īkūlyo
Nĩnaia mũĩkĩĩo wakwa nthĩnĩ wa Yesũ...Kwoou?
Ũsungio
Nĩ useo! Wasakũa ũndũ wa vata muno! No wĩthĩwe uyĩkulya "kwoou? nĩ tonya kwambĩlĩĩlya kyalo kyakwa na Ngai ata?" Matambya aya atano mawetetwe vau ĩthĩo nĩmeũkunenga mwolooto wa mbivilia. Ethiwa wĩna makũlyo kyalonĩ kyaku kya mũĩkiio, ũka: https://www.gotquestions.org/Kikamba
1. Nĩ waĩle kwĩthĩwa ũielewa ũtangĩĩo.
1 Yoana 5:13 yĩ twĩa atĩĩ, "Maũndũ asu namũandĩkĩa, nĩ kana mũmanye mwĩ na thayũ wa tene na tene, inyw'ĩ ala mwĩtĩkĩlaa syĩtwa ya Mwana wa Ngai." Ngai nũkwenda tũelewe ũtangĩĩo. Ngaĩ nũkwenda twĩthĩwe na ũkũmbaũ wa kũmanya kana kwa w'o wĩmũtangĩĩe. Kwa ũkuvĩ, tũkũnĩkĩle maundũ me vata ĩulũ wa ũtangĩĩo:
(a) Ithyonthe nĩtũvĩtĩtye. Ithyonthe nĩtwĩkaa maundũ ala matamwendeeasya Ngai (Alomi 3:23)
(b) Nũndũ wa naĩ syĩtu, nĩtwaĩlwe nĩ ĩtuvi ya ũthĩnyo wa tene na tene ( Alomi 6:23)
(c) Yesũ nĩwakw'ie mũkelanyonĩ nũndũ wa kũĩvĩa na syitu. (Alomi 5:8; 2 Akolintho 5:21) Yesũ akwie kĩkw'ũ kĩla kyatwaĩlĩte, eyosea ũthĩnyo ũla watwaĩlĩte ithye nũndũ wa naĩ syitu. Ũthayuko wake woonanisye kana kĩkw'ũ kya Yesũ kyaĩ kĩanu kũivĩa naĩ syitu.
(d) Ngai nũmaekeaa onthe ala maiaa mũĩkĩĩo woo vala ve Yesũ — ala metĩkĩlaa kĩkw'u kya Yesu ta ndĩvi mbĩanĩu ya naĩ syĩtu syoonthe ( Yoana 3:16; Alomi 5:1; Romans 8:1).
Ũsu nĩw'o ũvoo wa ũtangĩĩo, ethĩwa nĩ ũmũĩkĩĩe Yesũ ta mũtangĩĩi waku, wĩmutangĩĩe! Naĩ syaku syoonthe nĩndekee, na Ngai athanĩte kana ndakakũtia kana ũkũeka. (Alomi 8:38-39; Mathayo 28:20). Lilikana ũtangĩĩo waku nĩmũsũvĩe nĩ Yesu (Yoana 10:28-29) Ethĩwa nĩũmũĩkĩĩe Yesu weka ta mũtangĩĩi waku, wĩna ũkũmbaũ kana ũkekala tene na tene wĩna Ngai ĩtunĩ.
2. Mantha Kanisa mũseo ũla ũmanyiasya mbivilia kwa nzĩa ya w'o.
Ndukasuanĩe kanĩsa nĩ mwako kana nyũmba. Kanĩsa nĩ andu. Nĩ ũndũ wa vata etĩkĩli ma Yesũ kũmbana na kwĩthĩwa na ngwatanĩo vamwe. Ũsu nĩw'o vata wa mbee wa kanisa. Yu nĩ kwĩthĩwa nĩwaia mũĩkĩĩo waku vala ve Yesũ, nĩtũkũũthuthya ũmanthe kanisa ũla ũmanyĩasya ndeto ya Ngai kwa nzĩa yaw'o na ũineena na mutavany'a wa kanisa ũsu. Mũkũsĩĩe ĩũlũ wa mũĩkĩĩo waku mweu nthĩnĩ wa Yesũ.
Vata wa kelĩ wa kanisa nĩkũmanyĩsya Mbivilia. Nĩwaĩle ũmanyĩw'a ũndũ waĩle kũatĩĩa mĩtalatala ya Ngai thayũnĩ waku. Kũelewa Mbivilia nĩ ũndũ wĩ kĩtumi na wakũũtonyethya kwĩkala thayũ wĩna ũkĩlyo wa Mũklisto. 2 Timotheo 3:16 - 17 yĩasya aatĩĩi, "Kĩla Ũandĩko nĩwaveveewe nĩ Ngai, naw'o nĩwaĩle wa kũmanyĩsya, na kũĩkĩĩthya andũ mavĩtyo, na kũmatũngĩĩa, na kũsilĩla kwa ũlũngalu: nĩ kana mũndũ wa Ngai atonye kwĩthĩwa e mwĩanĩu, eanĩe kũtethya kĩla wĩa mũseo."
Vata wa katatũ wa kanisa nĩ ũthaithi. Ũthaithi nĩ kũtũngĩa Ngai mũvea nũndũ wa maũndũ ala wĩkĩte. Ngai nũtutangĩĩyĩte. Ngai nũtwendete. Ngai nũtũsũvĩaa. Ngai nũtũtongoesya na kũtwonya mwolooto. Tũtonya ata ũlea kũmũtũngĩa mũvea? Ngai nĩ mũtheu, mũlũngalu, ausĩwe nĩ wendo, mweene tei, na ausĩwe nĩ mumo. Ũvuany'o 4:11 yĩasya, "Nĩwaĩle we, Mwĩaĩi waitũ na Ngai waitũ, kwosa ndaĩa na nguma na vinya: nĩkwĩthĩwa nĩwoombie syĩndũ syonthe, na kwondũ wa kwenda kwaku syaĩ kw'o, na ĩngĩ syoombwa."
3. Iya mwanya kĩla mũthenya wa ũkwatanĩa na Ngai.
Nĩ ũndũ wĩ vata kwĩthĩwa na mwanya wa ũkwatanĩa na Ngai kĩla mũthenya. Andũ amwe nĩmakothaa kwasya "Ĩvinda ya mwanya" kana ĩvinda ya "kwĩthukĩĩsya Ngai" nũndũ nĩ ĩvinda ya kwĩnengana vala ve Ngai. Andũ amwe nĩmakothaa kwosa ĩvinda kĩokonĩ na angĩ nĩmakothaa kwosa mwanya ũũ mawĩyoo. Ĩyĩũkũlw'a ũndũ wĩtaa mwanya ũũ kana yĩla wĩosaa mwanya ũũ. Kĩla kya vata nĩ kwĩthĩwa ũyosa ĩvinda na kwĩthukĩanĩsya na Ngai. Nĩ nzĩa syĩva ila wĩthukĩanĩasya na Ngai?
(a)Mboya. Mboya kwa ũkũvĩ nĩ kũneena na Ngai. Kũtavya Ngai maundũ ala me ũkũthĩnya. Kũkũlya Ngai aunenge ũĩ na mwolooto. Kũkũlya Ngai aũtetheesye mavatani maku. Kũtavya Ngai ũndũ ũmwendete na kũmũtũngĩa mũvea nũndũ wa maũndũ ala wĩkĩte. Ou nĩ w'o mboya yĩthĩawa yĩilye.
(b)Kũsoma Mbivilia. Ĩũlũ wa kũmanyĩw'a mbivilia kanisanĩ, kana ikundinĩ sya mbivilia, nĩwaĩlĩte kwĩsomea mbivilia. Mbivilia yĩna maũndũ onthe ala waĩle ũmanya nĩkana wĩkale thayũ wa ũtangĩĩo wĩna ũkĩlyo. Mbivilia yĩna mwolooto wa Ngai wa ũndũ waĩle kwĩka maũtwi mena ũĩ, ũndũ waĩle kwĩka kwenda kwa Ngai, ũndũ waĩle kwĩkala na andũ na kwĩana mũĩkĩĩonĩ. Mbivilia nĩ valũa wa Ngai kũla tũĩ. Mbivilia nĩ mwolooto wa Ngai wa ũndũ twaĩlĩtwe nĩ kwĩkala kwa nzĩa ĩla yaĩlĩte mbee wa Ngai na kwĩanĩwa.
(4) Nyanyana na andũ ala matonya kũũtethya kwĩana mũĩkĩĩonĩ.
1 Akolintho 15:33 yĩ twĩa, "Mũikakengeke: Itindo nthũkũ nĩsyanangaa mwĩkalĩle mũseo." Mbivilia yũsĩwe nĩ maũkanyo maingĩ ma ũndũ "andũ" athũku matonya ũtwananga. Kũtindanya na andũ ala mekaa maũthũku na naĩ nĩkũtonya ũtulikya matatwanĩ ma kwambĩlĩlya kwĩka maũthũku asu. Mikalĩle ya andũ ala tũtindanasya namo nĩyonekaa nthĩnĩ wa mathayũ maitũ. Kĩu nĩkyo kĩtumi twaĩle kutindanya na andũ ala mendete Ngai na mekaa kwenda kwake.
Tata ũmanyane mũnyanya ũmwe kana elĩ kuma vau kanisanĩ ũla ũtonya kũũthuthya na kũũtethya mũĩkĩĩonĩ.( Aevelania 3:13; 10:24) Kũlya anyanyau maũteetheesye kwĩthĩwa wĩ kĩthito maundũni ma kũmũmanya Ngai. Makũlye kana no ũmatetheesye maũndũnĩ ota w'o. Kwĩka ou ti kwasya kana nĩwaĩle kũekana na anyanya onthe ala matamwĩtĩkĩlĩte Yesu Klisto. Endeea kwĩthĩwa na ũnyanya namo na kũmenda. Ĩndĩ matavye kana Yesu nĩwavĩnduie thayũ waku na ndũtonya kũendeea kwĩka maũndũ ala mweekaa matamwendeeasya Ngai. Voya Ngai avingũĩe ĩvũso ya kũmatavya ũla ũvoo mũseo.
5. Nĩ waĩle ũvatiswa.
Andũ aingĩ maieleawa ũvatiso. Ũvatiso nĩ "kũlikya na kũthika kĩw'unĩ." Ũvatiso nĩ yo nzĩa ya mbivilia ya kwonany'a sanzũ kana wĩ mũĩkĩĩi wa Yesũ Klisto na nĩwĩyumĩtye kũmũthũkũma. Kĩko kya kũthikwa kĩw'unĩ kwonanasya kũthikwa vamwe na Klisto. Kĩko kya kuma kĩw'unĩ kwonanasya ũthayũũkyo wa Yesu Klisto. Kũvatiswa kĩw'unĩ nĩ kwĩtĩkĩlana na Kĩkw'u, Kũthikwa na Ũthayũũkyo wa Yesu Klisto ( Alomi 6:3-4).
Ũvatiso ti w'o ũtangĩĩyaa mũndũ . Ũvatiso ndũtonya ũthesya mũndũ naĩ syake. Ũvatiso nĩ wonany'o wa wĩw'i, wonany'o wa sanzũ wa wĩtĩkĩlo wa kana Yesu e weka no we ũtonya ũtangiia. Ũvatiso nĩ wa vata nũndũ nĩ ĩtambya ya wĩw'i — kũtangaasa sanzũ kwĩyumya kwaku vala ve Klisto. Ethĩwa nũkwenda ũvatiso, neena na Mũtavany'a.
English
Nĩnaia mũĩkĩĩo wakwa nthĩnĩ wa Yesũ...Kwoou?