E faapefea ona ou taliaina le faamagaloga a le Atua mo a’u?




Fesili: E faapefea ona ou taliaina le faamagaloga a le Atua mo a’u?

Tali:
Ua tautino le Galuega 13:38, e faapea, "O lenei, sema e, le au uso e, ia outou iloa ua folafolaina ia te outou le faamagaloina o agasala ona o lenei tagata [o Iesu]."

O LE A EA LENEI MATAUPU O LE FAAMAGALOINA, AE AISEA FOI OU TE MANA'OMIA AI LEA MEA?

O le uiga o le upu "faamagalo" ua matua faamamaina lou olaga, ua le gata ina aveeseina o au agasala, ae ua faagaloina; ua le toe iai foi se sala sa tatau ona e totogiina! E maua e le tagata agasala le faamagaloina ona ua iai se alofa moni ma le alofa tunoa o le Atua, i le ua agaleagaina. O le faamagalo foi, o se filifiliga a le tagata sa agaleagaina, ua ia le taui ma sui ia te oe ae ua ia filifili e faagalo i amio leaga sa faia ia te ia.

O loo ta'ua mai e le Tusi Paia, e mana'omia e i tatou uma lava le faamagaloga a le Atua, aua ua agasala tagata uma lava. Fai mai le Failauga e 7:20: "E leai lava se tagata amiotonu i le lalolagi, o le na te faia amio lelei, ma le le agasala.” Fai mai foi le I Ioane 1:8: “Afai tatou te faapea, e leai sa tatou agasala, ua sese ai i tatou ia i tatou, e le o o totonu ia te i tatou le upu moni." O agasala uma lava e faasagatau i le Atua (Salamo 51:4). O le mea lea e mana'omia tele ai e i tatou le faamagaloina mai le atua. Afai foi e le'i faamagaloina a tatou agasala, e nofosala i tatou e faavavau (Mataio 25:46; Ioane 3:36).

FAAMAGALOINA--E FAAPEFEA ONA OU MAUAINA?

E faafetaia le Atua ona o Lona alofa mutimutivale – e naunau o Ia e faamagaloina a tatou agasala! Fai mai le 2 Peteru 3:9, "...ae peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo." e finagalo le Atua ia faamagaloina i tatou, ma ua ia saunia ai le ala mo le faamagaloina o a tatou agasala uma lava.

Na o le oti lava le faasalaga ua tatau mo i tatou. Ua ta'utino mai le vaega muamua o le Roma 6:23 "Aua o le oti, o le totogi lea o le agasala;..." o le oti e faavavau o le totogi lava lea o a tatou agasala. A o le Atua, i Ana lava fuafuaga tonu, ua Ia liu tino tagata ai--o Iesu Keriso (ioane 1:1,14). O le oti sa tatau ona oo ia te i tatou, ae sa maliu Iesu i le satauro o le sui o i tatou. O le maliu o Iesu, o Ia lava o le Atua, o iina ua togiolaina ma faamagaloina ai agasala a le lalolagi atoa. Fai mai le I Ioane 2:2 "o le togiola foi o Ia mo a tatou agasala, e le gata foi ia i tatou, a e atoa foi ma agasala a le lalolagi uma lava." ua toe tu mai iesu nai e ua oti, ma ua Ia manumalo ai i le agasala ma le oti (I Korinito 15:1-28). Ia viia lava le Atua, aua o Lona maliu ma :ona toe tu mai ua faamaonia ai le vaega mulimuli o le Roma 6:23: "...a o le ola e faavavau, o le mea foaifuaina mai lea e le Atua, i lo tatou alii o Keriso Iesu."

E te mana'omia ea le faamagaloina o au agasala? O e lagonaina le mamafa o saisaitiaga nei o loo taumafai e pulea oe? Afai e tuu atoa lou faatuatua ia Iesu Keriso i Ia o lou faaola, o loo faatali mai o Ia e faamagaloina au agasala uma lava. O loo molimau le Efeso 1:7 "o ia foi ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa..." Ua totogiina e Iesu a tatou agasala, ua faamagaloina ai i tatou. Tau o lou ole atu i le Atua mo le faamagaloina o au agasala e ala ia Iesu, ma e talitonu o Iesu na maliu o le totogi lea o au agasala--Na te faamagaloina oe! O se feau manaia mo oe o loo maua lea i le Ioane 3:16,17: "Aua ua faapea lava ona alofa mai o le atua i le lalolagi, ua ia au mai ai lona atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Aua e lei auina mai e le atua lona atalii i le lalolagi ina ia faasala i le lalolagi, a ia faaolaina le lalolagi ia te ia."

FAAMAGALOINA--E MONI E FAAPENA LE FAIGOFIE?

Ioe, e faigofie lava! E le faatauina le faamagaloga a le Atua. Na ona e talia, i lou faatuatua, e ala i Lona alofa tunoa. Afai e te manao e talia Iesu Keriso e avea ma ou faaola ma talia nei le faamagaloina o oe mai le Atua, faaaoga le tatalo lea. Ia e iloa lelei, e le faaolaina se tasi i le tatalo lea, poo se tasi lava tatalo. Na o lou faatuatua ia Iesu Keriso e te maua ai le faamagaloina o au agasala. O le tatalo lea ua na o se ala e faailoa atu ai i le Atua lou faatuatua ia te Ia, ma lou loto faafetai ona o Lana faamagaloina o oe. "le Atua, ua ou iloa ua ou agasala ia te Oe ma ua tatau lava ia te a'u lo'u faasalaga. Ae ua sui tulaga Iesu ma Ia tau’aveina le faasalaga sa tatau mo a'u, ina ia ou faatuatua ia te Ia ma ou maua ai le faamagaloina. Ua ou liliu ese nei mai a'u agasala ae faatuatua ia te Oe mo lo'u faaolataga. Faafetai tele mo Lou alofa tunoa ma lou faamagaloina o au! Amene!

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.


Toe taga'i i le itulau ua faaliliuina i le gagana Samoa

E faapefea ona ou taliaina le faamagaloga a le Atua mo a’u?