Nĩndetĩkĩra Jesũ atuĩke mũhonokia wakwa…rĩu njagĩrĩirwo nĩ gwĩka atĩa?


1. Korwo na ũũma wa gũtaũkĩrwo ũhonokio nĩkĩ.

Johana wa mbere 5:13 ĩtwĩraga atĩ, “Ndĩramwandĩkĩra maũndũ maya inyuĩ arĩa mwĩtĩkĩtie rĩĩtwa rĩa Mũrũ wa Ngai, nĩgeetha mũmenye atĩ mũrĩ na muoyo wa tene na tene.” Ngai nĩarenda tũtaũkĩrwo ũhonokio nĩ kĩĩ na ningĩ tũgĩe na ũcamba ona twamenya nĩtwahonoka. Rekei tũgwete na njĩra nguhĩ maũndũ ma bata megiĩ ũhonokio: https://www.gotquestions.org/Kikuyu

(a) Ithuothe nĩtwĩhĩtie na tũgeeka ciĩko cia kũrakaria Ngai (Aroma 3:23)

(b) Nĩtondũ wa mehia maitũ, twagĩrĩirwo nĩ kũherithio na njĩra ya kweheranio na Ngai (Aroma 6:23)

(c) Jesũ aakuire mũtharabainĩ nĩguo arĩhe thiirĩ wa mehia maitũ (Aroma 5:8; Akorintho wa kerĩ 5:21). Jesũ aakuire handũinĩ haitũ, na agĩkuua iherithia rĩrĩa twarĩ tũherithio narĩo. Kũriũka gwake kuonanirie atĩ gĩkuũ gĩake nĩkĩaiganire kũrĩha thiirĩ wa mehia maitũ.

(d) Ngai ohanagĩra mehia na akahonokia andũ othe arĩa megwĩtĩkia Jesũ – thutha wa kwĩhoka atĩ gĩkuũ gĩake nĩkĩarĩhire thiirĩ wa mehia maitũ (Johana 3:16; Aroma 5:1; 8:1).

Ĩno nĩyo ndũmĩrĩri ya ũhonokio! Angĩkorwo nĩwĩhokete Jesũ Kristo ta mũhonokia waku, wĩ mũhonoku! Nĩwoheirwo mehia maku mothe na Ngai akehĩta atĩ ndagagũtiganĩria (Aroma 8:38-39; Mathayo 28:20). Ririkana atĩ ũhonokio waku nĩ mũgitĩre thĩiniĩ wa Jesũ Kristo (Johana 10:28-29). Angĩkorwo nĩwĩhokete thĩiniĩ wa Jesũ o we wiki ta mũhonokia waku, gĩa na ũũma atĩ nĩũgatũũrania na Ngai matuinĩ!

2. Etha kanitha njega ĩrĩa irarutana kuuma ibukuinĩ rĩa Ngai

Ndũgeciria atĩ kanitha nĩ mwako. Kanitha nĩ andũ. Nĩ ũndũ wa bata etĩkia thĩiniĩ wa Jesũ Kristo kũgĩa na gwatanĩro gatagatĩinĩ kao. Ũyũ nĩ ũndũ ũmwe wa bata wa gũthiaga kanitha. Rĩu nĩtondũ nĩwetĩkia Jesũ Kristo, tũrakwĩhoya na njĩra nene wethe kanitha ĩrarutana kiugo kĩa Ngai hakuhĩ na harĩa wũikagara na warie na mũtungatĩri wa kanitha ĩyo. Reke amenye igũrũ rĩa wĩtĩkio waku mwerũ thĩiniĩ wa Jesũ Kristo.

Gĩtũmi gĩa kerĩ gĩa kanitha nĩ kurutana kiugo kĩa Ngai. Nĩwagĩrĩirwo kwĩruta ũrĩa ũngĩtũũra kũringana na moorutani ma Ngai. Kũmenya ũrĩa ibuku rĩa Ngai rĩrutanaga nĩ ũndũ wa bata harĩ gũtũũra mũtũũrĩre mũgacĩru na ningĩ nĩguo ũkorwo wĩ mũkristiano mũtoria. Timotheo wa kerĩ 3:16-17 yugaga, “Ũhoro wothe ũrĩa wandĩkĩtwo Maandĩko-inĩ wekĩrirwo thĩinĩ wa mũwandĩki nĩ Ngai, na nĩwagĩrĩire harĩ ũhoro wa kũrutana, na wa gũkaanania, na wa kũrũnga mahĩtia, o na wa kũrutana mĩikarĩre ya ũthingu, nĩgeetha mũndũ wa Ngai akoragwo arĩ mũkinyanĩru, na athagathagĩtwo biũ kũruta wĩra o wothe mwega.”

Gĩtũmi gĩa gatatũ gĩa kanitha nĩ gũthathaiya Ngai. Gũthathaiya Ngai nĩ kũmũcokeria Ngatho nĩtondũ wa maũndũ marĩa mothe ekĩĩte! Nĩatũhonoketie, agatwenda, agatũgitĩra, agatũtongoria, na agatuonereria njĩra. Tũngĩhota atĩa kwaga kũmũcokeria ngatho? Ngai nĩ mũtheru, mũthingu, mwendani, e tha, na nĩ mũtuugi mũno. Kũguũrĩrio 4:11 yugaga atĩ, “Wee Mwathani na Ngai witũ-rĩ, nĩwagĩrĩire kũgoocagwo, na gũtĩĩo, na kũgĩa na ũhoti, nĩgũkorwo nĩwe wombire indo ciothe, nacio ciombirwo na ũndũ wa kwenda gwaku, na ikĩgĩa na muoyo.”

3. Aamũra mahinda makũgwatanĩra na Ngai o mũthenya

Nĩ ũndũ wa bata tũgĩe na ihinda rĩa kũgwatanĩra na Ngai o mũthenya o mũthenya. Andũ aingĩ metaga ihinda rĩrĩ rĩa “gũkira mbere wa Ngai” na angĩ makarĩta ihinda rĩa “kwĩrutĩra” nĩtondũ nĩ kahinda ga kwĩrutĩra mbere wa Ngai. Andũ amwe maamũraga ihinda rĩrĩ mathaainĩ ma kĩroko na angĩ hwainĩ. Gũtiramakania wĩtaga ihinda rĩrĩ atĩa kana wĩrutagĩra mahinda marĩkũ. Ũndũ ũrĩa wa bata nĩkũgĩa na ihinda rĩa mwanya rĩa kũgwatanĩra na Ngai o mũthenya o mũthenya. Nĩkĩ wagĩrĩirwo nĩgwĩka ihindainĩ rĩrĩ?

(a) Kũhoya. Kũhoya nĩ kwaranĩria na Ngai. Aranagĩria na Ngai igũrũ rĩa maũndũ marĩa ũreciria na ũmũmenyithagie mathĩĩna maku. Hoya Ngai akũhe ũũgĩ, agũtongorie, na atũngane na mabataro maku. Ningĩ mwĩrage nĩ ũmwendete na ũrĩa ũkenetio nĩũrĩa agwĩkĩire. Maũndũ maya nĩmo twagĩrĩirwo nĩ kũhoya.

(b) Gũthoma ibuku rĩa Ngai. Igũrũ rĩa kũrutwo kiugo kĩa Ngai kanithainĩ mũthenya wa kiumia kana mahindainĩ marĩa maamũre magũthomithio kuma ibukuinĩ rĩa Ngai – o nawe mwene nĩwagĩrĩirwo nĩgwĩthomagĩra ibuku rĩa Ngai. Ibuku rĩa Ngai rĩna maũndũ marĩa mothe ũbatarĩte kũmenya nĩguo ũtũũre mũtũũrĩre wa mũkristiano wa gũtoria. Rĩna ũtaraani kuma kwĩ Ngai ũkoniĩ ũrĩa ũngĩtua matua mega, ũrĩa ũngĩmenya wendi wa Ngai, ũrĩa ũngĩtungata andũ arĩa angĩ, na ũrĩa ũngĩkũra kĩroho. Ibuku rĩrĩ nĩ Kiugo kĩa Ngai we mwene kũrĩ ithuĩ na rĩna mataaro ũrĩa tũngĩtũũra mĩtũũrĩre ya kũmũkenia na ya kũiganĩra.

4. Gĩa na gwatanĩro na andũ arĩa mangĩgũteithia gũkũra kĩroho.

Akorintho wa mbere 15:33 ĩtwĩraga atĩ, “Mũtikaheeneke: ‘Thiritũ njũru nĩĩthũkagia mĩtugo mĩega.’” Ibuku rĩa Ngai nĩrĩtũkaanĩtie maita maingĩ rĩgatwĩĩra atĩ he hinya ũkoragwo na andũ arĩa “oru” igũrũ riitũ. Gũikarania na andũ arĩa mekaga mehia nĩgũtũmaga tũgerio nĩ maũndũ moru marĩa mekaga. Mĩtugo ya arĩa matũthiũrũrũkĩirie nĩĩtũhutagia na njĩra ĩmwe kana ĩrĩa ĩngĩ na nĩkĩo ũrĩ ũndũ wa bata gwĩthiũrũkĩria na andũ arĩa mendete Mwathani na makeheana kũrĩ we.

Geria gwetha aarata, ta kuuma kanitha ũrĩa ũthomaga, arĩa marĩgũteithagia na magakũmĩrĩria (Ahibirania 3:13; 10:24). Ũria arata acio makũragie ũrĩa gwatanĩro yaku na Ngai ĩhuana na ũrĩa ũratũũra mũtũũrĩre waku. O nao morie kana no ũmateithie maũndũinĩ maya. Ũũ ti kuuga atĩ no nginya ũtigane na arata aku othe arĩa matamenyanĩte na Mwathani Jesũ Kristo ta mũhonokia wao. Thiĩ na mbere gũtuĩka mũrata wao na kũmenda. Mamenyithie atĩ Jesũ nĩagarũrĩte mũtũũrĩre waku na kwoguo ndũngĩthiĩ na mbere gwĩka maũndũ marĩa wekaga hau kabere. Ũria Ngai akũhe mĩeke ya kũmenyithia arata aku ũhoro wa Jesũ.

5. Batithio.

Andũ aingĩ nĩmatukanagĩrwo igũrũ rĩa kũbatithio. Kiugo kũbatithio kiugaga “kũrindwo thĩiniĩ wa maaĩ.” Kĩbatithio nĩ njĩra ĩrĩa ĩheanĩtwo ibukuinĩ rĩa Ngai ya gũtangathĩra mũingĩ igũrũ rĩa wĩtĩkio waku mweru thĩiniĩ wa Kristo and wĩrutĩri gwaku kũmũrũmĩrĩra. Gĩĩko gĩa kũrindwo thĩiniĩ wa maaĩ kĩonanagia gũthikwo gwaku hamwe na Kristo na kĩo gĩĩko gĩa kuuma maaĩinĩ gĩkonania kũriũka kwa Kristo. Kũbatithio nĩkwĩyonania atĩ mwĩ hamwe na Kristo thĩiniĩ wa gĩkuũ gĩake, gũthikwo gwake, na kũriũka gwake (Aroma 6:3-4).

Kũbatithio gũtihonokanagia kana gũgathambia mehia maku no nĩ ikinya rĩa gwathĩka na gũtangathĩra mũingĩ wĩtĩkio waku thĩiniĩ wa Kristo ũrĩa arĩwe wiki ũhonokanagia. Kũbatithio nĩ kwa bata nĩtondũ nĩ ikinya rĩa gwathĩka na njĩra ya gũtangathĩra mũingĩ wĩtĩkio waku thĩiniĩ wa Kristo na wĩrutĩri waku harĩ we. Angĩkorwo nĩwĩharĩirie kũbatithio, arĩria mũtungatĩri waku.

English
Coka harĩ ndũmĩrĩri na rũthiomi rwa Gĩkũyũ
Nĩndetĩkĩra Jesũ atuĩke mũhonokia wakwa…rĩu njagĩrĩirwo nĩ gwĩka atĩa?