Dikon Dios den Tèstamènt Bieu ta asina diferente for di Tèstamènt Nobo?



Pregunta: Dikon Dios den Tèstamènt Bieu ta asina diferente for di Tèstamènt Nobo?

Kontesta:
Na e raís dje pregunta aki tin un malkomprondementu fundamental di lokual tantu Tèstamènt Bieu komo Tèstamènt Nobo ta revelá tokante e naturalesa di Dios. Un otro manera pa ekspresá e mesun pensamentu básiko aki ta ora hende bisa, ”E Dios di Tèstamènt Bieu ta un Dios di rabia, miéntras e Dios di Tèstamènt Nobo ta un Dios di amor.” E echo ku Beibel ta e revelashon progresivo di Dios di Su mes Persona na nos pa medio di eventonan históriko i pa medio di Su relashon ku hende den henter historia por kontribuí na kibokashon tokante kon Dios ta den Tèstamènt Bieu kompará ku Tèstamènt Nobo. Pero, ora un hende lesa tantu e Tèstamènt Bieu komo e Nobo, ta bira evidente ku Dios no ta diferente for di un tèstamènt ku e otro i ku e ira di Dios i Su amor ta wòrdu revelá den tur dos tèstamènt.

Por ehèmpel, den henter Tèstamènt Bieu Dios a deklará ku E ta “un Dios generoso, klemente, ku pasenshi, bondadoso i fiel. (Éksodo 34:6; Numbernan 14:18; Deuteronomio 4:31; Nehemías 9:17; Salmonan 86:5, 15; 108:4; 145:8; Yoel 2:13). Asina mes den Tèstamènt Nobo, Dios su amor, amabilidat i mizerikòrdia a wòrdu manifestá ainda mas tantu pa medio di e echo ku “Dios a stima mundu asina tantu ku El a duna su úniko Yu, pa tur esnan ku kere den djE no bai pèrdí, ma haña bida eterno” (Huan 3:16). Den henter Tèstamènt Bieu, nos por mira tambe kon Dios ta atendé ku Israel na e mesun manera ku un tata amoroso ta atendé ku su yu. Ora nan a peka konsientemente kontra djE i kuminsa adorá ídolonan, Dios a kastigá nan. Asina mes, tur bia El a salba nan ora nan a repentí di nan idolatria. Esaki ta e mesun manera ku Dios ta atendé ku Kristiannan den Tèstamènt Nobo. Por ehèmpel, Hebreonan 12:6 ta bisa nos ku “Señor ta koregí esun ku E ta stima, E ta kastigá tur esnan ku E ta aseptá komo yu.’”

Na un manera similar, den henter Tèstamènt Bieu nos ta mira huisio i ira di Dios deramá riba piká. Na e mesun manera, den Tèstamènt Nobo nos por mira ku e ira di Dios ainda ta wòrdu revelá “for di shelu, ta laga nos sa kon E ta kastigá tur piká i maldat di hende ku, dor di un bida malbado, ta stroba su bèrdat di sali na kla.” (Romanonan 1:18). P’esei klaramente, Dios no ta diferente den Tèstamènt Bieu ku E ta den Tèstamènt Nobo. Dios su propio naturalesa ta inmutativo (no por kambia). Mientras nos por kisas mira un aspekto di Su naturalesa wòrdu revelá den sierto pasashinan di Skritura mas tantu ku otro aspektonan, Dios mes no ta kambia.

Segun ku nos ta lesa i studia Beibel, ta bira bon kla ku Dios ta e mesun den Tèstamènt Bieu ku E ta den e Nobo. Maske ku Beibel ta konsistí di 66 bukinan individual ku a wòrdu skirbí den dos (òf posiblemente tres) kontinente, den tres diferente idioma, durante un periodo di aproksimadamente 1500 aña dor di mas ku 40 outor, e ta keda un buki unifiká for di kuminsamentu te fin sin niun kontradikshon. Den dje nos ta mira kon un Dios amoroso, mizerikordioso i hustu ta atendé ku hende pekaminoso den yen tipo di situashon. Berdaderamente, Beibel ta Dios su karta di amor pa ser humano. Dios su amor pa Su kreashon, spesialmente ser humano, ta evidente den henter Skritura. Den henter Beibel nos por mira kon Dios yen di amor i mizerikòrdia ta yama hende pa forma un relashon spesial kun’É, no paso nan ta meresé, sino paso E ta un Dios yen di grasia i mizerikòrdia, kompasivo i tierno, yen di pasenshi i bondat amoroso i bèrdat. Na e mesun momentu nos ta mira un Dios santu i hustu, ku ta e Hues di tur esnan ku ta desobedesé Su Palabra i nenga di ador’É, i na su luga adorá diosnan di nan propio kreashonnan (Romanonan kaptítulo 1).

Dor di e karakter hustu i santu di Dios, tur piká – pasado, presente i futuro- mester wòrdu husgá. Pero Dios den su amor infinito a proveé un pago di piká i un manera pa rekonsiliá pa asina hende pekaminoso por skapa di Su ira. Nos ta mira e bèrdat maravioso aki den versíkulonan manera 1 Huan 4:10: “T'esaki ta amor: no ta nos a stima Dios promé, sino t'É a stima nos i a manda su Yu pa E bira e sakrifisio pa pordon di nos pikánan.” Den Tèstamènt Bieu, Dios a proveé un sistema di sakrifisio kaminda e hendenan por haña pordon di piká. Pero, e sistema di sakrifisio aki tabata solamente temporal miéntras nan tabata warda riba e benida di Hesu-Kristu ku lo muri riba krus pa paga pa pordon pa piká kompletamente. E Salbador ku a wòrdu prometé den Tèstamènt Bieu a wòrdu revelá kompletamente den Tèstamènt Nobo. Den Tèstamènt Bieu e hendenan por a solamente imaginá, e ekspreshon apsoluto di Dios su amor, ku El a manda Su Yu Hesu-Kristu, ku a wòrdu revelá den tur Su gloria den Tèstamènt Nobo. Tantu e Tèstamènt Bieu komo e Nobo tei pa “duna bo e sabiduria ku ta hiba na salbashon” (2 Timoteo 3:15). Ora nos studia e Tèstamèntnan mas djaserka, ta evidente ku Dios “sí no ta kambia nunka manera nan; E no ta kambia di posishon, laga nos den sombra di skuridat” (Hakobo 1:17).



Bai bèk na home page di Papiamentu



Dikon Dios den Tèstamènt Bieu ta asina diferente for di Tèstamènt Nobo?