O le a le talitonuga moni mo a'u?




Fesili: O le a le talitonuga moni mo a'u?

Tali:
E tosinaina i tatou i fale 'aiga eseese ona o lo'o faatagaina ai le filifiliga a le tagata lava ia i mea'ai o loo fia tausami ai. O niisi foi fale kofe ua faasalalau mai le tele o kofe eseese e maua ai, pe a ma le selau ituaiga e filifili ai. Afai e faatau se fale poo se taavale fou a se tasi, e mafai foi ona ia sailia nai mea faaopoopo e mana'o iai. Ua pulea o tatou olaga e a tatou filifiliga! Ua maua soo se mea e momo'o iai loto o tagata i nei ona po.

E faapefea la ona filifili se tapua'iga e aoga mo oe? Pe ni a fa oe ae e te maua se talitonuga e le tausisi i ni ou faaletonu ua mavae, pe tulituliloa oe ma faatulafonoina mea uma e tatau ona e faia? O loo iai tapua'iga faapena, ae pe talafeagai ni filifiliga o tapua'iga e pei ona faia i isi mea o le olaga nei?

O le tele ia o leo eseese o loo faatosinaina o tatou manatu, ae aisea e tatau ai ona tatou siitia Iesu ia sili atu ia Moameta poo Konefisi, o Puta, poo Sale Taase Luselu, poo Iosefa Samita? Pe mata e taunuu ala uma i le lagi? Pe tutusa ea talitonuga uma? O le mea moni, e le o le lagi le taunuuga o tapuaiga uma e pei o se tasi upu e faapea, e le taunuu ala uma i le nuu o Initia.

Ua na o Iesu e toatasi o loo iai le pule atoa i Ana fetalaiga ona ua na o Ia lava na faatoilaloina le oti. O le isi vaega ua 'ai e ilo i o latou tuugamau e oo mai i le aso, a o Iesu, i Lona lava mana, na Ia tulai ese ai mai le tuugamau i le aso tolu ina ua mae'a lona maliu i luga o le satauro sa fausia e tagata Roma mo Ia. Soo se tagata ua faatoilaloina le oti i Lona mana e taula'i toto'a iai vaaiga a tagata uma. Soo se tasi ua pulea le oti i Lona mana ua tatau ona faalologo iai tagata uma.

E tele ni mea sa tutupu e faamaonia ai le toe tu o Iesu, e le uma ona talatalaina. O le mea muamua, e sili atu i le 500 tagata na molimauina le toe tu mai o Keriso! E toatele tagata na vaaia Iesu i Lona toe tu mai. E le faaleaogaina ni molimau e 500. E le gata i lea, o loo avanoa Lona tuugamau! Ana aumai e fili o Iesu Lona tino maliu, Lona tino ua pala, e gata ai iina faasalalauga uma o Le toe tu o Iesu. Ae peita'i, e leai se tino oti na maua! Ua avanoa foi le tuugamau sa tuuina ai o Ia! Pe mata sa gaoia e soo o Iesu Lona tino maliu? 'Ailoga. Sa le mafai lava e se tasi ona sopoia le tuugamau na tanu ai Iesu ona o le maoa'e o leoleoga a fitafita ma a latou auupega. O Ona soo foi ua matata'u ma sosola i le taimi na pu'e ma faasatauroina ai Iesu, aua e mautinoa lava le le mafaia e nei tagata fai faiva ona faasagatau i fitafita malolosi atoa ma a latou aupega. O le tala moni, ua le mafai ona faaleaogaina e se tasi le tala i le toe tu o Iesu!

Toe faamanatu atu, soo se tasi ua iai le mana e pulea ai le oti e tatau ona tatou faalologo uma iai. Ua faamaonia e Iesu ina ua Ia manumalo i le oti, o lea, e tatau ai ona tatou usiusita'i i Ana fetalaiga. Ua fetalai mai Iesu o Ia lava o le ala i le faaolataga (Ioane 14:6). E le na o se ala; E le o se ala foi ua tuuina mai faatasi ma niisi ala e tele, ae ua na o Iesu lava e toatasi, o Ia o le Ala moni.

Ma o Iesu lava lea sa fetalai, "Ia outou o mai ia te A'u, o outou uma o e tigaina ma mafatia i avega, o a'u foi e malolo ai outou" (Mataio 11:28). O loo tatou ola nei i se olaga e matua faigata tele. E toatele i tatou ua manunu'a ma faaleagaina i taua o lenei olaga. E sa'o? O le a la le mea o loo e mana'omia? Pe e te mana'omia ea le togiolaina o oe poo e manatu ua na o se tapuaiga e fo'ia ai nei faafitauli? O e sailia se Faaola o loo Soifua e oo mai i le taimi nei poo se tasi o le 'au perofeta ua maliu? O e manaomia se mafutaga mafana pe na ona e tausia ni nai tulafono e aunoa ma sona uiga? O Iesu e le na o se filifiliga--Ua na o Ia lava le tali!

O Iesu o le "tapuaiga moni" pe afai o loo e sailia le faamagaloina o au agasala (Galuega 10:43). O Iesu foi o le "tapuaiga" moni pe afai o loo e sailia se mafutaga mafana ma le Atua (Ioane 10:10). O Iesu o le "tapuaiga" moni pe afai o loo e sailia le nuu e faavavau i le lagi (Ioane 3:16). Tuu atoa lou faatuatua ia Iesu Keriso o Ia o lou Faaola -- e te le toilalo ai! Talitonu ia te Ia mo le faamagaloina o au agasala -- e matua malie ai lou mana'o.

Afai e te mana'omia se "mafutaga ua tonu" ma le Atua, faata'ita'i le tatalo lea. Manatua, e le faaolaina oe i se tatalo. Ua na o lou talitonu ia Keriso e faaolaina ai oe mai le agasala. O le tatalo lea e fai ma au ta'utinoga e faailoa atu ai i le Atua lou faatuatua ia te Ia atoa ma lau faafetai ona o Lana faaolataga mo oe. "Le Atua e, Ua ou iloa nei ua ou agasala ia te oe ma ua tatau ona faasalaina a'u. Ae ua avea e Iesu Keriso lo'u faasalaga ina ia ou magalo ai e ala i lo'u faatuatua ia te Ia. Ua ou liliu ese nei mai a'u agasala ae ua ou talitonu ia te Oe mo lo'u faaolataga. Faafetai mo Lou alofa tunoa ma lau faamagaloga -- o le mea alofa lava lea o le ola e faavavau! Amene!

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.


Toe taga'i i le itulau ua faaliliuina i le gagana Samoa

O le a le talitonuga moni mo a'u?