settings icon
share icon
Pregunta

E dibinidat di Kristu ta Bìbliko?

Kontesta


Aparte di e afirmashonnan spesífiko ku Hesus duna tokante Su mes persona, Su disípelnan tambe a rekonosé e dibinidat di Kristu. Nan a afirmá ku Hesus tabatin e derecho di pordoná pikánan - algu ku ta Dios so por hasi - pasobra piká ta ofendé Dios (Echonan 5:31; Kolosensenan 3:13; Salmonan 130:4; Yeremías 31:34). Paresido na e afirmashon aki, tin pará tambe ku Hesus lo ta Esun ku lo “husga bibu i morto” (2 Timoteo 4:1). Tomas a bisa Hesus, “Mi Señor i mi Dios!” (Huan 20:28). Pablo ta yama Hesus “gran Dios i Salbador” (Tito 2:13) i e ta indiká ku Hesus tabata eksistí den “forma di Dios” promé ku El a wòrdu enkarná (Filipensenan 2:5-8). Dios Tata ta bisa tokante Hesus: “Bo trono, Dios, t'ei pa semper, bo sèpter real ta un sèpter di hustisia” (Hebreonan 1:8). Huan ta bisa ku “Na kuminsamentu e Palabra tabat'ei kaba i e Palabra tabata huntu ku Dios; e Palabra [Hesus] tabata Dios mes” (Huan 1:1). Tin hopi ehèmpel di Skrituranan ku ta instruí e dibinidat di Kristu (tira un bista den Revelashonnan 1:17, 2:8, 22:13; 1 Korintionan 10:4; 1 Pedro 2:6-8; Salmonan 18:2; 95:1; 1 Pedro 5:4; Hebreonan 13:20), pero un di esakinan mes ta sufisiente prueba ku e siguidornan di Kristu tabata konsideré komo Dios.

Tambe Hesus a haña títulonan ku ta úniko na YHWH (e nòmber ofisial di Dios) den Tèstamènt Bieu. E título di “salbador” den Tèstamènt Bieu (Salmonan 130:7; Hoséas 13:14) ta wòrdu uzá pa Hesus den Tèstamènt Nobo (Tito 2:13; Revelashonnan 5:9). Hesus ta wòrdu yamá Emanuel - “Dios huntu ku nos” - den Mateo 1. Den Zakarías 12:10, YHWH ta esun ku ta bisa, “Nan lo hisa nan bista na Mi pa motibu di esun ku nan a hinka mata…” Pero Tèstamènt Nobo ta apliká esaki na e krusifikashon di Hesus (Huan 19:37; Revelashonnan 1:7). Si ta YHWH a wòrdu hinká i mirá, i Hesus tabata esun ku a wòrdu hinká i mirá, e ora ei Hesus ta YHWH. Pablo ta interpretá Isaías 45:22-23 dor di apliká Hesus na Filipensenan 2:10-11. Tambe, Hesus Su nòmber ta wòrdu uzá huntu ku Dios den orashon “Dios nos Tata i Señor Hesu-Kristu mustra boso su bondat i duna boso pas” (Galatanan 1:3; Efesionan 1:2). Esaki lo tabata blasfemoso si Kristu no tabata dibino. E nòmber di Hesus ta aparesé huntu ku Dios den e mandato di boutismo “den nòmber [singular] di Tata, di Yu i di Spiritu Santu” (Mateo 28:19; tira un bista tambe riba 2 Korintionan 13:14).

Aktonan ku ta Dios so por realisá ta wòrdu akreditá na Hesus. Hesus no solamente a lanta hende for di morto (Huan 5:21, 11:38-44) i a pordoná pikánan (Echonan 5:31, 13:38), sino El a krea i ta sostené universo tambe (Huan 1:2; Kolosensenan 1:16-17). Esaki ta bira mas evidente ora nos realisá ku YHWH a bisa ku E tabata Su so durante kreashon (Isaías 44:24). Tambe, Hesus ta poseé atributonan ku solamente un dibinidat por tin: eternidat (Huan 8:58), omnipresensia (Mateo 18:20, 28,20), omnisiensia (Mateo 16:21), i omnipotensia (Huan 11:38-44).

Awor, ta un kos ku un persona ta afirmá di ta Dios òf ku e ta tuma hende hasi chòmbòn dor di laga nan kere ku esei ta bèrdat, i ta algu totalmente distinto pa por prueba ku ta asina. Kristu a ofresé hopi milagernan komo prueba di Su afirmashon di ta dibino. Algun di e milagernan ku Hesus a hasi ta inkluhí ku El a kombertí awa den biña (Huan 2:7), El a kana riba awa (Mateo 14:25), El a multipliká ophetonan físiko (Huan 6:11), El a kura hendenan siegu (Huan 9:7), lam (Marko 2:3), i enfermonan (Mateo 9:35; Marko 1:40-42), i asta El a lanta hende for di morto (Huan 11:43-44; Lukas 7:11-15; Marko 5:35). Es mas, Kristu mes a lanta Su mes for di morto. E ta leu for di e supuesto diosnan pagano ku ta muri i lanta den mitologia, otro religionan no ta afirmá nada ku por wòrdu kompará ku e resurekshon, i ningun otro afirmashon no tin asina tantu konfirmashon pafó di nan eskrituranan.

Tin porloménos diesdos echonan históriko di Hesus ku asta sientífikonan ku no ta Kristian lo admití:

1. Hesus a muri dor di krusifikashon.
2. El a wòrdu derá.
3. Su morto a pone ku Su disípelnan a bira desesperá i nan pèrdè speransa.
4. E graf di Hesus a wòrdu deskubrí (òf a wòrdu afirmá ku el a wòrdu deskubrí) blo bashi un par di dia despues.
5. E disípelnan tabata sigur ku nan a eksperensia aparishonnan di Hesus despues ku El a resusitá.
6. Despues di esaki, e disípelnan a wòrdu transformá di hendenan dudoso den kreyentenan balente.
7. E mensahe aki tabata e mensahe sentral ku tabata wòrdu prediká den Misa e tempu ei.
8. E mensahe aki a wòrdu prediká na Herusalèm.
9. Komo resultado di e predikashi aki, e Misa a nase i el a krese.
10. Dia di Resurekshon, djadumingu, a remplasá Sabat (djasabra) komo dia di alabansa.
11. Hakobo, un sképtiko, a wòrdu kombertí dor ku e tabata sigur ku el a mira Hesus despues ku El a resusitá.
12. Pablo, un enemigu di Kristianismo, a wòrdu kombertí dor di un eksperensia, e tabata sigur ku el a mira un aparishon di Hesus despues ku El a resusitá.

Si te na ora un hende ta kontra di e lista spesífiko aki, ta algun dje puntonan aki so ta nesesario pa proba e resurekshon i establesé e evangelio: Hesus Su morto, entiero, resurekshon i aparishonnan (1 Korintionan 15:1-5). Mientras tin algun teoria ku ta purba splika un òf dos di e echonan ku a wòrdu menshoná mas ariba, ta e resurekshon so por splika i aklará nan tur. Kritikonan ta admití ku e disípulonan a afirmá ku nan a mira Hesus despues ku El a resusitá. Ni mentira ni halusinashonnan no por transformá hende manera e resurekshon. Pa di promé, kiko nan lo a gana? Kristianismo no tabata popular i sigur nan no tabata gana bon sèn kune. Pa di dos, mentirosonan no por ta un bon mártir. No tin un miho motibu ku e resurekshon, pa kual e disípulonan tabata dispuesto pa muri mortonan bastante kruel pa motibu di nan fe. Si, hopi hende ta muri pa mentiranan ku nan ta pensa ta bèrdat, pero hende no ta muri pa algu ku nan sa ku no ta bèrdat.

Pa konkluhí, Kristu a afirmá ku E tabata YHWH, ku e tabata dibino (no djis “un dios”, sino e úniko Dios berdadero); Su siguidornan (Hudionan ku mester tabata tin yen miedu di idolatria) tabata kere den djE i tabata refiri’É komo Dios. Kristu a komprobá su afirmashonnan di ta dibino pa medio di milagernan, kual ta inkluhí e resurekshon ku a kambia mundu. No tin ningun otro hipótesis ku por splika e echonan aki. Si, dibinidat di Kristu ta bíbliko.

English



Bai bèk na home page di Papiamentu

E dibinidat di Kristu ta Bìbliko?
Facebook icon Twitter icon Pinterest icon Email icon
© Copyright Got Questions Ministries