Kiko ta nifiká ku Dios ta amor?



Pregunta: Kiko ta nifiká ku Dios ta amor?

Kontesta:
Laga nos wak kon Beibel ta deskribí amor, i despues nos ta tira un bista riba algun maneranan ku Dios ta e esensia di amor. “Amor sa di soportá i ta bondadoso, e no ta envidioso; amor no sa broma, ni ta orguyoso. E no ta grosero, ni egoista; e no sa rabia lihé, ni warda renkor; e no ta keda kontentu ku inhustisia, pero ku bèrdat sí. Amor semper ta perseverá, semper ta kere, semper ta spera i keda soportá. Amor ta dura pa semper (1 Korintionan 13:4-8a). Esaki ta Dios su deskripshon pa amor, i paso Dios ta amor (1 Huan 4:8), asin’aki E ta.

Amor (Dios) no ta fòrsa Su mes riba niun hende. Esnan ku bini serka djE ta hasi esaki komo reakshon riba Su amor. Amor (Dios) ta mustra amabilidat na tur hende. Amor (Hesus) a hasi bon obra serka tur hende sin niun preferensia. Amor (Hesus) no tabata envidiá loke otro hendenan tabatin, El a biba un bida humilde sin keha. Amor (Hesus) no tabata broma ku su identidat, maske ku E por a dominá tur hende ku E por a bini den kontakto kuné. Amor (Dios) no ta eksigí obediensia. Dios no a eksigí obediensia di Su Yu, sino, Hesus gustosamente a obedesé Su Tata den shelu. “ma mundu mester sa ku Mi ta stima Tata i ku Tata ta stima Mi i ku Mi ta hasi loke Tata manda Mi hasi” (Huan 14:31). Amor (Hesus) tabata/ta semper tene e bienestar di otro hendenan na kuenta.

E ekspreshon di mas grandi di Dios su amor ta wòrdu komuniká ku nos den Huan 3:16: “Pasobra Dios a stima mundu asina tantu ku El a duna su úniko Yu, pa tur esnan ku kere den djE no bai pèrdí, ma haña bida eterno.” Romanonan 5:8 ta proklamá e mesun mensahe: “Dios sí ta demostrá su amor pa nos dor ku Kristu a muri pa nos miéntras nos tabata pekadó ainda.” Nos por mira di e versíkulonan aki ku Dios su deseo di mas grandi ta pa nos djòin E den Su kas eterno, shelu. El a hasi esaki posibel dor di paga e prèis di nos pikánan. El a stima nos paso El a skohe esaki komo un akto di Su boluntat. Amor ta pordoná. “Pero si nos atmití nos pikánan abiertamente, Dios ku ta fiel i hustu ta pordoná nos e pikánan ei i purifiká nos di tur tur maldat.” (1 Huan 1:9).

Awor, kiko ta nifiká ku Dios ta amor? Amor ta un atributo di Dios. Amor ta un aspekto prinsipal di e karakter di Dios, Su Persona. Amor di Dios no ta trese konflikto den ningun manera ku Su santidat, hustisia, òf asta Su rabia. Tur atributo di Dios ta perfektamente den harmonia ku otro. Tur loke Dios hasi ta amoroso, meskos ku tur loke ku E hasi ta hustu i bon. Dios ta e ehèmpel perfekto di amor berdadero. Maraviosamente, Dios a duna esnan ku a risibí Su Yu Hesus komo nan Salbador personal, e abilidat pa stima meskos ku E ta stima, pa medio di e poder di Spiritu Santu (Huan 1:12; 1 Huan 3:1, 23-24).



Bai bèk na home page di Papiamentu



Kiko ta nifiká ku Dios ta amor?