settings icon
share icon
Pregunta

Dios ta di bèrdat? Kon mi por sa sigur ku Dios ta di bèrdat?

Kontesta


Nos sa ku Dios ta di bèrdat, pasobra El a revelá Su mes na nos den tres manera: pa medio di kreashon, den Su Palabra i pa medio di Su Yu, Hesu-Kristu.

E prueba di mas básiko ku Dios ta eksistí, ta simplemente lokual El a traha. “For di tempu ku Dios a krea mundu, hende por komprondé klaramente kua ta e karakterístikanan invisibel di Dios, esta ku su poder no tin fin i ku enberdat E ta Dios. Hende por mira esaki den loke Dios a krea, p'esei nan no tin diskulpa.” (Romanonan 1:20). “Shelu ta kanta Dios su mahestat, firmamentu ta konta di obra di su man’’. (Salmonan 19:1).

Si bo mester topa un oloshi di man mei-mei di un tereno, lo bo no asumí ku el a djis “aparesé” di nada òf ku semper e tabata eksistí. Segun e diseño di e oloshi, lo bo asumí ku e tabatin un diseñadó. Pero tin un diseño hopi mas grandi i ku presishon rib’e mundu rònt di nos. E manera ku nos ta midi orario no ta basá riba oloshinan di man, sino riba Dios Su obra, e rotashon regular di mundu (anto e komponentenan radioaktivo di e cesium-133 atom). Universo ta presenta un gran diseño, anto esaki ta indiká ku tin un Gran DiseñadÓ.

Si bo a topa un mensahe den kódigo, lo bo purba kibra e kódigo. Lo asumí ku un hende inteligente a manda e mensahe, un hende ku a krea e kódigo. Kon kompliká e “kódigo” di ADN ku nos ta kana rònt kune den tur sélula di nos kurpa ta? Bo no ta haña ku e kompleksidat i propósito di ADN ta indiká ku tin un Eskritor Inteligente di e kódigo?

Dios no solamente a krea un mundu físiko asina kompliká i delikadamente formá; tambe El a hinka un sentido di eternidat den kurason di tur hende (Predikador 3:11). Ser humano tin un persepshon ku bida tin algu mas ayá ku nos no por komprondé, ku tin algu ku ta eksistí kual ta mas haltu ku e rutina di e mundu aki. Nos sentido di eternidat ta manifestá su mes den por lo menos dos manera: trahamentu di lei i alabansa.

Tur sivilisashon den historia a balorá sierto leinan moral, kual sorprendentemente ta basta similar den tur kultura. Por ehèmpel, e idea di amor ta wòrdu universalmente baluá, mientras e akto di gañamentu ta wòrdu universalmente kondená. E moral komun aki- e komprondementu mundano di bon i malu- ta señalá na un Ser Moral Supremo ku a duna nos e disernimentu aki.

Na e mesun manera, hendenan rònt mundu, sin importá kultura, semper a kultivá un sistema di alabansa. E opheto di alabansa por varia, pero e pensamentu ku tin un “poder mas ayá’’ ta algu di ser humano ku nos no por nenga. Nos tendensia pa alabá ta konsistente ku e echo ku Dios a krea nos “den Su propio imagen” (Génesis 1:27).

Tambe Dios a revelá Su mes na nos pa medio di Su Palabra, e Beibel. Durante henter Skritura, e eksistensia di Dios a wòrdu konsiderá komo un echo ku ta prueba su mes (Génesis 1:1; Éksodo 3:14). Ora un hòmber skirbi un outobiografía, e no ta pèrdè tempu dor di purba duna prueba di su propio eksistensia. Mesun kos, Dios no a hinka muchu tempu den dunamentu prueba di Su mes den Beibel. E naturalesa di Beibel ku ta trese kambio den hende su bida, e integridat i e milagernan ku a akompañá su skirbimentu mester ta sufisiente pa nos tira un bista mas djaserka.

E terser manera ku Dios a revelá Su mes ta pa medio di Su Yu, Hesu-Kristu (Huan 14:6-11). “Na kuminsamentu e Palabra tabat'ei kaba i e Palabra tabata huntu ku Dios; e Palabra tabata Dios mes. E Palabra a bira hende i a bin biba meimei di nos. Nos a mira su gloria, e gloria ku e tin di Tata komo úniko Yu, yen di bondat i fieldat’’ (Huan 1:1, 14; wak tambe Kolosensenan 2:9).

Durante e bida maravioso di Hesus, El a mantené Su mes perfektamente na tur e leinan di Tèstamènt Bieu i El a kumpli ku e profesíanan ku ta konserní e Mesias (Mateo 5:17). El a hasi inumerabel aktonan di kompashon, i milagernan den públiko pa outentiká Su mensahe i duna testimonio di Su dibinidat (Huan 21:24-25). Despues, tres dia despues di Su krusifikashon, El a lanta for di morto, kual ta un echo ku a wòrdu afirmá dor di míles di testigunan (1 Korintionan 15:6). E registrashon históriko ta abundante na “pruebanan” di e identidat di Hesus. Manera e apòstel Pablo a bisa, “E kosnan aki no a sosodé den un huki skondí” (Echonan 26:26).

Nos ta realisá ku semper bai lo tin sképtikonan ku tin nan propio ideanan tokante Dios ku lo tuma e evidensianan na kuenta. I tambe lo bai tin algun ku ningun kantidat di prueba lo no konvensé nan (Salmonan 14:1). Tur kos ta bini bèk riba fe (Hebreonan 11:6).

English



Bai bèk na home page di Papiamentu

Dios ta di bèrdat? Kon mi por sa sigur ku Dios ta di bèrdat?
Facebook icon Twitter icon Pinterest icon Email icon
© Copyright Got Questions Ministries