settings icon
share icon
Kĩũria

Gwĩtĩkĩra Jesũ atuĩke mũhonokia waku nĩ kuuga atĩa?

Icokio


Nĩwĩtĩkĩtie Jesũ Kristo ta mũhonokia waku? Nĩguo ũtaũkĩrwo wega nĩ kĩũria gĩkĩ, no nginya wambe ũmenye ũrĩa ciugo “Jesũ Kristo” na “mũhonokia waku” ciugĩte.

Jesũ Kristo nũ? Andũ aingĩ moigaga atĩ Jesũ Kristo nĩ mũndũ mwega, mũrutani mwega, o na kana mũnabii wa Ngai. Nĩ ma maũndũ maya no monanie Jesũ nũ, no matiheanĩte mbica yothe ya ũũma wa nĩwe ũ. Ibuku rĩa Ngai rĩratwĩra atĩ Jesũ nĩ Ngai wĩ thĩiniĩ wa mwĩrĩ tondũ nĩatuĩkire mũndũ (thoma Johana 1:1, 14). Ngai okire thĩ nĩguo atũrute, atũhonie, atũrũnge, atuohere mehia—na akue mũtharabainĩ nĩtondũ witũ! Jesũ Kristo nĩ Ngai, nĩ mũũmbi, na nĩ Mwathani wa indo ciothe. Nĩwamũkĩrĩte Jesũ ũyũ?

Mũhonokia nũ na tũmũbataire nĩ gĩtũmi kĩrĩkũ? Ibuku rĩa Ngai rĩratwĩra atĩ nĩtũhĩtĩtie na tũgeka ciĩko njũru (Aroma 3:10-18). Nĩtondũ wa mehia maitũ, twagĩrĩirwo nĩ kũrakarĩrwo na kũherithio nĩ Ngai. Iherithia rĩrĩa rĩagĩrĩire rĩa mehia marĩa mekĩĩtwo kũrĩ Ngai mũnene na ũrĩa ũtũũraga tene na tene nĩ iherithia rĩa tene na tene (Aroma 6:23; Kũguũrĩrio 20:11-15). Gĩkĩ nĩkĩo gĩtũmi kĩrĩa tũbataire mũhonokia!

Jesũ Kristo ookire gũkũ thĩ na agĩkua handũinĩ haitũ. Gĩkuũ gĩake kĩarĩ irĩhi rĩa tene na tene nĩtondũ wa mehia maitũ (Wakorintho wa kerĩ 5:21). Jesũ aakuire nĩguo arĩhe ituĩro rĩa mehia maitũ (Aroma 5:8) na aarĩhire thogora ũcio nĩguo tũtigatuĩka a kũũrĩha ithuĩ ene. Kũriũka gwake kuuma kũrĩ arĩa akuũ kuonanirie atĩ gĩkuũ kĩu nĩkĩaginire kũrĩha thiirĩ wa mehia maitũ. Gĩkĩ nĩkĩo gĩtũmi kĩa Jesũ gũkorwo we no we tu mũhonokia (Johana 14:6; Atũmwo 4:12)! Nĩwĩhokete Jesũ ta mũhonokia waku?

Jesũ nĩ mũhonokia “waku”? Andũ aingĩ monaga Ũkristiano karĩ gũthiĩ kanitha, kũhingia mĩtaratara, kana kwaga gwĩka mehia maya kana marĩa. Ũyũ tiguo ũkristiano. Ũkristiano wama nĩ kũgĩa na gwatanĩro na Jesũ Kristo na gwĩtĩkĩra atuĩke mũhonokia waku na njĩra ya kũmwĩtĩkia na kũmwĩhoka. Gũtirĩ mũndũ ũngĩhonokio nĩ wĩtĩkio wa andũ angĩ kana nĩtondũ wa gwĩĩka ciĩko ndare. Njĩra ĩrĩa tu ũngĩhonoka nĩgwĩtĩkĩra Jesũ atuĩke mũhonokia waku na wĩhoke atĩ gĩkuũ gĩake nĩ kĩo irĩhi rĩa mehia maku na ningĩ wĩtĩkie kũriũka gwake nĩkuo mwĩhoko waku wa kũgaya muoyo wa tene na tene (Johana 3:16). Jesũ nĩ mũhonokia waku?

Ũngĩenda gwĩtĩkĩra Jesũ Kristo ta mũhonokia waku, hoya ihoya rĩrĩ. Ririkana atĩ kuuga ihoya rĩrĩ o na kana ihoya o rĩngĩ rĩothe gũtingĩkũhonokia. Ũngĩhonokio tu kuuma mehianĩ maku ũngĩtĩkia Jesũ Kristo na wĩra ũrĩa mũrĩku aarutire mũtharabainĩ nĩtondũ waku. Ihoya rĩrĩ nĩ njĩra tu ya kũmenyithia Ngai wĩtĩkio waku thĩiniĩ wake na kũmũcokeria ngatho nĩtondũ wa gũkũhonokia. Uuga ũũ: “Ngai, nĩnjũũĩ atĩ nĩngwĩhĩirie na nĩnjagĩrĩirwo nĩ kũherithio. Ĩndĩ nĩndetĩkia atĩ Jesũ Kristo nĩakuuire ihera rĩakwa nĩguo na njĩra ya kũmwĩtĩkia njoherwo mehia makwa. Nĩndamũkĩra kĩheo gĩaku gĩa kuoherwo mehia na nĩndakwĩhoka nĩguo ũhonokie. Nĩndetĩkĩra Jesũ ta mũhonokia wakwa! Nĩwega nĩtondũ wa ũtuugi waku wa magegania na ningĩ nĩtondũ wa kuoherwo mehia—nĩwega nĩtondũ wa kĩheo kĩa muoyo wa tene na tene! Ameni!”

Nĩwatua itua rĩa kũrũmĩrĩra Kristo nĩ tondũ wa ũhoro ũrĩa wathoma haha? Angĩkorwo nĩweka ũguo, no ũhihinye haha kĩanda harĩa handĩkĩĩtwo “nĩndetĩkĩra Kristo ũmũthĩ.”

English



Coka harĩ ndũmĩrĩri na rũthiomi rwa Gĩkũyũ

Gwĩtĩkĩra Jesũ atuĩke mũhonokia waku nĩ kuuga atĩa?
© Copyright Got Questions Ministries