Kiko ta Kristianismo i kiko Kristiannan ta kere aden?



Pregunta: Kiko ta Kristianismo i kiko Kristiannan ta kere aden?

Kontesta:
E kreensia básiko di Kristianismo ta wòrdu resúmí den 1 Korintionan 15:1-4. Hesus a muri pa nos pikánan, El a wòrdu derá, El a resusitá anto pa medio di esaki tur hende ku ta pone nan fe den djE i asept’É ta haña salbashon. Loke ta hasi Kristianismo úniko kompará ku otro religionnan ta ku den Kristianismo nos relashon pa ku Dios ta mas importante ku praktikánan religioso. Na lugá di tene nos mes na lista di kosnan ku nos mester hasi of no mag di hasi, e meta di un Kristian ta pa kultivá un relashon íntimo ku Dios. E relashon aki ta posibel dor di e trabou ku Hesu-Kristu a hasi i e ministerio di Spiritu Santu.

Mas aleu di e kreensianan básiko aki, tin hopi mas kos ku ta, of por lo menos mester indiká, kiko Kristianismo ta i kiko un hende Kristian ta kere den dje. Kristiannan ta kere ku Beibel ta e palabra inspirá di Dios i e señansa di Beibel tin e outoridat final riba tur kos ku ta konserní nos fe i kustumbernan (2 Timoteo 3:16; 2 Pedro 1:20-21). Kristiannan ta kere den ùn Dios so ku ta eksistí den tres persona- E Tata, E Yu (Hesu-Kristu) i E Spiritu Santu.

Kristiannan ta kere ku ser humano a wòrdu kreá speshalmente pa nos tin un relashon ku Dios, pero piká a separá tur hende for di Dios (Romanonan 3:23; 5:12). Kristianismo ta siña nos ku Hesu-Kristu a kana riba tera, kompletamente Dios i tambe kompletamente humano (Filipensenan 2:6-11), i ku El a muri na krus. Kristiannan ta kere ku despues di e morto di Kristu, El a wòrdu derá i despues El a resusitá i ku awor E ta sinta na man drechi di E Tata, i ta hasi interseshon pa tur kreyente pa semper (Hebreonan 7:25). Kristianismo ta proklamá ku e morto di Hesus riba krus tabata sufisiente pa paga e debe ku tur hende tin di piká kompletamente, anto ta esaki ta loke ta restorá e relashon kibra ku tin entre Dios i ser humano (Hebreonan 9:11-14; 10:10; Romanonan 5:8; 6:23).

Kristianismo ta siña nos ku pa nos wòrdu salbá i asina drenta shelu despues di morto, nos mester pone nos fe kompletamente den e trabou kompletá ku Kristu a hasi riba krus. Si nos kere ku Kristu a muri na nos lugá i paga e preis di nos propio pikánan, anto lanta bek for di morto, e ora ei nos ta salbá. No tin nèt nada ku ningun hende por hasi pa meresé of ganá nan salbashon. Nos no por ta “bon sufisiente’ pa nos por agradá Dios riba nos propio forsa, pasobra nos tur ta pekador (Isaías 53:6; 64:6-7). No tin nada mas ku por wòrdu hasí, pasobra Kristu a hasi tur e trabou kaba! Ora E tabata riba krus, El a bisa, “Ta kumplí” (Huan 19:30), kual ta nifiká ku e trabou di salbashon a wòrdu kompletá.

Segun Kristianismo, salbashon ta trese liberashon di nos naturalesa pekaminoso i libertat pa nos por kultivá un miho relashon ku Dios. Kaminda antes nos tabata katibo di piká, awor nos ta katibo di Kristu (Romanonan 6:15-22). Mientras tantu ku kreyentenan ta biba riba e mundu aki ahinda den nan kurpa pekaminoso, nan lo tin un pelea konstantemente ku piká. Pero, Kristiannan por tin viktoria riba e pelea kontra piká, dor di studia i apliká e Palabra di Dios den nan bida i laga nan mes wòrdu dominá dor di Spiritu Santu – esaki ta nifiká, ku nan ta someté nan mes pa wòrdu gìa diario dor di e Spiritu bou di tur sirkumstansia.

Asina, mientras hopi sistemanan religioso ta eksigí pa un persona hasi of no hasi sierto kosnan, Kristianismo ta enserá ku nos ta pone nos fe den e morto di Kristu riba krus komo pago pa nos propio pikánan anto ku El a resusitá. Nos debe di piká a wòrdu pagá anto p’esei nos por tin komunion ku Dios. Nos por haña viktoria tambe riba nos naturalesa pekaminoso i kana den komunion i obedensia ku Dios. Esaki ta e berdadero Kristianismo bibliko.



Bai bèk na home page di Papiamentu



Kiko ta Kristianismo i kiko Kristiannan ta kere aden?