Is Jezes God? Haet Jezes oets gezag det d'r God is?



Vraog: Is Jezes God? Haet Jezes oets gezag det d'r God is?

Antjwoord:
D'r is in de Biebel noets euver Jezes gesjreve det D'r lètterlik gezag haet: “Ich bèn God”. Toch beteikent det neet det D'r neet haet bewaerd God te zeen. Kiek bieveurbeeld 's nao de weurd van Jezes in Johannes 10:30: “De Vader en Ich zeen ein.” Op 't ierste gezich liek dit gein bewaering van Jezes det D'r God is. Mer kiek den 's nao de reaksie van de Judde op Zien oetsjpraok: “Veur eine gooie daod zulle ver uch neet sjteinige,” zeie ze, “mer waal veur godslastering: want geer zeet eine miens, mer zègkt det ger God zeet!” (Johannes 10:33). De Judde vatte de oetsjpraok van Jezes op es ein bewaering det D'r God waor. In 't vervolg van de teks waere de Judde neet door Jezes gekorrezjeerd. Hae zei bieveurbeeld neet: “Ich höb gaar neet gezag det Ich God bèn.” Dit wies d'rop det Jezes toch ech zei det D'r God waor, wie D'r zei: “De Vader en Ich zeen ein” (Johannes 10:30). Johannes 8:58 is nog ein veurbeeld. Dao zaet Jezes: “Echt waor, ich verzeker uch, al veurdet Abraham d'r waor, bèn ich d'r al.” En opnuuj reagere de Judde door sjtein op te rape óm Jezes te sjteinige (Johannes 8:59). Waoróm zauwe de Judde Jezes wille sjteinige, es Hae nieks gezag hauw wat zuu es godslastering hauwe gezeen, namelik ein bewaering det D'r God waor?

Johannes 1:1 zaet: “'t Woord waor God”. En in Johannes 1:14 laeze ver: “'t Woord is eine miens gewaore.” Hanjelinge 20:28 vertèlt ós: “Zörg veur uchzelf en veur de ganse kudde woereuver de heilige Geist uch es herder haet aangesjtèld; geer zeet de opzichters van Gods kirk, die Hae verkrege haet door Zien eige blood.” Waem haet de kirk verkrege mèt Zien eige blood? Jezes Kristes. Hanjelinge 20:28 zaet det God de kirk haet verkrege mèt Zien eige blood. En dus is Jezes God!

Thomas de discipel zei taege Jezes: “Miene Hieër, miene God!” (Johannes 20:28). Jezes haet häöm toen ouch neet gekorrezjeerd. Titus 2:13 moedig ós aan óm te wachte op de kóms van ooze God en Redder: Jezes Kristes (kiek ouch 's nao 2 Petrus 1:1). In Hebreje 1:8 zaet God de Vader euver Jezes: “Mer taege de Zoon zaet D'r: 'God, Eur troen blief tot in de iewigheid besjtaon, en de septer van 't rech is de septer van Eur kuningsjap.’”

In 't book Aopebaring geuf eine ingel aanwiezinge aan de Apostel Johannes óm allein God te aanbaeje (Aopebaring 19:10). Versjillende kiere in de teks waert Jezes aanbaeje (Mattheüs 2:11; 14:33; 28:9,17; Lucas 24:52; Johannes 9:38). Hae tik noets emes op de vingers ómdet ze Häöm aanbaeje. Es Jezes neet God waor, den zauw D'r die miense vertèld höbbe det ze Häöm neet mochte aanbaeje, persies wie de ingel in Aopebaring hauw gezag. D'r zeen nog väöl mier passages in de Biebel die euver de Goddelikheid van Jezes gaon.

De belangriekste raeje det Jezes God mót zeen, is det Ziene doed noets genóg waor gewaes om de pries veur de zunj van de ganse waereld te betale, es Hae neet God waor (1 Johannes 2:2). Allein God zauw zoene óneindige sjöldj kinne betale. Allein God kós de zunj van de ganse waereld op Zich numme (2 Korintiërs 5:21), sjterve en weer oet de doed opsjtaon – en zoe Zien euverwinning bewieze op de zunj en de doed.


Trök nao de Limburgse toespagina

Is Jezes God? Haet Jezes oets gezag det d'r God is?