Ainda Dios ta papia ku nos awendia?



Pregunta: Ainda Dios ta papia ku nos awendia?

Kontesta:
Den Beibel tin pará ku Dios a papia oudibel ku hende hopi bia (Éksodo 3:14; Yozue 1:1; Huesnan 6:18; 1 Samuel 3:11; 2 Samuel 2:1; Job 40:1; Isaías 7:3; Yeremías 1:7; Echonan 8:26; 9:15 – esakinan ta djis un par di ehèmpel). No tin ningun motibu bíbliko dikon Dios lo no por papia oudibel ku un persona awendia. Di tur e bianan ku Beibel ta menshoná ku Dios a papia ku hende, nos mester tene na kuenta ku esaki a sosodé durante 4000 aña di historia humano. Ta un eksepshon ku Dios ta papia oudiblemente, no e norma. Asta e partinan den Beibel ku ta menshoná ku Dios a papia, no ta den tur kaso ta evidente ku ta trata di un stèm oudibel, un stèm interno, òf un impreshon mental.

Dios ta papia ku hende awendia. Pa di promé, Dios ta papia ku nos atraves di Su Palabra (2 Timoteo 3:16-17). Isaías 55:11 ta bisa nos, “Asina tambe ta pasa k'e palabra fo'i mi boka. E no ta bolbe serka Mi sin a logra su meta. E ta bolbe te ora e kumpli ku mi boluntat i alkansá e meta ku Mi a pone p'e’”. Beibel ta e Palabra di Dios, i eiden tin pará tur loke nos mester sa pa por wòrdu salbá i pa biba e bida di un Kristian. 2 Pedro 1:3 ta deklará, “Su poder dibino a duna nos tur loke nos mester pa hiba un bida dediká na Dios pa medio di nos konosementu di Esun ku a yama nos dor di su mes gloria i obra maravioso.”

Dios tambe por “papia” ku nos pa medio di eventonan – por ehèmpel, E por guia nos dor di adaptá nos sirkunstansianan. I Dios ta yuda nos diserní bon i malu pa medio di nos konsenshi (1 Timoteo 1:5; 1 Pedro 3:16). Dios ta den e proseso di konformá nos mentenan pa pensa Su pensamentunan (Romanonan 12:2). Dios ta permití eventonan pasa den nos bida pa dirigí nos, kambia nos, i yuda nos krese spiritualmente (Hakobo 1:2-5; Hebreonan 12:5-11). 1 Pedro 1:6-7 ta rekordá nos, “P'esei boso ta yen di alegria, ounke por ta ku awor akí ta nesesario pa boso pasa den tristesa pa un tempu kòrtiku, pa motibu di tur sorto di prueba. No ta asina ku ta den kandela sa tèst kalidat di oro, oro ku un dia ta kaba na nada? Meskos asina boso fe, ku tin muchu mas balor ku oro, ta pasa den prueba pa tèst su kalidat. Anto si boso fe pasa e prueba ku éksito, boso lo haña aprobashon, gloria i honor dia Hesu-Kristu bini.”

Tin bia Dios ta papia oudibel ku hende. Ta hopi dudoso si, ku esaki ta sosodé asina frekuentemente manera algun hende ta afirmá. Atrobe, asta den Beibel, ku Dios ta papia oudibel ta e eksepshon, no e norma. Si un hende afirmá ku Dios a papia kuné, semper kompará lokual a wòrdu bisá ku lokual Beibel ta bisa. Si Dios papia awendia, Su palabranan lo ta kuadra kompletamente ku loke El a bisa den Beibel (2 Timoteo 3:16-17). Dios no ta kontradesí Su mes.



Bai bèk na home page di Papiamentu



Ainda Dios ta papia ku nos awendia?