Kiko ta e atributonan di Dios? Kon Dios ta?



Pregunta: Kiko ta e atributonan di Dios? Kon Dios ta?

Kontesta:
Beibel, e Palabra di Dios, ta splika nos kon Dios ta i tambe kon E no ta. Sin e outoridat di Beibel, kualkier intento pa splika e atributonan di Dios por wòrdu konsiderá simplemente komo un opinion, kual hopi biaha sa ta inkorekto, spesialmente ora un hende ke trata di komprondé Dios (Job 42:7). Ta sumamente importante pa nos purba komprondé kon Dios ta. Un fayo den esaki lo resultá den buskamentu i alabansa di diosnan falsu, kual ta kontrario di Dios Su boluntat (Éksodo 20:3-5).

Solamente loke Dios a skohe pa revelá di Su mes ta konosí. Un di e atributonan of kalidatnan di Dios ta “lus”, kual ta nifiká ku E mes ta revelá informashon di Su mes (Isaías 60:19; Hakobo 1:17). E echo ku Dios a revelá konosementu di Su mes no mester wòrdu neglishá (Hebreonan 4:1). Kreashon, Beibel i E Palabra ku a bira hende (Hesu-Kristu) lo yuda nos pa asina nos por haña sa kon Dios ta.

Laga nos kuminsá na komprondé ku Dios ta nos Kreador i ku nos ta parti di Su kreashon (Génesis 1:1; Salmonan 24:1) i ku nos a wòrdu kreá segun Su imágen. Ser humano tin e posishon mas haltu ku tur e otro kreashonnan i Dios a duna nos dominio riba dje (Génesis 1:26-28). E kreashon a wòrdu korumpí dor di e kaida di Adam, pero asina mes nos por haña un bista chikitu di Dios Su obra (Génesis 3:17-18; Romanonan 1:19-20). Dor di konsiderá e grandesa, kompleksidat, bunitesa i òrdu di kreashon, nos por haña un bista kon maravioso Dios ta.

Pa yuda nos den nos búskeda tokante kon Dios ta, nos ta bai repasá algún dje nòmbernan di Dios. Nan ta lo siguiente:

Elohim – Esun fuerte, divino (Génesis 1:1)
Adonai – Señor, kual ta indiká un relashon entre shon i un sirbidó (Éksodo 4:10,13)
El Elyon – Esun mas Haltu, Esun mas fuerte (Génesis 14:20)
El Roi – Esun fuerte ku ta wak (Génesis 16:13)
El Shaddai – Dios Todopoderoso (Génesis 17:1)
El Olam – Dios pa tur eternidat (Isaías 40:28)
Yahweh – Señor AMI TA, kual ta nifiká e Dios eterno, ku ta eksistí di Su mes (Éksodo 3:13, 14)

Dios ta eterno, kual ta nifiká ku E no tin ni kuminsamentu ni final i Su eksistensia lo no kaba nunka. E ta imortal i infinito (Deuteronomio 33:27; Salmonan 90:2; 1 Timoteo 1:17). Dios ta irevokabel, kual ta nifiká ku E no ta kambia nunka; esaki ta hasi ku nos por stens kompletu riba djE i ku E ta konfiabel (Malakías 3:6; Numbernan 23:19; Salmonan 102:26, 27). Dios ta inkomparabel; no tin ningun manera E, ni den obra, ni komo ser. E ta insurpasá i perfecto (2 Samuel 7:22; Salmonan 86:8; Isaías 40:25; Mateo 5:48). Dios no por wòrdu skrudiñá, E ta insondabel, inkomprendibel, inkalkulabel i ningun hende no por komprondé Dios kompletamente (Isaías 40:28; Salmonan 145:3; Romanonan 11:33, 34).

Dios ta hustu; E no ta hasi distinshon di persona, den e sentido ku E no ta mustra favoritismo (Deuteronomio 32:4; Salmonan 18:30). Dios ta omnipotente; E ta Todopoderoso i E por hasi tur loke E kier, pero Su akshonnan semper lo ta konsistente ku Su karákter (Revelashon19:6; Yeremías 32:17,27). Dios ta omnipresente, kual ta nifiká ku E tei tur kaminda, pero esaki no ta nifiká ku Dios ta tur kos (Salmonan 139:7-13; Yeremías 23:23). Dios ta omnisapiente, esaki ta nifiká ku E sa pasado, presente i futuro, kual ta inkluhí tur loke nos ta pensa den tur momento. Komo ku E sa tur kos, Su hustisia semper lo wòrdu administrá na un manera hustu (Salmonan 139:1-5; Proverbionan 5:21).

Dios ta un solo Dios; no solamente no tin ningun otro, pero ta E so tin e poder pa konsedé nos e deseonan i anhelonan di mas profundo ku tin den nos kurasonnan. Dios ta e úniko ku ta meresé nos alabansa i devoshon (Deuteronomio 6:4). Dios ta hustu, esaki ta nifiká ku Dios no por ni lo no ignorá maldat. Ta dor ku Dios ta hustu, Hesus mester a eksperiensia e furia di Dios ora nos pikánan a wòrdu pone riba djE, pa asina nos por haña pordon pa nos pikánan. (Éksodo 9:27; Mateo 27:45-46; Romanonan 3:21-26).

Dios ta soberano, kual ta nifiká ku E ta supremo. Ni tur Su kreashonnan huntu no por kambia Su propósitonan (Salmonan 93:1; 95:3; Yeremías 23:20). Dios ta spiritu, esaki ta nifiká ku E ta invisibel (Huan 1:18; 4:24). Dios ta un Trinidad. Dios ta tres den un, di e mesun substansia, igual na poder i gloria. Dios ta e berdat, lo E keda inkorumpibel i E no por gaña (Salmonan 117:2; 1 Samuel 15:29).

Dios ta santu, kompletamente separá di tur impuresa moral i E ta kontra di nan tambe. Dios ta mira tur maldat anto e kosnan ei ta pon’E rabiá. Dios ta wòrdu konsiderá komo un kandela ku ta devorá tur kos (Isaías 6:3; Habakuk 1:13; Éksodo 3:2, 4-5; Hebreonan 12:29). Dios ta yen di grasia, i Su grasia ta inkluhí Su bondat, mizerikòrdia i amor. Si no tabata pa Dios Su grasia, Su santidat lo a ekskluhí nos di Su presensia. Danki Dios esaki no ta e kaso, pasobra ta Su deseo pa konosé kada un di nos personalmente (Éksodo 34:6; Salmonan 31:19; 1 Pedro 1:3; Huan 3:16, 17:3).

Komo ku Dios ta un Ser infinito, ningun ser humano por komprondelE kompletu, pero pa medio di e Palabra di Dios, nos por komprondé miho ken Dios ta i kon E ta. Laga nos tur sigui buska di Dios ku henter nos kurason (Yeremías 29:13).



Bai bèk na home page di Papiamentu



Kiko ta e atributonan di Dios? Kon Dios ta?