settings icon
share icon
Pregunta

Kiko Beibel ta siña nos tokante Trinidat?

Kontesta


E kos di mas difísil di e konsepto Kristian tokante Trinidat ta ku no tin niun manera pa splik’é adekuadamente. Trinidat ta un konsepto ku ta imposibel pa un ser humano komprondé kompletu, i sigur sigur e no por splik’é. Dios ta infinitamente mas grandi ku nos; p’esei, nos no mester ferwagt ku nos por komprond’É kompletamente. Beibel ta siña nos ku e Tata ta Dios, ku Hesus ta Dios, i ku Spiritu Santu ta Dios. Beibel tambe ta siña nos ku tin solamente un Dios. Aunke nos por komprondé algun echo tokante e relashon entre e diferente Personanan di Trinidat, pero na final, e ta inkomprensibel pa mente di ser humano. Pero, esaki no ta nifiká ku Trinidat no ta bèrdat òf ku e no ta basá riba e enseñansanan di Beibel.

Trinidat ta nifiká un solo Dios ku ta eksistí den tres Persona. Kòrda si ku esaki no ta sugerí den ningun sentido ku ta eksistí tres Dios. Tene na kuenta ku ora nos ta studia e tópiko aki, ku e palabra “Trinidat” no ta pará den Skritura. Esaki ta un término ku ta wòrdu uzá ora nos ke deskribí tres Dios den un – tres Persona ko-eksistente, ko-eterno ku ta un solo Dios. Lokual si ta importante ta, ku e konsepto ku ta representá e palabra “Trinidat” si ta eksistí den Skritura. Lo siguiente ta loke e Palabra di Dios ta bisa tokante Trinidat:

1) Un Dios so tin (Deuteronomio 6:4; 1 Korintionan 8:4; Galatanan 3:20; 1 Timoteo 2:5).

2) Trinidat ta konsistí di tres Persona (Génesis 1:1, 26; 3:22; 11:7; Isaías 6:8, 48:16, 61:1; Mateo 3:16-17, 28:19; 2 Korintionan 13:14). Den Génesis 1:1, e nòmber plural Hebreo Elohim ta wòrdu uzá. Den Génesis 1:26, 3:22, 11:7 i Isaías 6:8, e pronòmber “nos” ta wòrdu uzá. E palabra Elohim i e pronòmber “nos” ta den forma plural, kual den lenga Hebreo definitivamente ta referí na mas ku dos. Mientras esaki no ta un argumento spesífiko pa e Trinidat, tòg e ta indiká e aspekto di pluralidat di Dios. E palabra Hebreo pa Dios, Elohim, definitivamente ta kuadra ku Trinidat.

Den Isaías 48:16 i 61:1, e Yu ta papia mientras E ta referí na e Tata i Spiritu Santu. Kompará Isaías 61:1 ku Lukas 4:14-19 pa mira ku ta e Yu ta papiando. Mateo 3:16-17 ta deskribí e evento di boutismo di Hesus. Nos por mira den e pasashi aki ku Dios Spiritu Santu ta baha riba Dios Yu mientras Dios Tata ta proklamá Su legria den e Yu. Mateo 28:19 i 2 Korintionan 13:14 ta ehèmpelnan di tres persona distinkto den e Trinidat.

3) E miembronan di Trinidat ta wòrdu distinguí f’oi otro den varios pasashi. Den Tèstamènt Bieu, “SEÑOR” ta wòrdu distinguí for di “Señor” (Génesis 19:24; Hoséas 1:4). SEÑOR tin un Yu (Salmonan 2:7, 12; Proverbionan 30:2-4). E Spiritu ta distinguí for di “SEÑOR” (Numbernan 27:18) i for di “Dios” (Salmonan 51:10-12). Dios Yu ta wòrdu distinguí for di Dios Tata (Salmonan 45:6-7; Hebreonan 1:8-9). Den Tèstamènt Nobo, Hesus ta papia ku e Tata pa manda un Yudansa, e Spiritu Santu (Huan 14:16-17). Esaki ta mustra nos ku Hesus no tabata konsiderá Su mes Tata ni Spiritu Santu. Tene na kuenta tambe tur e otro bia nan den e Evangelio kaminda Hesus tabata papia ku e Tata. E tabata papia ku Su mes? No. E tabata papia ku un otro persona den e Trinidat – e Tata.

4) Kada miembro di Trinidat ta Dios. E Tata ta Dios (Huan 6:27; Romanonan 1:7; 1 Pedro 1:2). E Yu ta Dios (Huan 1:1, 14; Romanonan 9:5; Kolosensenan 2:9; Hebreonan 1:8; 1 Huan 5:20). E Spiritu Santu ta Dios (Echonan 5:3-4; 1 Korintionan 3:16).

5) Tin subordinashon den Trinidat. Skritura ta mustra nos ku Spiritu Santu ta subordiná na e Tata i e Yu, i e Yu ta subordiná na e Tata. Esaki ta un relashon interno i e no ta nenga e dibinidat di niun persona di e Trinidat. E ta simplemente un area kaminda nos mente ku ta limitá no por komprondé e Dios infinito. Pa mas informashon tokante e Yu, tira un bista riba Lukas 22:42, Huan 5:36, Huan 20:21, i 1 Huan 4:14. Tokante Spiritu Santu, tira un bista riba Huan 14:16, 14:26, 15:26, 16:7, i espesialmente Huan 16:13-14.

6) E miembronan individual di e Trinidat tin diferente tarea. E Tata ta e apsoluto fuente òf kousa di e universo (1 Korintionan 8:6; Revelashon 4:11); revelashon dibino (Revelashon 1:1); salbashon (Huan 3:16-17); i e obranan di Hesus komo ser humano (Huan 5:17, 14:10). E Tata ta inisiá tur e kosnan aki.

E Yu ta e representante ku e Tata ta uza pa hasi e siguiente obranan: e kreashon i e mantenshon di universo (1 Korintionan 8:6; Huan 1:3; Kolosensenan 1:16-17); revelashon dibino (Huan 1:1, 16:12-15; Mateo 11:27; Revelashon 1:1); i salbashon (2 Korintionan 5:19; Mateo 1:21; Huan 4:42). E Tata ta hasi tur e kosnan aki pa medio di e Yu, kual ta funshoná komo Su representante.

Spiritu Santu ta e medio ku e Tata ta uza pa hasi e siguiente obranan: kreashon i mantenshon di e universo (Génesis 1:2; Job 26:13; Salmonan 104:30); revelashon dibino (Huan 16:12-15; Efesionan 3:5; 2 Pedro 1:21); salbashon (Huan 3:6; Tito 3:5; 1 Pedro 1:2); i e obranan di Hesus (Isaías 61:1; Echonan 10:38). Esta, e Tata ta hasi tur e kosnan aki pa medio di e poder di Spiritu Santu.

Hopi atempto a wòrdu hasí pa krea ilustrashonnan di e Trinidat. Pero, niun dje ilustrashonnan popular no ta kompletamente korekto. E ilustrashon di webu (òf apel) ta robes, dor ku e ta bisa ku e kaska, blanku i dòl ta partinan di e webu, i no e webu mes, meskos ku e kaska, karni i simia ta parti di e apel, pero e no ta e apel mes. E Tata, Yu i Spiritu Santu no ta parti di Dios; kada un di nan ta Dios. E ilustrashon di awa ta algu mas miho, pero tòg e no ta deskribí e Trinidat adekuadamente. Líkido, vapor, i èis ta formanan di awa. E Tata, Yu, i Spiritu Santu no ta formanan di Dios, kada un ta Dios. P’esei, aunke e ilustrashonnan aki por duna nos un bista kon Trinidat ta, e imágen no ta totalmente korekto. Un Dios infinito no por wòrdu kompletamente deskribí dor di un ilustrashon limitá.

E dòktrina di Trinidat ta un kestion ku a trese hopi divishon durante henter e historia di iglesia Kristian. Aunke e aspektonan klave di e Trinidat ta klaramente presentá den Palabra di Dios, tin algun kos ku no ta masha kla. E Tata ta Dios, e Yu ta Dios, i e Spiritu Santu ta Dios – pero tin solamente un Dios. Esaki ta e dòktrina bíbliko di e Trinidat. Despues di esei, e kestionnan ta, te na un sierto límite, debatíbel i no esensial. Na luga di purba definí e Trinidat kompletamente ku nos mente humano ku ta limitá, ta miho nos konsentrá mas riba e echo di e grandesa di Dios i Su ser infinito. “Esta inkomprensibel Dios su rikesa, sabiduria i konosementu ta! Esta insondabel su plannan! Manera Skritura ta bisa:‘Ken a yega di sondia pensamentu di Señor? Esta ken komo konsehero por siñ'É algu?” (Romanonan 11:33-34).

English



Bai bèk na home page di Papiamentu

Kiko Beibel ta siña nos tokante Trinidat?
Facebook icon Twitter icon Pinterest icon Email icon
© Copyright Got Questions Ministries