O ai ea Iesu Keriso?




Fesili: O ai ea Iesu Keriso?

Tali:
O ai ea Iesu Keriso? E le tutusa le fesili lea ma le isi fesili, "E iai ea se Atua?" E le tele ni tagata e fesiligia le soifua mai o Iesu Keriso. E talia e le toatele Iesu o Ia o se tagata na savalia lenei lalolagi i Isaraelu e silia ma le 2000 tausaga ua mavae. Ae e tuu fesili niisi tagata ina ua talanoaina le mataupu i le itu Atua o Iesu. O le tele o talitonuga tupito o loo tala'iina ai Iesu o Ia o se perofeta, o se faiaoga lelei, po'o se tagata amiotonu foi. O le faalavelave, o le Tusi Paia o lo'o ta'utino i le matua uiga ese le silisili o Iesu nai lo se perofeta, se faia'oga lelei, po'o se tagata amio lelei.

Fai mai C.S. Lewis i lana tusi "Mere Christians": "Ua ou taumafai e taofi tagata ia le faamasani e tautala fa'aletatau e uiga ia te Ia [Iesu Keriso], fa'ata'ita'iga: "Ua ou talia le manatu o Iesu o le faia'oga sili mo le a'oa'oina o amioga lelei, ae ou te le talia faapea o Ia o le Atua." E le tatau ona tatou tautala faapea. O se tagata fa'atauvaa ae tautala i tulaga na fetalai mai ai Iesu e le ta’ua o ia ua na o se faia'oga e a'oina ai amioga lelei. E manatu niisi tagata o Ia o se vale -- Na te le iloa se mea -- pe faapea foi niisi o Ia o le tiapolo mai seioli. E tatau ona faia le filifiliga a le tagata lava ia. O lou talitonu o lenei tagata o le Alo o le Atua, po'o lou faapea o Ia o se tagata ua valea pe sili atu fo'i... E mafai ona e fulitua ia te Ia ma lou manatu o Ia o se vale, pe tuufeanu foi ia te Ia, pe e te loto e fasioti o Ia ina ua e manatu o Ia o se temoni; Pe e te filifili ia i lou loto o le a e fa'apa'u fao i Ona aao ma avea o Ia e fai ma ou Alii ma Atua. Ae 'aua ne'i o tatou manatu fa'avalevalea o Ia o se faiaoga sili, aua Na te le'i aumaia lea manatu e tatou te filifili iai. E le o Lona loto foi lea."

O lea la, o ai Iesu e tusa ma Ana lava fetalaiga? Fai mai e a le Tusi Paia, o ai o Ia? Muamua, taga'i i le fetalaiga a Iesu ua tusia i le Ioane 10:30, "O A'u nei ma le Tama, e tasi lava i maua." A faitau se tasi i lea fuaiupu, e foliga e le o fai mai Iesu o Ia o le Atua. Ae vaai toto'a i le tali atu a tagata Iutaia ia te Ia ona o Lana fetalaiga: "...E le se galuega lelei matou te fetogi ai oe, a o le upu leaga; aua o oe o le tagata, a ua e fai oe ma Atua" (Ioane 10:33). O lona uiga ua sapoina ma toe togi atu e tagata Iutaia le fetalaiga a Iesu, o Ia o le Atua. E le o faasagatonuina foi e Iesu i latou ma faapea atu, "Ou te le'i faapea atu o A'u o le Atua" ae ua faamaonia ai iina le fetalaiga a Iesu ia te i latou, O A'u nei ma le Tama, e tasi lava i maua" (Ioane 10:30). O loo tusia i le Ioane 8:58 se tasi foi faamaoniga ina ua fetalai atu Iesu ia te i latou, "E moni, e moni, ou te fai atu ia te outou, sa a'u i ai, a o lei leai se Aperaamo."

Fai mai Ioane 1:1 "O le Atua foi le Lokou." O loo tusia i le Ioane 1:14, "Ua liu tino tagata le Lokou." O loo faamanino mai ai iina le liutino o Iesu e fai ma tagata. Fai mai le ta'utinoga a Toma le so'o o Iesu, "Lo'u Alii e, ma lo'u Atua e" (Ioane 20:28). E le'i taumafai foi Iesu e fa'asa'o le tala a Toma sa fai. O lo'o faamatalaina e le Aposetolo o Paulo Iesu, fai mai, "...o le Atua silisili, o lo tatou Faaola o Iesu Keriso lea" (Tito 2:13). E tutusa ma le molimau a le Aposetolo o Peteru, "...o lo tatou Faaola lea o Iesu Keriso" (2 Peteru 1:1). E molimau le Atua le Tama i le atoatoa o Iesu, a o Lana fetalaiga e fa'atatau i le Alo e faapea, "Le Atua e, O lou nofoalii e fa'avavau fa'avavau lava lea; o le tootoo o lou malo, o le tootoo o le amiotonu lea." O le valoaga o Keriso i le Feagaiga Tuai o loo ta'u manino mai ai Lona itu Atua, "Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le faipule, o le Atua malosi, o le Tama o le faavavau, o le Alii o le filemu."

O le mafua'aga lea na finau ai C.S. Lewis ia, tatou te le o filifilia Iesu e faapea o Ia o se faiaoga sili. Ua manino lelei le ta'utinoga a Iesu, o Ia lava o le Atua. Afai e le o Ia o le Atua, o lona uiga ua avea o Ia ma tagata pepelo, e le o se perofeta foi, po'o se faiaoga, po'o se tagata amio atua. Ua tele ina talitonu "tagata a'oa'oina" i nei ona po, e le o fetalaiga a Iesu upu uma o loo tusia i le Tusi Paia e uiga ia te Ia. O ai i tatou e finau ai ma le Upu a le Atua e tusa ma fetalaiga a Iesu, pe na faia e Ia pe leai? E faapefea ona sili atu le iloa a tagata o lo'o a'ooga i le 2000 talu mai le toe fo'i atu o Iesu i le lagi, ma le molimau a e na ola faatasi ma Iesu, auauna ia te Ia, ma a'oa'oina e Iesu lava Ia (Ioane 14:26)?

Aisea ua fa'atauaina ai le fesili e uiga i le tagata moni o Iesu? O le a le afaina o lou mautinoa o Iesu o le Atua, pe leai? E taua lo tatou iloa o Iesu o le Atua aua afai e leai, o lona uiga ua le lava Lona maliu e togiolaina ai le lalolagi atoa mai le faasalaga o le agasala (I Ioane 2:2). Ua na o le Atua Na te mafaia ona totogiina la tatou sala (Roma 5:8; 2 Korinito 5:21). O le avea foi o Iesu ma Atua na mafai ai e Ia ona totogiina le tau matua tele o le tatou faasalaga. Sa tatau foi ona avea Iesu ma tagata ina ia mafai ona maliu o Ia. Pau lava lea o le ala na maua ai lo tatou avanoa i le Faaolataga e ala i le faatuatua ia Iesu Keriso! O le itu Atua o Iesu ua mafua ai ona avea o Ia ma ala o le tatou Faaolataga. O Lona itu Atua foi ua mafai ai ona ta'utino o Ia, "O A'u nei le Ala, Upu moni ma le Ola. E le alu atu lava se tasi i le Tama pe a le ui mai ia te A'u" (Ioane 14:6).


Toe taga'i i le itulau ua faaliliuina i le gagana Samoa

O ai ea Iesu Keriso?