Partisipashon na weg’i plaka ta piká? Kiko Beibel ta bisa tokante weg’i plaka?



Pregunta: Partisipashon na weg’i plaka ta piká? Kiko Beibel ta bisa tokante weg’i plaka?

Kontesta:
Beibel no ta spesífikamente kondená partisipashon na weg’i plaka, pustamentu, òf loteria. Beibel si ta avisá nos pa nos keda leu fo’i amor pa plaka (1 Timoteo 6:10; Hebreonan 13:5). Skritura tambe ta enkurashá nos pa keda leu fo’i atemptonan pa “gana plaka lihé” (Proverbionan 13:11; 23:5; Predikador 5:10). Weg’i plaka mayoria bia ta enfatisá e amor pa plaka i sigur sigur e ta tenta hende ku e promesa ku nan por bira riku lihé i fásilmente.

Ki tin di malu ku weg’i plaka? Weg’i plaka ta un kestion difísil, pasobra si e wòrdu hasí den moderashon i solamente okashonalmente, e ta un pèrdida di sèn, pero no nesesariamente algu malu. Hende ta gasta sèn na yen tipo di aktividatnan. Gastamentu di sèn na weg’i plaka no ta menos ni mas pihó ku wakmentu di un pelíkula (mayoria bia), komementu di un plato karu dimas, òf kompra di un opheto inútil. N’e mesun momentu, e echo ku sèn ta wòrdu gastá na otro kosnan no ta hustifiká partisipashon na weg’i plaka. Sèn no ta algu mester wòrdu malgastá. Sèn den ekseso mester wòrdu di spar pa nos futuro nesesidatnan òf invertí den e obra di Señor, i no na weg’i plaka.

Aunke Beibel no ta hasi menshon di weg’i plaka spesífikamente, e ta menshoná eventonan di “suerte” òf “chèns” si. Por ehèmpel, den Levítiko nan a uza lòt pa por skohe entre e chubatu pa nan sakrifiká i e Azazel. Yozue a tira lòt pa determiná kon pa parti e pais entre e varios tribunan. Nehemías a tira lòt pa por determiná ken lo biba den Herusalèm. E apòstelnan a tira lòt pa determiná ken lo remplasá Hudas. Proverbionan 16:33 ta bisa, “Hende ta purba suerte, pero ta SEÑOR ta disidí, kon e piedranan ta kai.”

Kiko Beibel lo a bisa tokante kasinonan i loterianan? Kasinonan ta uza yen tipo di táktikanan di merkadeo pa laga e partisipantenan riska mas tantu sèn posibel. Mayoria bia nan ta ofresé alkohòl barata òf gratis, kual ta enkurashá buracheria, i dor di esei, un abilidat redusí pa por tuma desishonnan na tinu. Tur kos den un kasino ta perfektamente inká den otro pa por tuma kantidatnan grandi di sèn i sin ofresé nada bèk akambio, solamente plasernan bashí i temporal. Loterianan ta presentá nan mes komo un manera pa funda edukashon i/òf programanan sosial. Pero, estudionan ku a wòrdu hasí ta mustra ku mayoria partisipante di loteria ta hendenan ku difísilmente por kubri e gastunan dje tíketnan. E idea di “bira riku lihé” ta un tentashon muchu grandi pa esnan ku ta desesperá. E chèns ku nan tin pa gana ta mínimo, kual hopi bia ta daña bida di hende.

Partisipashon na loto/loteria ta agradá Dios? Hopi hende ta bisa ku nan ta hunga loteria òf weg’i plaka pa asina nan por regalá e sèn na un misa òf un otro bon kousa. Aunke esaki por ta un bon intenshon, e realidat ta ku masha tiki ganashi di weg’i plaka ta bai ta na kosnan di Dios. Estudionan ku a wòrdu hasí ta mustra ku gran mayoria di e ganadónan di loteria, despues di un par di aña, ta resultá den un situashon finansiero pihó ku promé ku nan a gana e premio. Masha tiki, si no ta niun hende, ta berdaderamente regalá e sèn na un bon kousa. Es mas, Dios no mester di nos sèn pa funda Su mishon na mundu. Proverbionan 13:11 ta bisa, “Plaka hañá na un manera fásil i deshonesto ta bula bai, hende ku spar plaka pokopoko ta bira riku.” Dios ta soberano i lo proveé pa e nesesidatnan di e iglesia na maneranan honesto. Dios lo wòrdu honrá si E resibí donashon di sèn di droga òf sèn ku a wòrdu hortá na banko? Klaro ku no. Dios no tin mester ni E no ke sèn ku a wòrdu “hortá” di e hendenan pober ku a kai den tentashon di rikesa.

1 Timoteo 6:10 ta bisa nos, “Pasobra amor pa plaka ta rais di tur sorto di maldat. Tin hende ku tabata asina haragan pa plaka ku nan a desviá di fe i kousa nan mes kurason tur sorto di doló.” Hebreonan 13:5 ta deklará, “No biba pa plaka so, keda kontentu ku loke boso tin. Dios mes a bisa: ‘Mi no ta laga bo nunka bandoná.’” Mateo 6:24 ta proklamá, “Niun hende no por sirbi dos shon, pasobra lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i plaka tambe.”



Bai bèk na home page di Papiamentu



Partisipashon na weg’i plaka ta piká? Kiko Beibel ta bisa tokante weg’i plaka?