Waat is eine Kristen?



Vraog: Waat is eine Kristen?

Antjwoord:
't Van Dale Woordebook geuf (in 't Holles) de volgende defenisie van eine Kristen: “beleijer van de Kristelikke godsdeens”. Dit is ein good beginpuntj óm te beginne te begriepe wat eine Kristen is, mer wie zoe dök gebeurt met wereldse defenisies, kin ouch dees defenisie de Biebelse waorheid neet good euverbringe van wat 't noe ech beteikent om eine Kristen te zeen.

't Woord Kristen waert in 't Nuuje Testament drie kier gebroek (Hanjelinge 11:26; Hanjelinge 26:28; 1 Petrus 4:16). Volgelinge van Jezes Kristes waerde veur 't iers “Kristeluuj” geneumd in Antiochië ( Hanjelinge 11:26), ómdet hun gedraag, hanjelinge en taalgebroek 'tzelfde waore es die van Kristes. In 't begin waerde deze naam door ongeleuvige miense oet Antiochië gebroek es eine kleinerende naam om de Kristeluuj belachelik te make. De naam beteikent lètterlik: “bie de partie van Kristes hure” of “eine aanhanger of volgeling van Kristes zeen”. En det liek väöl op wat 't woordebook zei.

Mer sjpietig genóg haet 't woord “Kristen” door de jaore haen väöl aan beteikenis verlaore. 't Waert noe dök gebroek veur miense die religieuze dinger doon of eine hoege morele sjtanderd aanhauwte, in plaats van eine echte opnuuj gebaore volgeling van Jezes Kristes. Väöl miense die neet in Jezes Kristes geluive en neet op Häöm vertroewe, zeen zichzelf toch es Kristeluuj, ómdet ze nao de kirk gaon of omdèt ze in ein “Kristelik landj” woene. Mer nao de kirk gaon, erme miense helpe of ein good miens zeen, maakt dich nog geine Kristen. Wie eine bekèndje evangelist oets zei: “Nao de kirk gaon maak van emes net zo zier eine Kristen es nao de graasj gaon van emes eine auto maak.” Lid zeen van ein kirk, mèt regelmaot nao ein kirkdeens gaon en geldj gaeve veur 't werk van de kirk... al die dinger kinne van dich gein Kristen make.

De Biebel liert ós det oos gooie werke d'r neet veur kinne zörge det veer door God geaksepteerd waere. Titus 3:5 vertèlt ós: “Neet ómdet veer 't verdeend höbbe, mer ómdet Hae mèt óntferme euver ós bewaoge waor en mitliej mèt ós hauw. Hae haet oos zunj aafgewasse, ós nuuj laeve gegaeve en ós vernuujd door de Heilige Geist.” Eine Kristen is dus emes dae door God opnuuj is gebaore (Johannes 3:3; Johannes 3:7; 1 Petrus 3:23) en zien geluif en vertroewe in Jezes Kristes haet gesjtèld. Efeziërs 2:8 vertèlt ós: “Door Zien genade zeet geer gered; doordet ger in Häöm zeet gaon geluive. Det is neet eur eige verdeenste, mer ein kado van God.” Eine echt Kristen is emes dae haet toegegaeve det d'r taege God haet gezunjigd, daovan tot inkier is gekómme, en noe zien geluif en vertroewe allein in Jezes Kristes haet gesjtèld. Det vertroewe is neet 'tzelfde es 't volge van ein religie of ein verzameling morele sjtanderde of ein liest van dinger die ver waal of neet moge doon.

Eine echte Kristen is eine miens dae zien vertroewe in de persoen van Jezus Kristes haet gesjtèld en dae geluif det Jezes aan 't kruus is gesjtórve óm veur oos zunj te betale, det D'r op de derde daag weer is opgesjtaon óm de doed te euverwinne en óm ederein dae in 'M geluif 't iewige laeve te gaeve. Johannes 1:12 zaet: “Maar alle miense die 'M waal geaksepteerd höbbe, haet Hae 't rech gegaeve óm kinjer van God te waere.” Eine echte Kristen is werkelik ein kindj van God, ein óngerdeil van Gods femielie en ein miens dae nuuj laeve haet óntvange van Kristes. 't Teike van eine echte Kristen is leefde veur angere miense en ein gehuurzaamheid aan Gods Woord (1 Johannes 2:4; 1 Johannes 2:10).

Höbs dich ein besjloet genómme veur Kristes door was se hie höbs gelaeze? Es det zoe is, klik den estebleef op de knoep "Jao, ich höb Jezes vandaag aangenómme".


Trök nao de Limburgse toespagina

Waat is eine Kristen?