Wĩmũrekere mehia? Ingĩamũkĩra atĩa ũrekeri wa mehia kuma kũrĩ Ngai?


Kĩũria: Wĩmũrekere mehia? Ingĩamũkĩra atĩa ũrekeri wa mehia kuma kũrĩ Ngai?

Icokio:
Ibuku rĩa Atũmwo 13:38 riugaga atĩ, “Nĩ ũndũ ũcio, ariũ a Ithe witũ, ngwenda mũmenye atĩ ũhoro wa kũrekerwo kwa mehia nĩũhunjĩtio kũrĩ inyuĩ na ũndũ wa Jesũ.”

Kũrekerwo kwa mehia nĩ kĩĩ na njagĩrĩirwo kũrekerwo nĩkĩ?

Kiugo “kũrekerwo” nĩ kuuga gũtheria kĩndũ gĩgathera, kana kuohera, kana kũrĩkia thiirĩ. Rĩrĩa twahĩtĩria mũndũ ũngĩ, nĩtwethaga ũrĩa tũngĩoherwo nĩo nĩguo tũcokerere gwatanĩro iitũ nao. Mũndũ ndarekagĩrwo nĩ tondũ no nginya arekerwo na kwoguo kũrekerwo nĩ gĩĩko kĩa wendo, tha na ũtugi. Kuohera nĩ itua rĩa kwaga gũkuua ũũru wa mũndũ ũngĩ ona angĩkorwo akũhĩtĩirie atĩa.

Ibuku rĩa Ngai rĩratwĩra atĩ ithuothe nĩtwagĩrĩirwo nĩ kũrekerwo mehia maitũ nĩ Ngai. Ithuothe nĩ twĩhĩtie na ta ũrĩa Ibuku rĩa Kohelethu 7:20 riugaga, “Gũtirĩ mũndũ mũthingu gũkũ thĩ, ũrĩa wĩkaga o wega mũtheri na ndehagia.” Johana wa mbere 1:8 yugaga atĩ, “Tũngiuga tũtirĩ na mehia, nĩ kwĩheenia tũkwĩheenia, naguo ũhoro wa ma ndũrĩ thĩinĩ witũ.” Mehia mothe nĩ ciĩko cia kũregana na Ngai (Thaburi 51:4) na kwoguo nĩtũbataire kuoherwo nĩ Ngai. Tũngĩaga kuoherwo mehia maitũ, tũgatũũra tũheraga tene na tene nĩtondũ wa mo (Mathayo 25:46; Johana 3:36).

Kũrekerwo mehia–Ingĩrekerwo mehia atĩa?

Nĩtũracokeria Ngai ngatho nĩtondũ nĩatwendete na nĩarekanagĩra– nĩeharĩirie gũtuohera mehia maitũ! Petero wa kerĩ 3:9 yugaga atĩ “…We nĩamũkiragĩrĩria, tondũ ndendaga mũndũ o na ũmwe oore, no endaga andũ othe merire.” Ngai nĩendaga gũtũrekera, kwoguo nĩaharĩrĩirie njĩra ya ũrĩa tũngĩrekerwo.

Gĩkuũ nĩkĩo irĩhi rĩrĩa rĩagĩrĩire rĩa mehia maitĩ. Gĩcunjĩ kĩa mbere kĩa ibuku rĩa Aroma 6:23 kiugaga atĩ, “nĩgũkorwo mũcara wa mehia nĩ gĩkuũ…” Gĩkuũ gĩa tene na tene nĩkĩo tũbataire nĩtondũ wa mehia maitũ. No Ngai, nĩtondũ wa mũbango wake mũgacĩru, atuĩkire mũndũ – Jesũ Kristo (Johana 1:1, 14). Jesũ akuire mũtharabainĩ, agĩkuua itua rĩrĩa twabataire – gĩkuũ. Wakorintho wa kerĩ 5:21 ĩtũrutaga atĩ, “Ngai nĩatũmire ũcio ũtaarĩ na wĩhia atuĩke mwĩhia nĩ ũndũ witũ, nĩgeetha thĩinĩ wake tũtuĩke ũthingu wa Ngai.” Jesũ akuire mũtharabainĩ na agĩkuua ihera rĩrĩa rĩarĩ ritũ! Nĩtondũ Jesũ aarĩ Ngai, gĩkuũ gĩake kĩaheanire ũrekeri wa mehia ma thĩ yothe. Johana wa mbere 2:2 yugĩte atĩ, “We nĩwe igongona rĩa kũhoroheria mehia maitũ, na to mehia maitũ moiki, no nĩ mehia ma andũ othe a thĩ.” Jesũ aariũkire kuma kũrĩ akuũ na akĩonania ũhotani wake igũrũ rĩa mehia na gĩkuũ (Wakorintho wa mbere 15:1-28). Ngai arogocwo nĩtondũ kũhĩtũkĩra harĩ gũkua na kũriũka kwa Jesũ Kristo, gĩcunjĩ gĩa kerĩ kĩa ibuku rĩa Aroma 6:23 nĩ kĩa ma kĩrĩa kiugaga, “…no kĩheo kĩrĩa Ngai aheanaga nĩ muoyo wa tene na tene thĩinĩ wa Kristũ Jesũ Mwathani witũ.”

No wende kuoherwo mehia maku? Nĩũrecuka thĩiniĩ waku na ũkaigua ũkuuĩte mũrigo ũtathiraga? No woherwo mehia maku ũngĩtĩkia Jesũ Kristo ta mũhonokia waku. Aefeso 1:7 yugaga atĩ, “Na thĩiniĩ wake nĩ twakũũrirwo na ũndũ wa thakame yake, na tũkarekerwo mehia maitũ, kũringana na ũrĩa wega wa Ngai ũingĩhĩte.” Jesũ nĩarĩhire thiirĩ witũ kwoguo no tũrekerwo mehia maitũ. Ũrĩa wagĩrĩirwo nĩ gwĩka nĩkũria Ngai akuohere kũhĩtũkĩra harĩ Jesũ na njĩra ya gwĩtĩkia atĩ Jesũ aakuire mũtharabainĩ nĩguo arĩhe thiirĩ wa mehia maku – na nĩegũkuohera! Ũhoro ũyũ mwega nĩguo ndũmĩrĩri ya Johana 3:16-17, “Nĩgũkorwo Ngai nĩendire kĩrĩndĩ, akĩruta Mũrũ wake wa mũmwe, nĩgeetha mũndũ o wothe ũmwĩtĩkĩtie ndakoore, no agĩe na muoyo wa tene na tene. Nĩgũkorwo Ngai ndaatũmire Mũrũwe gũkũ thĩ aciirithie kĩrĩndĩ, no nĩguo kĩrĩndĩ kĩhonoke nĩ ũndũ wake.”

Kũrekerwo mehia–nĩ kũhũthũ ũguo?

Ĩĩ nĩ kũhũthũ! Ndũngĩruta wĩra nĩguo wamũkĩre kũrekerwo nĩ Ngai. Ndũngĩrĩha nĩguo woherwo mehia nĩ Ngai no wamũkĩrire tu na njĩra ya wĩtĩkio kũhĩtũkĩra ũtuugi na tha cia Ngai. Angĩkorwo no wende kwamũkĩra Jesũ Kristo ta Mũhonokia waku nĩguo Ngai akũrekere mehia maku, no uuge ihoya rĩrĩ. Kuuga ihoya rĩrĩ, kana o ihoya o rĩngĩ rĩothe, gũtingĩkũhonokia no ũngĩhonoka tu na njĩra ya gwĩtĩkia Jesũ Kristo nĩguo akũrekere mehia maku. Ihoya rĩrĩ nĩ njĩra tu ya kũmenyithia Ngai igũrũ rĩa wĩtĩkio waku thĩiniĩ wake na kũmũcokeria ngatho nĩtondũ wa gũkũhonokia. “Ngai, nĩnjũĩ atĩ nĩngwĩhĩirie na nĩnjagĩrĩirwo nĩ kũherithio. Ĩndĩ Jesũ Kristo nĩakuuire ihera rĩrĩa rĩarĩ rĩakwa nĩguo ndamwĩtĩkia nduĩke wa kuoherwo mehia makwa na kwoguo nĩndamwĩhoka nĩguo ahonokie. Nĩwega nĩtondũ wa ũtuugi waku wa magegania na ningĩ nĩtondũ wa kũnjohera mehia makwa! Ameni!”

Nĩwatua itua rĩa kũrũmĩrĩra Kristo nĩ tondũ wa ũhoro ũrĩa wathoma haha? Angĩkorwo nĩweka ũguo, no ũhihinye haha kĩanda harĩa handĩkĩĩtwo “nĩndetĩkĩra Kristo ũmũthĩ.”

English
Coka harĩ ndũmĩrĩri na rũthiomi rwa Gĩkũyũ
Wĩmũrekere mehia? Ingĩamũkĩra atĩa ũrekeri wa mehia kuma kũrĩ Ngai?