O le a le aoaoga a le Tusi Paia i le inu 'ava poo le uaina? O se agasala le inu 'ava o le Kerisiano?




Fesili: O le a le aoaoga a le Tusi Paia i le inu 'ava poo le uaina? O se agasala le inu 'ava o le Kerisiano?

Tali:
E fai sina tele o lapata'iga a le Upu e faatatau i le inu 'ava (Levitiko 10:9; Numera 6:3; Teuteronomy 29:6; Faamasino 13:4,7,14; I Samuelu 1:15; Faataoto 20:1; 31:4,6; Isaia 5:11,22; 24:9; 28:7; 29:9; 56:12; Mika 2:11; Luka 1:15). Ae e le o faasaina e le Upu le inu pia poo le inu uaina o le Kerisiano, poo se isi lava mea inu o loo iai le 'ava malosi. O le mea moni lava, e iai niisi tusi o le Upu o loo talanoaina se tulaga manuia e tatau ona inu ai le 'ava. I le ma lea, e faapea le a'oa'oga a le Tusi o Failauga e 9:7 "Ina inu foi ia i lau uaina ma le loto fiafia". I le Salamo 104:14-15 o loo tusia faapea, ua faatupu e le Atua le uaina "e faafiafia ai loto o tagata". Ua faapea mai le Amosa e 9:14 i le inu uaina mai tovine ua e totoina, e fai lea ma faailoga o faamanuiaga a le Atua. O loo faamalosi mai foi le Isaia 55:1 e faapea "ia outou o mai lava, ma faatau le uaina ma le suasusu..."

O le tulaga o loo faatonuina mai e le Atua mo Kerisiano, ina ia 'aua lava ne'i 'ona i le uaina (Efeso 5:18). O loo iai le faasalaina e tusa ma le aoaoga a le Tusi Paia pe a fai ni onaga ma ona a'afiaga (Faataoto 23:29-35). Ua lapata'ina foi Kerisiano ia 'aua ne'i "faia'ina" pe nofo pologa i se mea e tasi (I Korinito 6:12; 2 Peteru 2:19). E le taumate, o le tele o le inu 'ava e faateleina ai foi ma le tu'inanau iai. O loo lapata'iina Kerisiano e le Upu ina ia faaeteete ina ne'i avea la latou faitalia ma mea e tausuai ai e ua vaivai (I Korinito 8:9-13). A tatou vaai ma le malamalama lelei i le uiga o nei upu tomua, e matua faigata tele i se Kerisiano ona faapea mai o loo ia inu 'ava ina ia viia ai le Atua (I Korinito 10:31).

O Iesu na Ia suia le vai e fai ma uaina. E iai foi vaitaimi e foliga mai sa iai ni tulaga sa inu uaina ai Iesu (Ioane 2:1-11; Mataio 26:29). I taimi o le Feagaiga Fou, e le'i faamamaina le vai inu. Ona e le'i faamamaina vai e feinu ai tagata e pei o ona po nei, ua faatama'iaina le vai ma ua maua ai foi fa'ama'i eseese i soifuaga o tagata. O loo faapena foi tulaga o vai inu i nai isi atunu'u matitiva e o'o mai lava i le aso. Ona o lea tulaga, o le tele o tagata ua feinu i le uaina (po'o le sua o le vine) aua e ono maua ai lo latou soifua maloloina. I le I Timoteo 5:23, o loo faatonuina ai e Paulo Timoteo ina ia 'aua ne'i toe inu o ia i le vai ('ai pe sa o'o ia te ia se fa'ama'i manava) ae ia inu i le uaina. I la'ia aso, sa fa'amafu le uaina (o loo iai le 'ava malosi), ae e le tele e pei o le tulaga o loo iai le uaina i nei ona po. E le tonu foi le faapea ane o le sua o le vine, ae e le sa'o foi le faapea ua tutusa lava le uaina ma le uaina o loo inumia i nei ona po. E toe faapea atu foi, e le o faapea mai le Upu e fa'asaina Kerisiano mai le inu 'ava, uaina po'o se isi lava mea inu o lo'o iai le 'ava malosi. O le 'ava, e na o ia lava, e le o se agasala. Ae o le mea tonu lava, o le lapata'iga e mo Kerisiano ina ia 'aua ne'i 'ona ma ia 'aua lava ne'i faia'ina le olaga i le 'ava (Efeso 5:18; I Korinito 6:12).

O le 'ava, pe 'a inu sina mea itiiti, e le afaina ai pe 'ona ai foi. O le mea moni lava, ua iai ni foma'i ua sapaia le inu o sina uaina mumu mo le soifuaga maloloina, ae maise lava mo tulaga o le fatu. O le inu ina o sina tama'i 'ava o le tulaga lea e tuuina atu i le faitalia a le Kerisiano. O le agasala o lou oo lea i le tulaga o le 'onaga ma le momo'o i le 'ava. Ae ui i lea, ona o a'oa'oga a le Tusi Paia i le 'ava ma ona faatama'iga eseese, aua e tupu ai le faaosoosogofie ina ne'i mana'o tele iai, ae e le gata foi i lea, a o le tutupu mai ai o faafitauli ma vaivaiga o niisi -- o lea la, o le mea e sili lava mo le Kerisiano o le matua 'aveesea o le tulaga o le ina 'ava mai lona olaga.


Toe taga'i i le itulau ua faaliliuina i le gagana Samoa

O le a le aoaoga a le Tusi Paia i le inu 'ava poo le uaina? O se agasala le inu 'ava o le Kerisiano?