Facebook icon Twitter icon Pinterest icon Email icon
© Copyright Got Questions Ministries