Jesũ nĩ Ngai? Jesũ nĩoigire atĩ we nĩ Ngai?


Kĩũria: Jesũ nĩ Ngai? Jesũ nĩoigire atĩ we nĩ Ngai?

Icokio:
Andũ amwe arĩa makararagia atĩ Jesũ nĩ Ngai moigaga atĩ gũtirĩ hĩndĩ Jesũ oigire atĩ we nĩ Ngai. Nĩ ũhoro wa ma atĩ Ibuku rĩa Ngai rĩtiugĩte atĩ he hĩndĩ Jesũ oigire na kanua gake we mwene atĩ, “Niĩ ndĩ Ngai.” Ũũ ti kuuga atĩ Jesũ ndonanĩtie maandĩkoinĩ atĩ we nĩ Ngai.

Jesũ nĩ Ngai? — Jesũ kwĩyonania nĩwe Ngai

Ngerekano ĩmwe ya kuonania atĩ Jesũ nĩ Ngai nĩ ibukuinĩ rĩa Johana 10:30 harĩa Jesũ oigĩte, “Niĩ na Baba tũrĩ amwe.” Twagĩrĩirwo nĩkuona ũrĩa Ayahudi meekire maigua ciugo ici nĩguo tũmenye atĩ Jesũ eĩtaga Ngai. Mageririe kũmũhũũra na mahiga nĩtondũ wa gĩtũmi gĩkĩ: “Wee ũrĩ o mũndũ na ũretua Ngai.” (Johana 10:33). Ayahudi nĩmamenyaga atĩ Jesũ eĩtaga Ngai na kwoguo rĩrĩa Jesũ atangathire akiuga, “Niĩ na Baba tũrĩ amwe,” augaga atĩ we na Ithe marĩ na mũhuanĩre ũmwe. Ngerekano ĩngĩ ĩrĩ thĩiniĩ wa Johana 8:58 harĩa Jesũ oigĩte, “Ngũmwĩra atĩrĩ na ma, Iburahĩmu atanaciarwo, Niĩ nĩ ndũire!” Ũhoro ũyũ waandĩkĩtwo thĩiniĩ wa ibuku rĩa Thaama 3:14 rĩrĩa Ngai eguũranĩirie na akĩĩta “NIĨ NĨNIĨ.” Ayahudi arĩa maiguire mĩario ĩno ya Jesũ na makĩoya mahiga nĩguo mamũrage, mekire ũguo kũhingia ũrĩa watho wa Musa waathanĩte nĩtondũ kũringana nao Jesũ nĩarĩtie mĩario ya kũruma Ngai na njĩra ya kwĩgerekania nake (Maũndũ ma Alawii 24:16).

Jesũ nĩ Ngai? — Arũmĩrĩri ake gũtangatha atĩ Jesũ nĩ Ngai

Ibuku rĩa Johana nĩrĩtangathĩte atĩ Jesũ nĩ Ngai. “Kiugo [arĩ kĩo Jesũ] kĩarĩ Ngai” na “Kiugo agĩtuĩka mũndũ” (Johana 1:1, 14). Mĩhari ĩno ĩronania wega atĩ Jesũ nĩ Ngai wĩna mwĩrĩ wa mũndũ. Ibuku rĩa Atũmwo 20:28 rĩratwĩra atĩ, “Tuĩkai arĩithi a kanitha wa Ngai, ũrĩa aagũrire na thakame yake mwene.” Nũ wagũrire kanitha na thakame yake we mwene? Nĩ Jesũ Kristo. Mũhari o ũyũ noguo uugĩte atĩ Ngai aagũrire kanitha wake na thakame yake mwene. Kwoguo, Jesũ nĩ Ngai.

Toma, ũrĩa warĩ mũrutwo wa Jesũ, aaririe igũrũ rĩa Jesũ akĩmwĩta, “Mwathani wakwa na Ngai wakwa” (Johana 20:28) na Jesũ ndamũrũngire mĩario. Marũa ma Tito 2:13 maratwĩkĩra hinya magatwĩra tweterere gũka kwa Ngai witũ arĩ o we mũhonokia witũ Jesũ Kristo (thoma Petero wa kerĩ 1:1). Thĩiniĩ wa ibuku rĩa Ahibirania 1:8, Ngai Ithe oigĩte igũrũ rĩa Jesũ, “No ha ũhoro ũkoniĩ Mũriũ ekuuga atĩrĩ, ‘Wee Ngai, gĩtĩ gĩaku kĩa ũnene nĩgĩgatũũra tene na tene, nakĩo kĩhooto nĩkĩo gĩgaatuĩka mũthĩgi wa ũthamaki waku.’ ” Ithe Ngai aarĩtie igũrũ rĩa Jesũ akamwĩta Ngai, ũũ nĩkuonania atĩ ti itherũ Jesũ nĩ Ngai.

Thĩiniĩ wa ibuku rĩa Kũguũrĩrio (19:10), mũraika aathire mũtũmwo Johana agooce Ngai o we wiki. Maita o matare thĩiniĩ wa maandĩko, Jesũ nĩetĩkĩrĩte kwamũkĩra ũgooci (Mathayo 2:11; 14:33; 28:9, 17; Luka 24:52; Johana 9:38). Gũtirĩ hĩndĩ Jesũ akũmire andũ nĩtondũ wa kũmũgooca. Angĩkorwo Jesũ ti Ngai, nĩangĩerĩte andũ matige kũmũgooca, ota ũrĩa mũraika eekire ibukuinĩ rĩa Kũguũrĩrio. Nĩkũrĩ maandĩko mangĩ maingĩ monanĩtie atĩ Jesũ nĩ Ngai.

Jesũ nĩ Ngai? — Ũũma wa Jesũ gũkorwo e Ngai

Gĩtũmi kĩrĩa kĩnene mũno kĩa Jesũ gũkorwo e Ngai nĩtondũ angĩkorwo atarĩ Ngai, gĩkuũ gĩake gĩtingĩahotire kũrĩha thiirĩ wa mehia ma thĩ (Johana wa mbere 2:2). Kĩũmbe o gĩothe kĩrĩa Jesũ angĩkorwo aarĩ angĩkorwo we ti Ngai, gĩtingĩhota kũrĩha thiirĩ mũnene mũno wa mehia mbere wa Ngai mũnene. No Ngai we mwene ũngĩahotire kũrĩha thiirĩ ũcio mũnene ũguo. No we tu ũgĩahotire gũkuua mehia mathĩ (Wakorintho wa kerĩ 5:21), akue mũtharabainĩ na acooke ariũkio nĩguo onanie ũhotani wake igũrũ rĩa mehia na gĩkuũ.

Jesũ nĩ Ngai? Ĩĩ. Jesũ we mwene nĩonanĩtie atĩ nĩ Ngai. Arũmĩrĩri ake mamwĩtĩkĩtie atĩ we nĩ Ngai. Njĩra ya ũhonokio ĩrutaga wĩra nĩgũkorwo Jesũ nĩ Ngai. Jesũ nĩ Ngai wĩ na mwĩrĩ, ũrĩa ũtũũraga tene na tene, kĩambĩrĩria ona kĩrĩkĩro (Kũguũrĩrio 1:8; 22:13) na ningĩ nĩwe Ngai mũhonokia witũ (Petero wa kerĩ 1:1).

English
Coka harĩ ndũmĩrĩri na rũthiomi rwa Gĩkũyũ
Jesũ nĩ Ngai? Jesũ nĩoigire atĩ we nĩ Ngai?